Biełarusy vykupili pad Minskam dzieviać učastkaŭ, kab žyć ciesnaj kampanijaj. Adno miesca jašče vakantnaje

Biełaruskaja architekturnaja studyja ZROBIM architects prezientavała svoj novy prajekt — ekałahičny mini-pasiołak na dzieviać damoŭ niedaloka ad Minska. Jaho fiškaj stała spałučeńnie etničnaha stylu (vysokija dachi, dranica) i sučasnaj architektury. Ale samaja cikavaja detal prajekta, badaj, toje, što pasiołak budujecca najpierš dla svaich — pa płanie ŭ im buduć žyć siabry i svajaki. Hetkaje pračytańnie chutara na novy ład.

Tak budzie vyhladać pasiołak źvierchu. Tut i dalej — skrynšoty ź jutub-kanała ZROBIM architects

Hieahrafična mini-pasiołak ad ZROBIM architects uzvodzicca ŭ vioscy Karpiłaŭka, što ŭ Łahojskim rajonie. Pobač — Kupałaŭski zapaviednik. Samo miesca prasiaknuta historyjaj: tak, u hetych krajach mieściłasia siadziba piśmieńnika Jadvihina Š., da jakoha ŭ hości pryjazdžaŭ Janka Kupała. Ličycca, što mienavita tam Kupała byŭ pierakanany ŭ tym, što varta pačać pisać pa-biełarusku.

«Heta miesca, jakoje my zadumali dla siabie i svaich siabroŭ, tamu tut šmat svabody i tvorčaści, u im my ŭvasobili svaje daŭnija idei pra toje, jak moža vyhladać chata ŭ sučasnym biełaruskim styli», — prezientuje prajekt studyja, jakaja vykupiła pad svaje mary dzieviać učastkaŭ, kožny — pamieram kala 12-14 sotak.

Admietna, što za piać chvilin jazdy ad hetaha miesca adzin z zasnavalnikaŭ ZROBIM architects Andruś Biezdar raniej užo pabudavaŭ sabie dom. I kali studyi prapanavali vykupić dzieviać učastkaŭ pobač, pazł skłaŭsia:

«Ja zaŭsiody maryŭ pra svoj pasiołak, mary musiać spraŭdžvacca. Ja prapanavaŭ vykupić ziamlu svaim svajakam, siabram, kab žyć razam. Miastečka budzie mieć nazvu «Naša Novaja Ziamla»», — kamientuje Biezdar, iranična adznačajučy, što razumieje, što paemu «Novaja ziamla» napisaŭ Jakub Kołas, a nie Janka Kupała.

Tutejšaja ziamla dla architektara enierhietyčna mocnaja nie tolki histaryčnymi cikavostkami, ale taksama tym, što mienavita tut, pad vialikim 600-hadovym dubam, jon zrabiŭ prapanovu budučaj žoncy.

Toj samy dub

Asnova damoŭ — lohkija stalnyja kanstrukcyi, jakija buduć zalivacca pienabietonam. Źniešnie ž jon budzie azdobleny drevam, u pryvatnaści, dranicaj, jak toje rabili našy prodki. Dziakujučy takomu rašeńniu zabudova budzie hladziecca ŭtulna, nie vybivajučysia z pryrodnaha łandšaftu. Miž inšym naŭprost z terytoryi miastečka ludzi zmohuć vyjści ŭ zapaviedny les ź piešymi ściežkami dla špacyroŭ.

U bolšaści damoŭ zapłanavanyja vysokija dachi z kominami i vialikimi voknami na ich — śviatła tut dakładna nie budzie mała. Nie abyducca budučyja haspadary i biez ułasnych saŭny z džakuzi.

Tut užo zrabili darohu, pa jakoj možna dajechać da ŭčastkaŭ na aŭto. Aciapleńnie płanujecca elektryčnaje: praz hod u damoŭ budzie ŭłasny ciepłavy punkt.

Na dziciačych placoŭkach zapłanavana zrabić mini-damki dla hulniaŭ dziaciej

Darečy, pakul prajekt stvaraŭsia, adzin z asnoŭnych ruchavikoŭ, jašče adzin zasnavalnik ZROBIM architects Alaksiej Karabloŭ pierajechaŭ u ZŠA, tamu jaho ŭčastak vyzvaliŭsia. Jon jaho ciapier pradaje.

«My šukajem čałavieka, jaki hatovy stać častkaj našaha kamjunici», — anansavaŭ Alaksiej. Kožny, chto maryć dałučycca da sfarmavanaj kampanii na chutary, moža napisać jamu — kantakty architektar pakinuŭ u videa.

Kamientary da artykuła