Hiensak NATA: Adkaz na napad na Polšču budzie razburalnym
Hienieralny sakratar NATA Mark Rute ŭ Varšavie adznačyŭ, što transatłantyčny vajenny aljans adkaža na napad suprać luboha z chaŭruśnikaŭ.
Mark Rute na pres-kanfierencyi ŭ Varšavie 26 sakavika. Skrynšot ź videa: NATO News
Na sumiesnaj pres-kanfierencyi z polskim premjer ministram Donaldam Tuskam jon adznačyŭ, što toj, chto «praličycca i padumaje, što jamu sajdzie z ruk napad na Polšču ci inšaha chaŭruśnika», atrymaje žorstki adkaz:
«Naša reakcyja budzie razburalnaj. Heta pavinna być zrazumieła Uładzimiru Uładzimiraviču Pucinu i ŭsim, chto choča napaści na nas», — skazaŭ jon.
Rute acaniŭ toje, što Polšča vydatkoŭvaje na abaronu 4,7 adsotka svajho vałavoha ŭnutranaha praduktu, što źjaŭlajecca samym vysokim pakazčykam u aljansie.
Taksama jon ličyć, što ŭ śviecie niama inšaha abjadnańnia, jakoje zachoŭvała b Jeŭropu i Paŭnočnuju Amieryku ŭ biaśpiecy.
Rute skazaŭ, što Pucin «nie admoviŭsia ad svaich ambicyj pa źmienie hłabalnaha paradku biaśpieki». I padkreśliŭ, što mocny transatłantyčny aljans zastajecca asnovaj jeŭrapiejskaj biaśpieki i što bolš mocnyja jeŭrapiejskija chaŭruśniki źjaŭlajucca ŭnikalnym stratehičnym aktyvam Złučanych Štataŭ, jakija dazvalajuć Amierycy, ź jahonych słoŭ, «umacoŭvać śviet siłaj na suśvietnaj arenie».