Праўладны спявак дамовіўся, каб у туалеце кавярні гучала яго песня
Навіны са свету беларускіх інавацый, якія мы заслужылі.
Скрыншот відэа ў інстаграме Івана Зданюка
Праўладны спявак Іван Зданюк, які старанна працаваў на «Марафонах адзінства», зайшоў нядаўна ў прыбіральню кавярні «Варка» ў Мінску. Уразіла артыста тое, што на сцяне знаходзілася вялікая чырвоная кнопка, а побач з ёй быў надпіс: «Націсні мяне».
— Вы б націснулі? Сумнеўна неяк гучыць. І ў прынцыпе ты звычайна не націскаеш на чырвоныя кнопкі — толькі ў экстранных выпадках. Раптам гэта нейкая падстава.
Але Іван усё ж рызыкнуў і націснуў. У той жа момант святло ў прыбіральні згасла, уключылася светлавая музыка і загучала вірусная песня Pedro.
Такая фішка кавярні спадабалася хлопцу. Разам са сваёй сяброўкай Алёнай Тоўсцік (фіналістка шоу БТ «Фактар.бай») ён пайшоў дамаўляцца з кіраўніцтвам «Варкі», каб у іх туалеце грала «правільная музыка». Такой артысты сціпла лічаць свой новы трэк «Пачуцці». Цяпер у туалеце кавярні чырвоная кнопка ўключае менавіта гэтую песню.
Астатнім наведвальнікам «Варкі» застаецца толькі спадзявацца, што сюды аднойчы не заскочыць прыдворны кампазітар Яўген Алейнік і не запатрабуе ўключаць у прыбіральні сваю творчасць. Напрыклад, «Бацька у нас крутой» ці песню «Надо», якой Лукашэнку летась заахвочвалі ісці на выбары.
Чытайце таксама:
Аўтар песні «Любимую не отдают» паскардзіўся, што суседзі начамі катуюць яго сям'ю яго ж хітамі