У Лідзе знік памятны камень з магілы ксяндза-паўстанца
Напярэдадні 162-й гадавіны пачатку паўстання 1863 года невядомыя выкралі ў Лідзе памятны камень з магілы ксяндза Адама Фалькоўскага, расстралянага ўладамі царскай Расіі, паведаміла выданне Znadniemna.pl.
Магіла ксяндза Адама Фалькоўскага. Фота: Наша Ніва
«Пра блюзнерскі ўчынак рэдакцыі паведамілі чытачы з Ліды, якія жадалі ўскласці кветкі і запаліць свечкі на сімвалічнай магіле айца Фалькоўскага ў гадавіну пачатку паўстання. Па словах нашых інфарматараў, восенню мінулага года камень яшчэ стаяў на месцы, паколькі ў Дзень памінання памерлых палякі запальвалі побач з ім свечкі», — піша Znadniemna.pl.
Год таму, у пачатку студзеня 2024 года, хтосьці ўжо спрабаваў апаганіць помнік, сцёршы выгравіраваны на камені герб «студзеньскіх паўстанцаў Літвы і Беларусі».
Ксёндз Адам Фалькоўскі быў змешчаны царскімі ўладамі ў турму і прысуджаны да смяротнага пакарання за тое, што падчас паўстання 1863 года зачытаў маніфест паўстанцаў і заклікаў сваіх вернікаў далучыцца да паўстання.
Фалькоўскі быў расстраляны 24 чэрвеня 1863 года ў Лідзе.
Чытайце таксама:
Ціханоўская ўшанавала памяць удзельнікаў паўстання Кастуся Каліноўскага
Агнешка Рамашэўская: Шкада, што мы не ўзялі камуністаў за морду
Украіна размясціла на мяжы з Беларуссю банеры з адсылкай да Слуцкага паўстання ФОТАФАКТ