«Značyć, niešta nie tak z Kaardynacyjnaj radaj». Źlitaja stenahrama pakazvaje, jak rezka Cichanoŭskaja aceńvała dziejnaść KR

U telehram-kanale Ramana Pratasieviča źjaviłasia stenahrama sustrečy Śviatłany Cichanoŭskaj z pradstaŭnikami frakcyi «Biełarusy» ŭ Kaardynacyjnaj radzie. Asnoŭnaja dyskusija adbyłasia z Vadzimam Prakopjevym.

U dakumiencie niama nijakich paznak, kali kankretna heta adbyłosia. Ale sa źmiestu razmovy vynikaje, što paśla vybaraŭ treciaha składu Kaardynacyjnaj rady ŭ mai 2024 hoda. U toj čas Cichanoŭskaja pravodziła sustrečy z kožnaj frakcyjaj.

Jak jana adznačaje, hetyja sustrečy pakazali, što «va ŭsich roznaje razumieńnie taho, jak budzie arhanizavana rabota treciaha składu» i prosić, kab razmova išła mienavita ab Kaardynacyjnaj radzie.

Adkul u biełaruskich śpiecsłužbaŭ i ŭ Pratasieviča dakumient? Chutčej za ŭsio, z techniki aryštavanaha kalinoŭca Vasila Vieramiejčyka.

Navošta patrebna Kaardynacyjnaja rada

Na pačatku razmovy Vadzim Prakopjeŭ pacikaviŭsia ŭ Cichanoŭskaj, navošta joj Kaardynacyjnaja rada.

«Zadača Kaardynacyjnaj rady być patrebnaj nie mnie, a być patrebnaj ludziam, biełarusam. I ja liču, što adna z asnoŭnych zadač Kaardynacyjnaj rady, kab praź niekatory čas vašaj pracy, treciaha sklikańnia, u biełarusaŭ byŭ adkaz na pytańnie, navošta nam patrebna Kaardynacyjnaja rada. Na žal, paśla taho, jak byli abvieščany vybary, i hetyja pytańni palacieli z usich bakoŭ, adkazu nie znajšłosia. Dyk voś ciapier treba, kab jon znajšoŭsia», — adkazała Śviatłana Cichanoŭskaja.

Prakopjeŭ praciahnuŭ nastup: «Ja z vašaha adkazu zdahadvajusia, što vam asabista jana nie asabliva patrebnaja? Vy chacieli b, kab Kaardynacyjnaja rada tłumačyła biełarusam, navošta jana ŭvohule stvorana i navošta jana patrebna?»

U adkaz Cichanoŭskaja zaŭvažała, što taki pohlad — ułasnaja interpretacyja Prakopjeva. I dadała:

«Kaardynacyjnaja Rada patrebna dla stabilnaści demakratyčnych sił. Adnak kali za dva sklikańni ŭ ludziej usio jašče pytańnie, navošta patrebna Kaardynacyjnaja rada, značyć niešta nie tak z Kaardynacyjnaj radaj. (…)

Vydatnyja ludzi tam sabranyja. Jana nie stała strukturaj, jakaja ŭ razumieńni biełarusaŭ važnaja i nieabchodnaja. Voś Kaardynacyjnaja rada — ludzi i zadajuć pytańnie, a ŭ čym kaardynacyja».

Prakopjeŭ nie supakoiŭsia i pasprabavaŭ daviedacca, navošta mienavita Ofisu Cichanoŭskaj patrebna Kaardynacyjnaja rada:

«Jana vam uvohule zdałasia ci jana naadvarot pieraškoda vam?»

«Dla mianie Kaardynacyjnaja rada absalutna nie pieraškoda. (…) Ja chaču, kab Kaardynacyjnaja rada stała dapamohaj usioj struktury. (…) Dla mianie vielmi dziŭnaje hetaje pytańnie. Ja z samaha pačatku paŭtarała: ja chaču, kab u nas była mocnaja, samastojnaja Kaardynacyjnaja rada».

Ci mahčyma abjadnać dyjasparu

Pahadziŭšysia z takim mierkavańniem, Vadzim Prakopjeŭ pacikaviŭsia ŭ Cichanoŭskaj, ci bačyć jana nieabchodnaść u stvareńni ruchu, jaki b abjadnaŭ dyjaspary.

