Марзалюк пра новы гістарычны музей: Сустракаць наведвальнікаў будуць самыя важныя ў нацыянальнай гісторыі асобы

Дэпутат Ігар Марзалюк расказаў пра тое, чаго чакаюць ад новага будынка Нацыянальнага гістарычнага музея.

Запланаваны галоўны фасад новага Нацыянальнага гістарычнага музея

«Глабальная задумка новага музея — паказаць доўгі шлях беларусаў да незалежнасці. Не на словах, а прадметна: праз унікальныя артэфакты, лёсы і падзеі. Беларуская дзяржаўнасць — гэта не выпадковы збег абставін, а тое, да чаго мы доўга і ўпарта імкнуліся, гэта аб'ектыўная заканамернасць тых працэсаў, якія пачаліся на нашых землях тысячагоддзе таму», — падзяліўся Марзалюк у інтэрв'ю дзяржаўнай «Народнай газеце».

Марзалюк кажа, што новы музей гэта не толькі новы будынак, але і «прынцыпова новае бачанне».

«Ужо на падыходзе да музея наведвальнікі павінны будуць атрымліваць першыя моцныя ўражанні, менавіта таму такая сур'ёзная ўвага надаецца яго знешняму абліччу, дзе будзе шмат сімвалаў і знакаў. 

Скажу толькі, што сустракаць наведвальнікаў будуць самыя важныя з пункту гледжання нацыянальнай гісторыі асобы — ад старажытнасці да нашых дзён. Хто менавіта і ў якім фармаце — сакрэт». 

Экспазіцыя будзе фармавацца з фондаў цяперашняга Нацыянальнага гістарычнага музея.

«Тое, што цяпер даступна наведвальніку ў залах [Нацыянальнага гістарычнага музея], — толькі мінімальная колькасць экспанатаў. Але ўлічваючы грандыёзнасць канцэпцыі, не выключана, што будуць прыцягвацца знакавыя прадметы і з іншых музеяў. Магчыма, не арыгіналы (у нас няма мэты абяскровіць рэгіёны, забраўшы адтуль усё самае каштоўнае і цікавае), а па-майстэрску створаныя рэплікі, галаграмы і гэтак далей. Ёсць яшчэ і такая форма, як часовае захоўванне тых ці іншых прадметаў з наступным вяртаннем», — адзначыў Марзалюк. 

Новы будынак Нацыянальнага гістарычнага музея размесціцца на месцы парка «Дрымлэнд» — на ўчастку паміж праспектам Пераможцаў — вуліцай Арлоўскай і ракой Свіслач. Па праекце ён будзе паўтараць контур карты Беларусі. Унутры — некалькі паверхаў з вялікімі прасторамі і холамі, каля 20 тысяч кв. м. Пабудаваць яго плануюць да 2027 года.

Каментары да артыкула