Zarabiŭ, viarnuŭsia, pieramoh. Chto taki Frydrych Mierc, jaki stanie novym kancleram Hiermanii

Viartańnie zabytaha Mierca

U 2018 hodzie, kali Frydrych Mierc vyrašyŭ viarnucca ŭ vialikuju palityku i bałatavacca ŭ spadkajemcy Anhieły Mierkiel, jon ličyŭ darečnym u pačatku pres-kanfierencyi nahadać žurnalistam, što jaho proźvišča, choć i hučyć taksama, jak miesiac sakavik, pišacca pa-niamiecku inakš: Merz, a nie März.

Miž tym, usiaho za paŭtara dziesiacihodździ da hetaha Mierc byŭ adnoj ź viadučych fihur u apazicyjnym tady CHDS/CHSS i zmahaŭsia za lidarstva z Anhiełaj Mierkiel (urad płanujuć sfarmavać da Vialikadnia).

Zaraz, u 69 hadoŭ, Mierc narešcie dasiahnuŭ viaršyni ŭ niamieckaj palitycy: kali nie zdarycca ničoha nadzvyčajnaha, jon stanie novym kancleram Hiermanii.

Mierc, jaki šeść hadoŭ tamu viarnuŭsia ŭ palityku, kłasičny pravy libierał, jaki vystupaŭ za spraščeńnie padatkovaj sistemy i za abmiežavańnie imihracyi, adrazu staŭ samym papularnym kandydatam na pasadu naślednika Mierkiel siarod zvyčajnych členaŭ CHDS, ale partyjny isteblišmient dvojčy «prakatvaŭ» jaho na vybarach lidara.

Spačatku, u 2018 hodzie, lidaram partyi abrali staŭlenicu Mierkiel — Aniehret Kramp-Karenbaŭer, zatym, u 2021 hodzie, Armina Łašeta.

U 2021 hodzie hetyja bieskalarovyja dziejačy — razam ź Mierkiel, jakaja zastavałasia kancleram — daviali CHDS da parazy na vybarach, i partyja, narešcie, z treciaj sproby abrała lidaram Frydrycha Mierca.

Jakuju palityku budzie vieści Mierc, kali ŭznačalić urad Hiermanii?

Pierš za ŭsio, treba nahadać, što hetaja palityka budzie mocna zaležać ad damoŭlenaściej z budučymi partniorami pa ŭradavaj kaalicyi.

Pa-druhoje, zajavy palityka-apazicyjaniera i dziejańni taho ž palityka na dziaržaŭnaj pasadzie mohuć adroźnivacca i vielmi časta adroźnivajucca — pa roznych abjektyŭnych pryčynach.

Uličvajučy hetyja źmieny, varta aceńvać pohlady i zajavy budučaha novaha kanclera Hiermanii.

Rakiety dla Ukrainy

Za apošnija dva hady Mierc, budučy apazicyjanieram, krytykavaŭ Ołafa Šolca za nierašučaść u dapamozie Ukrainie i razam ź inšymi palitykami, nie z Sacyjał-demakratyčnaj partyi Šolca, zaklikaŭ dać Ukrainie rakiety Taurus.

U kastryčniku ŭ televizijnym intervju jon znoŭ skazaŭ, što na miescy Šolca daŭ by ŭkraincam hetyja rakiety — «ale nie prosta tak», a spačatku damoviŭšysia ź Vialikabrytanijaj i Francyjaj ab adzinaj palitycy adnosna rakiet i patrabujučy ad Pucina spynić udary pa ŭkrainskaj infrastruktury.

Pavialičyć

«Ja b skazaŭ tak: kali ŭdary nie spyniacca, to pieršym krokam budzie admiena limitu na dalokaść udaraŭ (ŭ hłybiniu terytoryi Rasii). A druhim krokam budzie pastaŭka Taurus. I tady niachaj Pucin vyrašaje, jak daloka jon choča zajści ŭ eskałacyi ŭ hetaj vajnie», — skazaŭ Mierc.