Cichanoŭskaja adznačyła, što bačyć moc u dyjaspary, adnak nie zusim razumieje, jak budzie realizoŭvacca ideja abjadnańnia biełarusaŭ za miažoju. Pa jaje nazirańniach, «čym dalej jany adjazdžajuć, tym bolš my hetych ludziej hublajem». U jakaści prykładu Cichanoŭskaja zhadała sustreču z pradstaŭnikami biełaruskaj dyjaspary ŭ adnoj z krain, jakaja jaje vielmi demaralizavała.

«Ja pryjazdžaju da ich, i jany havorać: voś, Śviatłana, u nas tut pašparty, u nas lehalizacyja, u nas tut takija składanaści. Havaru: dobra, ja tady niešta zmahu zrabić. A što vy zrabili da majho pryjezdu? Nu ničoha, u nas, viedajecie, smačnaja kava, smačnyja kruasany, nam tak dobra žyviecca. Typu, nu pryjedźcie, rašycie našy prablemy».

Cichanoŭskaja zapeŭniła Prakopjeva, što jana pieršaja paciśnie jamu ruku, kali jamu ŭdasca abjadnać dyjasparu. Toj u svaju čarhu staŭ raskazvać pra svaju ideju sabrać stadyjon i zaprašać pryjści na jaho Cichanoŭskuju.

Na pytańnie, navošta jaje prysutnaść, Prakopjeŭ zaŭvažyŭ, što arhanizataram patrebny łajn-ap (papiarednie zajaŭleny skład udzielnikaŭ).

«Prosta dla šou ja ŭdzielničać nie budu. Ale kali ŭ vas jość razumieńnie i vy mnie jaho pakažacie, jak budziecie z hetymi ludźmi pracavać potym, tady ja dałučusia. Ale mnie… dla adkryćcia… Vadzima Prakopjeva stadyjon nie patrebny. (…)

Vy ž u nas čałaviek-śviata, vy viedajecie, jak ładzić śviaty. Ale nam treba naładžvać rabotu hetych ludziej potym», — adkazała lidarka demakratyčnych sił Biełarusi.

Kolki idzie na biełaruskija miedyja

U dalejšaj razmovie Prakopjeŭ pasprabavaŭ daviedacca ličby finansavańnia biełaruskich demakratyčnych miedyja. Pa jaho słovach, na ich idzie suma ŭ niekalki razoŭ bolšaja za 5,5 miljona dalaraŭ, jakija atrymlivaje rasijski telekanał «Dožd́». Ale ŭ vyniku «i karcinka horšaja, i achop horšy».

«Sumy pad rukoj u vas niama? Tamu što ja nie viedaju jaje dakładna», — spytaŭ Prakopjeŭ.

«U mianie jaje nie toje što pad rukoj, ale jaje ŭ cełym niama. Ja nikoli nie bačyła sumy, jakija iduć na dapamohu. Nie pavinna mianie tyčycca», — adkazała Cichanoŭskaja.

Ci znachodziacca demakratyčnyja siły ŭ kryzisie?

U praciahu sustrečy Prakopjeŭ pacikaviŭsia ŭ Cichanoŭskaj, ci pahadžajecca jana ź mierkavańniem ekśpiertaŭ ab tym, što demakratyčnyja siły znachodziacca ŭ kryzisie.

«Kryzis budzie tolki tady, kali nie ekśpierty, a my sami, biełarusy, zrazumiejem, što my ŭ kryzisie. (…) Ja z hetym nie zhodnaja. (…) Tak, mienš uvahi. Ale mienš uvahi ad kaho? Ad biełarusaŭ. To heta naša z vami adkaznaść.

Čamu adzin pajšoŭ, ludzi vyjechali i pačali žyć svaim žyćciom? Zamiest taho, kab aktyŭna dalej pracavać. Ludzi ŭ turmach, jany nas čakajuć. Jany nie čakajuć ekśpiertaŭ, jakija pišuć, što my ŭ kryzisie. Jany čakajuć nas z vami. Kali my pryjdziem ich vyzvalim. Dyk voś, kali kožny nie voźmie na siabie adkaznaść, vyniku nijakaha nie budzie», — pastarałasia davieści svaju pazicyju Cichanoŭskaja.

• 47
• 0
• 10
• 12
• 0
• 1
• 0
• 1