Kali vada chłynuła ŭ sałon, pačałasia panika. Stali viadomyja padrabiaznaści patapleńnia ekskursijnaha batyskafa z rasijanami ŭ Churhadzie
Papiaredniaja pryčyna katastrofy: sutyknieńnie batyskafa z ryfam. Paśla hetaha na borcie sudna adbyłasia razhiermietyzacyja i pačalisia panika dy ciskanina.
Ilustracyjny zdymak
Usiaho na łodcy znachodziłasia 45 turystaŭ z Rasii. Pa apošnich danych, 6 čałaviek zahinuli, siarod ich adno dzicia, 13 čałaviek trapili ŭ balnicu. Jašče dvaich čałaviek šukajuć — jany prapali bieź viestak.
Papiaredniaja pryčyna katastrofy: praz pamyłku kiravańnia adbyłosia sutyknieńnie batyskafa z ryfam.
Paśla ŭdaru ab ryf na borcie batyskafa pačałasia panika — vada chłynuła ŭ sałon, sudna stała tanuć, a ludzi sprabavali vybracca, piša SHOT.
Členam ekipaža ŭdałosia adkryć abodva vychady z batyskafa. Adnak mnohija nie zmahli svoječasova vybracca z vady: pačałasia mocnaja ciskanina i panika, baćki sprabavali vyratavać svaich dziaciej.
Niekatory čas batyskaf byŭ na pavierchni vady, ale pieraviernuty, a potym pajšoŭ na dno na hłybini kala 20 mietraŭ.
Pieršymi na dapamohu prypłyli turystyčnyja katary, jakija byli niepadalok. Hidy i inšyja turysty dapamahali dastavać napałochanych i dezaryjentavanych ludziej z vady. Usiaho na sušu dastavili 29 čałaviek. Na plaž pryjechali bolš za 20 chutkich. Paciarpiełych raźvieźli pa balnicach. 6 čałaviek vyratavać nie ŭdałosia, jašče 9 znachodziacca ŭ krytyčnym stanie.
Ekskursiju turysty kupili ŭ miascovaj kampanii Sharm El-Ghada Excursions, pajezdka pavinna była doŭžycca try hadziny.