Top artystaŭ novaj chvali, jakija robiać pieśni pa-biełarusku
U Dzień rodnaj movy dzielimsia z vami padborkaj śviežych imionaŭ u biełaruskamoŭnaj muzycy, pra jakija vy mahli nie čuć. Dapaŭniajcie ŭ kamientarach, kaho jašče varta dadać u płejlist!
Illa Šynkarenka
Toj samy chłopiec ź Niamihi i tyktoka.
Illa, jaki naradziŭsia ŭ Mahilovie, nie tolki stvaraje pryhožyja biełaruskamoŭnyja kaviery i vypuskaje ŭłasnyja mieładyčnyja pieśni. Siońnia jon — adzin z samych cikavych papularyzataraŭ biełaruskaj movy. Robić jon heta i pry dapamozie vuličnych apytanak, u jakich prapanoŭvaje, naprykład, pierakłaści ruskija słovy na biełaruskuju ci vymavić «Ŭ», a taksama zdymajučy viasiołyja mini-vłohi ź viaskovaha žyćcia svajakoŭ.
U jaho repiertuary — pieśni na tvory biełaruskich paetaŭ ad Karatkieviča, Astrejki, Bahdanoviča da ahulnaviadomaj Kupalinki. Ź imi jon užo sabraŭ kłub «Reaktar» i praciahvaje zavajoŭvać inšyja placoŭki. A jaho tancy pad pieśniu «Padmanuła-padviała» zavirusilisia ŭ tyktoku, natchniŭšy na padobnyja zdymki pad viečny biełaruski chit dziasiatki inšych ludziej.
Nevika
Słuččanka Viktoryja Vałatovič, što vystupaje pad psieŭdanimam Nevika, ułasnyja pieśni piša z 12 hadoŭ. Spačatku jany byli na ruskaj movie, ale apošnim časam dziaŭčyna vypuskaje adzin biełaruskamoŭny trek za inšym. Adzin z samych virusnych — «Paparać-kvietka».
Niadaŭna ŭ jaje vyjšaŭ čarhovy rytmičny reliz z folk-notkami «Muzyka». Dla videa na hetuju pieśniu Viktoryja stylizavała aŭtentyčnuju babulinu chustku — zacanicie, jaki stylovy łuk atrymaŭsia.
Jan Kłapocki
Muzyku Jana Kłapockaha niechta paraŭnoŭvaje z rańnimi pieśniami hrupy «Aukcyjon», niechta znachodzić u jaho hučańni vajby haradzienskaha šamana z hitaraj Ženi Kučmiejny (tochka K). Tak ci inakš, muzyka hetaha vypusknika ŭniviersiteta kultury i mastactvaŭ vielmi praniźlivaja, z takoj ža mocnaj lirykaj.
Hraje chłopiec pieravažna solna ci na paru z bas-hitarystami. Časam abjadnoŭvajecca z takimi, taksama biełaruskamoŭnymi prajektami, jak «Sinija hory» ci Yellow Power. U apošnich raim pasłuchać pieśniu pra mastačku Alenu Kiš z alboma, zapisanaha padčas vystupu ŭ Rakavie.
Źmicier Soncaŭ
Źmicier Soncaŭ jarka ŭvarvaŭsia ŭ muzyčnuju prastoru svaimi lampavymi trekami na biełaruskaj movie ŭ 2024 hodzie.
U pakul nievialikim repiertuary Źmitra možna adšukać pieśni na vieršy biełaruskich kłasikaŭ — Janku Kupału i Maksima Bahdanoviča. Ale jość u muzyki i ŭłasnyja treki. Adzin z apošnich «Śviaci» vyjšaŭ napiaredadni Novaha hoda.
Sam jon pazicyjanuje svaju tvorčaść jak «utulnuju i ciopłuju».
Lightowy
Amatary repa musiać być u kursie tvorčaści Łajtovaha — Alaksieja Hryzunta. «Biełaruskamoŭny chip-chop vykanaŭca, ambasadar kłasičnaha hučańnia i nośbit aŭtentyčnaha minskaha fłoŭ. Jaho tvorčaść pahruzić vas u atmaśfieru sapraŭdnaj kultury», — tak pradstaŭlajuć Alaksieja ŭ afišach. Zrešty, pasłuchajcie sami.
Chabor
«Unijacki pop-pank ź Sierabranki» — hučyć kruta. Mienavita tak siabie reprezientuje bend Chabor. U muzykaŭ vyjšaŭ tolki treci sinhł, ale, miarkujučy pa nabranaj chutkaści, spyniacca jany nie źbirajucca. Spadabajecca tym, chto lubić vyraznyja hitarnyja partyi i mieładyčny vakał.
Čytajcie taksama:
U Naviband vyjšaŭ novy biełaruskamoŭny albom «Adliha». Siarod piesień — duet z «Bi-2»
Jon byŭ pieršym biełarusam na «Jeŭrabačańni» i zorkaj, jakuju viedała ŭsia kraina — Michaił Finbierh