Milicyja raskazała, jakaja ciapier situacyja z narkotykami

Ab situacyi z narkazłačynnaściu, samaj bujnoj partyi narkotykaŭ, vyjaŭlenaj u minułym hodzie, i pierśpiektyvach źmiakčeńnia zakanadaŭstva intervju ANT raskazaŭ namieśnik načalnika Hałoŭnaha ŭpraŭleńnia pa narkahandli i supraćdziejańni handlu ludźmi MUS Biełarusi Andrej Kudrycki.

Namieśnik načalnika Hałoŭnaha ŭpraŭleńnia pa narkahandli i supraćdziejańni handlu ludźmi MUS Biełarusi Andrej Kudrycki

Kolkaść złačynstvaŭ, źviazanych z narkotykami, za apošnija dziesiać hadoŭ skaraciłasia ŭdvaja. Pa vynikach 2024 hoda zarehistravana 3883 takija złačynstvy. Ź ich 96 ździejśnieny niepaŭnaletnimi — heta ŭ čatyry razy mienš, čym dziesiać hadoŭ tamu.

Za toj ža pieryjad u dva z pałovaj razy skaraciłasia kolkaść pieradazirovak narkatyčnymi i psichatropnymi rečyvami.

Pa kolkaści vyjaŭlenych narkazłačynstvaŭ lidziruje stalica. Darečy, u Minsku na ŭliku znachodzicca kala 4500 narkazaležnych. Dalej pa kolkaści narkazaležnych iduć Homielskaja i Mahiloŭskaja vobłaści.

U minułym hodzie, pa słovach Kudryckaha, była zatrymanaja adna z najbujniejšych partyj narkotykaŭ — 1077 kiłahramaŭ. Jana nakiroŭvałasia tranzitam praź Biełaruś z Zachodniaj Jeŭropy ŭ Rasiju. Narkotyki byli schavanyja ŭ kołach fur.

«Biełaruś — tranzitnaja kraina. Jak praviła, bujnyja partyi narkotykaŭ iduć z krain Jeŭrasajuza ŭ Rasiju. Adtul drobnymi partyjami viartajucca da nas dla raspaŭsiudu praź internet-kramy», — davodzić Kudrycki.

Sumiesna z rasijskimi pravaachoŭnikami za minuły hod było vyjaŭlena šeść narkałabaratoryj, čatyry ź ich — na terytoryi Biełarusi.

Jak adznačaje Kudrycki, akramia Rasii, pramoje supracoŭnictva ažyćciaŭlajecca z pravaachoŭnikami Kazachstana, Azierbajdžana, Armienii, Kyrhyzstana i Turkmienistana. Z krainami Jeŭrasajuza, u tym liku ź bližejšymi susiedziami — Łatvijaj, Litvoj i Polščaj, uzajemadziejańnie adbyvajecca tolki praź Interpał.

Pavodle Kudryckaha, statystyka złačynnaści śviedčyć pra efiektyŭnaść zakanadaŭstva:

«Dziesiać hadoŭ nazad byŭ tak zvany «spajsavy bum». Adpaviedna, treba było prymać niejkija zakanadaŭčyja miery, uzmacniać adkaznaść. I takija miery byli svoječasova pryniaty, što ŭ dalejšym paŭpłyvała na narkasituacyju ŭ našaj respublicy».

Ciapier, pavodle pradstaŭnika MUS, u suviazi z pastupovym palapšeńniem narkasituacyi štohod unosiacca prapanovy pa źmianieńni zakanadaŭstva.

Sioleta nižniaja miaža pakarańnia pavodle častki 4 artykuła 328 źmienšyłasia na dva hady. U vyniku adkaznaść za zbyt narkotykaŭ u składzie arhanizavanaj złačynnaj hrupy abo za ich vyrab u padpolnych łabaratoryjach skłała ad 8 da 20 hadoŭ pazbaŭleńnia voli.

Kamientary da artykuła