Vialikabrytanija i Francyja pastaŭlajuć Ukrainie kryłavyja rakiety Storm Shadow/SCALP, zajaŭlenaj dalokaściu da 250 km, a niamieckija kryłavyja rakiety Taurus majuć dalokaść da 500 km.

9 śniežnia Mierc druhi raz za vajnu pryjechaŭ u Kijeŭ i zapeŭniŭ prezidenta Zialenskaha, što pa-raniejšamu ŭsiebakova padtrymlivaje Ukrainu, a taksama paviedamiŭ, što prapanuje stvaryć novy sajuz najbujniejšych jeŭrapiejskich sajuźnikaŭ Ukrainy — abo, dla pačatku, chacia b kantaktnuju hrupu — kab vyrabić ahulny pohlad na budučy mir va Ukrainie.

U hetuju hrupu, miarkuje Mierc, mahli b uvajści Hiermanija, Francyja, Polšča i Vialikabrytanija.

Pry hetym Mierc imknuŭsia pakazać, što, zaklikajučy da miru, jon zusim nie žadaje, kab Ukraina va ŭsim sastupiła patrabavańniam pucinskaj Rasii.

«Vajna va Ukrainie pavinna skončycca jak maha chutčej. Pucin pojdzie na pieramovy, tolki kali Ukraina budzie zdolnaja abaraniacca», — zajaviŭ Mierc u Kijevie.

130 miljardaŭ na abaronu

Frydrych Mierc, jak i mnohija jeŭrapiejskija palityki, kaža, što Jeŭropa pavinna być hatova da izalacyjanisckaj palityki Donalda Trampa i ŭvohule zdolnaja abaranić siabie ad rasijskaj pahrozy. Ale jon, u adroźnieńnie ad mnohich, abiacaje chutka pavialičyć vajennyja vydatki.

Pavodle mierkavańnia lidara CHDS, vajennyja vydatki ŭ 2% ad VUP — daŭno ŭstalavany ŭ NATA narmatyŭ, da jakoha Hiermanija dabrałasia tolki ŭ hetym hodzie — heta zanadta mała, patrebna nie mienš za try pracenty, prytym u samy bližejšy čas.

Try pracenty VUP Hiermanii — heta, pa stanie na ciapier, prykładna 134 miljardy dalaraŭ abo 127 miljardaŭ jeŭra.

Rasija, kazaŭ Mierc u kastryčnikavym intervju, uzbrojvajecca takimi tempami, što zmoža napaści na krainu NATA praź piać—vosiem hadoŭ.

Začynić miažu dla nielehałaŭ

U pytańni ab imihracyi Frydrych Mierc vidavočna spadziavaŭsia adabrać hałasy ŭ hałoŭnaha supiernika, antyimihranckaj partyi «Alternatyva dla Hiermanii»: jon zaklikaje da rašučaha pavarotu ad palityki adkrytych dźviarej, jakuju pačała jaho papiarednica na pasadzie lidara CHDS — Anhieła Mierkiel, i jakuju praciahvaje ciapierašni ŭrad.

«Treba niešta rabić na miežach Hiermanii, i naša prapanova — pačać razvaročvać ludziej na miažy nieadkładna, nie adkładvajučy. My viedajem z 2015 hoda, što heta jurydyčna mahčyma, i ciapier, u 2024-m, my pavinny, narešcie, zasiarodzicca i zrabić heta», — kaža Mierc.

Pry hetym supracoŭničać i, tym bolš, stvarać uradavuju kaalicyju z «Alternatyvaj», jakaja zaniała na vybarach druhoje miesca paśla CHDS/CHSS, Mierc rašuča admaŭlajecca.

