Беларуска пераехала ў Нідэрланды, каб канчаткова змяніць пол. Як гэта ўладкавана і колькі каштуе?

Стэфанія — трансгендарная дзяўчына з Беларусі. Яна пераехала ў Нідэрланды, каб да канца давесці працэс пераходу з мужчыны ў жанчыну, распачаты яшчэ ў Беларусі — зрабіць вагінапластыку. У тыктоку яна дзеліцца ўсімі крокамі і перажываннямі на шляху да пераўтварэння ў жанчыну.

Стэфанія сёння. Фота: тэлеграм-канал @steshkasad

@stefa_chka Рассказываю как устроена смена пола в Нидерландах #трансгендерность #транспереход ♬ original sound - Тгк Стешка.ком

Стэфанія пачала свой трансгендарны пераход, яшчэ калі ёй было 15 год. Тады, па яе словах, гэта было «на яе страх і рызыку», і яна нікому не рэкамендуе паўтараць: дзяўчына пачала прымаць гарманальныя прэпараты па сваім рашэнні, нелегальна і без дазволу дактароў, бо была непаўналетняй (толькі з 18 год магчымы зварот да Міжведамаснай камісіі па медыка-псіхалагічнай і сацыяльнай рэабілітацыі асоб з сіндромам адмаўлення полу).

«Калі я атрымала афіцыйнае пазітыўнае рашэнне камісіі, мне пачалі афіцыйна выпісваць гарманальны прэпарат у таблетках. У 2020-м я даведалася, што існуюць эстрадыёлавыя гелі, і яны лепш засвойваюцца, не шкодзяць печані, таму я пачала карыстацца імі».

Цяпер дзяўчыне амаль 28.

У яе за плячыма — развод з мужам пасля пяці год шлюбу. Яна працягвае прымаць гармоны, ужо перанесла архіэктамію (аперацыю па выдаленні яечак). Дзякуючы пластыцы, у яе ёсць грудзі, новы нос і вусны, яна выглядае па-жаноцку. Таксама Стэфанія яшчэ ў Беларусі змяніла гендарны маркер у пашпарце, але яна марыць, каб усё было гарманічна «не толькі зверху, але і знізу» — для гэтага і патрэбная вагінапластыка.

Стэфанія працуе ў якасці мадэлі, 2023 год. Фота: @stuff_bruin

«Я жыла досыць камфортным жыццём, але рэальна стамілася: хачу мець магчымасць выйсці на пляж, не думаючы, ці не адваліўся ў мяне спецыяльны скотч для сцягвання. Ці ведаеце, як мне было некамфортна, калі я працавала мадэллю, і ў мяне былі кастынгі ў купальніках з іншымі дзяўчатамі, а стаяла я, такая вось, з «сюрпрызікам», — дзеліцца Стэфанія.

@stefa_chka Я понимаю теперь, что Господь любит нас такими, какие мы есть, без исключения. Не важно, кто ты — трансгендер, гей, небинарная персона Бог есть любовь! #сменапола #беларусь ♬ ГРЕШНИЦА - MARRY ME, BELLAMY & JEDY DEADY

Працэс падрыхтоўкі да аперацыі ў Нідэрландах уключае сустрэчы з тэрапеўтам, эндакрынолагам, а таксама з псіхолагам. Па выніку высноваў апошняга збіраецца кансіліум, на якім і вырашаецца, ці дазваляюць дактары змену полу канкрэтнаму чалавеку.

На днях беларусцы прыйшоў станоўчы адказ: яе ўключылі ў ліст чакання на аперацыю, якая адбудзецца праз 10-12 месяцаў.

@stefa_chka Мы здесь там, где есть люди, в не зависимости от страны. Если ты думаешь, что рядом с тобой нет представителей лгбт, то ты глубоко ошибаешься #лгбт #беларусь ♬ Spooky, quiet, scary atmosphere piano songs - Skittlegirl Sound

Стэфанія распавяла пра кошт падобных аперацый у Нідэрландах. Менавіта гэтую краіну для працэдуры яна выбрала таму, што там, на яе погляд, адна з найлепшых сістэм медыцынскага страхавання ў Еўропе.

«У Нідэрландах абавязковая страхавая сістэма, вы не можаце тут жыць і працаваць без медыцынскай страхоўкі. Сама сістэма шматузроўневая: нехта можа плаціць 145 еўра за базавую абавязковую страхоўку, нехта 170, а нехта 320 — усё залежыць ад таго, што ўключана ў ваш пакет.

І менавіта страхавыя кампаніі аплачваюць аперацыі па змене полу, і гэта ўваходзіць у базавы поліс. Сама ж па сабе аперацыя можа каштаваць да 17 тысяч еўра», — распавядае яна.

У каментарах дзяўчыну часам заклікаюць адумацца і не ісці «супраць законаў прыроды і боскай волі». Але ёсць і тыя, хто падтрымлівае выбар Стэфаніі і радуецца за яе перамены.

Сама яна лічыць, што з’яўляецца большай хрысціянкай, чым тыя, хто гатовы цкаваць іншых людзей: «Ува мне больш любові».

Каментары да артыкула