«Robiać darosły hołas, chłusiać pra mamu». Navošta minskim školnikam masava spatrebilisia ščaniuki?
Čytačka Onliner.by Anastasija sprabuje prystroić ščaniukoŭ ad zvyčajnaj dvarniažki. Jana raźmiaščaje abjavy na roznych anłajn-płatformach, i apošnim časam zaŭvažyła dziŭnuju zakanamiernaść: na paviedamleńni pačali masava adkazvać školniki z roznych rajonaŭ Minska. Dzieci vydajuć siabie za darosłych i prydumvajuć kazki.
— Spačatku mnie napisała žančyna i paprasiła pryvieźci ščaniukoŭ da škoły — skazała, što pracuje tam. Padazreńnie źjaviłasia, kali ja pasprabavała pieravieści razmovu z paviedamleńniaŭ na płatformie ŭ Viber. Pa numary vyśvietliłasia, što heta akaŭnt z padletkavaj avatarkaj i nikam «kavun» — nie vielmi padobna na školnuju nastaŭnicu, — raspaviadaje dziaŭčyna i prykładaje skrynšoty pierapiski.
U toj dzień Anastasija z mužam usio ž padjechali sa ščaniukami ŭ nazvanaje miesca, ale addavać ich kateharyčna admovilisia.
— Spačatku patencyjnaja «pakupnica» adkazała, što zatrymlivajecca na pracy, a ščaniukoŭ zabiaruć jaje dočki. Potym my zaŭvažyli dźviuch dziaŭčynak, što pisali niešta ŭ telefonie i šukali naš aŭtamabil. Adna ź ich urešcie pryznałasia, što jana i jość «kavun», ale pačała apraŭdvacca, što telefon — matčyn. Pryčynaj adsutnaści mamy jany nazvali liniejku ŭ škole, što ŭžo vyhladaje padazrona: byŭ viečar sierady — jakaja liniejka? I dziaŭčynki pastajanna błytalisia: nazyvali maci to nastaŭnicaj, to miedsiastroj.
Anastasija zapatrabavała prysutnaści darosłaha. Tady dziaŭčaty pryviali staršakłaśnika i pradstavili jaho jak paŭnaletniaha «brata-hukarežysiora». Pa słovach žančyny, usie troje sprabavali zabrać ščaniukoŭ z mašyny. Nie atrymałasia — Anastasija z mužam i sabakami źjechali dadomu.
U toj ža dzień jaje muž atrymaŭ jašče niekalki zapytaŭ ad padletkaŭ, ale vyrašyŭ nie adkazvać. Praź niekatory čas situacyja paŭtaryłasia.
— Źviarnuŭsia chłopiec, paprasiŭ padvieźci sabak na Kamiennuju Horku i skazaŭ, što zabiare ich jahony syn kala HC Green. Spačatku na zvanki nie adkazvaŭ, a potym ja ŭsio ž datelefanavałasia: adkazaŭ dziciačy hołas, jaki chtości vielmi staraŭsia zrabić darosłym. Kali ja zapytała naŭprost: «Navošta tabie ščaniuk, i ci viedaje pra heta mama?» — mianie zabłakavali.
Žurnalisty źviarnulisia da staršyni asacyjacyi zaaabarončych arhanizacyj Biełarusi Aksany Davydzienki, kab daviedacca jaje mierkavańnie.
— Pa-pieršaje, treba adznačyć, što Anastasija zrabiła ŭsio pravilna. U nas u krainie dziejničaje zabarona na prodaž žyvioł fizičnym asobam, jakija nie dasiahnuli 18-hadovaha ŭzrostu (padpunkt 2.2 art. 23). Skazać dakładna, navošta školnikam spatrebilisia ščaniuki, ciažka. U najhoršym vypadku — junyja «tyktokiery» ci «telehramščyki» chočuć zdymać niejkija ździeki z žyvioł dziela chajpu. Mnie ŭzhadvajecca žachlivaja historyja, jakaja adbyłasia niekalki hadoŭ tamu ŭ Biarozie. Miascovaja 15-hadovaja dziaŭčyna nazvała svoj kanał «Murka i Barsik pamruć» i pahražała zrabić strašnyja rečy sa svaimi katami, kali na kanał nie padpišucca peŭnaja kolkaść ludziej. Tady rasijskija zaaabaroncy zabili tryvohu, pačali rasśledavańnie i vyśvietlili, što dziaŭčyna — ź Biełarusi. Dalej užo raźbiralisia my i milicyja. Katoŭ, darečy, tady zabrali, a padletak raskajałasia ŭ zroblenym.
U vypadku z Anastasijaj situacyja, mahčyma, nie takaja dramatyčnaja, ale heta dobraja nahoda nahadać: u Biełarusi zabaroniena pieradavać žyvioł niepaŭnaletnim.