Pa vynikach vybaraŭ Miercu, davoli mahčyma, pryjdziecca farmiravać kaalicyju z sacyjalistami Šolca. U nulavyja hady Frydrych Mierc byŭ adnym z hałoŭnych prychilnikaŭ kancepcyi «Leitkultur» — «viadučaj kultury». Heta kancepcyja, u adroźnieńnie ad palityki multykulturalizmu, praduhledžvaje, što ŭ Hiermanii isnuje viadučaja kultura — niamieckaja, sa svaimi tradycyjnymi kaštoŭnaściami (u tym liku libieralnymi), i jana pavinna mieć pryjarytet pierad kulturami imihranckich supolnaściej.

Praz hod paśla sychodu Mierca z palityki Anhieła Mierkiel pryznała, što palityka multykulturalizmu ŭ Hiermanii pravaliłasia.

Bijahrafija i viartańnie ŭ palityku

Frydrych Mierc, juryst pa adukacyi, jašče 35 hadoŭ tamu, u 1989 hodzie, staŭ deputatam Jeŭraparłamienta ad CHDS, u jaki jon ustupiŭ jašče ŭ junactvie.

Piać hadoŭ paźniej, u 1994 hodzie, jon staŭ deputatam Bundestahu.

U 2000 hodzie, kali kancleram byŭ «siabar Pucina», sacyjalist Hierchard Šroder, a apazicyjny CHDS uznačaliŭ Edmund Štojbier, Mierca abrali staršynioj frakcyi ŭ Bundestahu.

Jaho tady ličyli adnym z samych vierahodnych naślednikaŭ Štojbiera, ale ŭ rešcie rešt baraćbu za hetu spadčynu vyjhrała Anhieła Mierkiel. Paśla novaj parazy sacyjalistaŭ na pazapłanavych vybarach 2002 hoda Mierkiel uznačaliła i partyju, i frakcyju, a Mierca adsunuła ŭ svaje namieśniki.

Bolš levaja, čym u Mierca, ideałohija Mierkiel urešcie pryniesła partyi pośpiech: u 2005 hodzie CHDS/CHSS pieramoh i viarnuŭsia va ŭładu. Mierc ža pastupova spyniŭ baraćbu za lidarstva i ŭ 2009 hodzie, u 55 hadoŭ, zusim syšoŭ z palityki — pracavać pa svajoj śpiecyjalnaści karparatyŭnaha jurysta.

Mierc byŭ daradcam i členam radaŭ dyrektaraŭ niekalkich bujnych kampanij i zaraz, jak miarkuje niamieckaja presa, źjaŭlajecca vielmi i vielmi zabiaśpiečanym čałaviekam.

U 2018 hodzie, kali 63-hadovaja Mierkiel abviaściła pra namier pajści na piensiju i dla pačatku pakinuć pasadu kiraŭnika partyi, 62-hadovy Mierc vyrašyŭ viarnucca i zaniać jaje miesca.

Heta ŭdałosia z treciaj sproby. Pry hetym siarod zvyčajnych členaŭ partyi Mierc niaspynna byŭ samym papularnym z kandydataŭ u lidary, ale dvojčy kiraŭnika partyi vybirali nie ŭsie členy CHDS, a delehaty partyjnaha schodu, i hety partyjny esteblišmient u pieršy raz prahałasavaŭ za vyłučanuju Anhiełaj Mierkiel Aniehret Kramp-Karenbaŭer, a kali jana nie spraviłasia i syšła, to vybraŭ joj na zamienu kiraŭnika ŭrada ziamli Paŭnočny Rejn — Viestfalija, Armina Łašeta.

Tolki paśla paražeńnia na vybarach Bundestaha vosieńniu 2021 hoda kiraŭnictva CHDS vyrašyła addać prava vybaru lidara ŭsim členam partyi — i tut Mierc vyjhraŭ u dvuch supiernikaŭ z razhromnym likam, sabraŭšy 62% hałasoŭ.

• 17
• 0
• 0
• 1
• 0
• 0
• 0
• 0