Bresckija desantniki vypadkova apublikavali płan ideałahičnaj raboty na tydzień. Raspaviadajem, što tam

Dakumient źjaviŭsia ŭ kanale «Puł 38-j» u niadzielu, 30 sakavika, u 16:20 pa minskim časie i byŭ nieŭzabavie vydaleny. My paśpieli jaho zachavać i staranna vyvučyli.

Jak u čaści projdzie nastupnaja niadziela?

U 6:45 u štabie častki źbirajucca aficery i praparščyki, jakija kantralujuć rasparadak dnia. Tym časam sałdaty pračynajucca i śniedajuć.

Čas z 8:20 da 9:00 pryśviečany vychavaŭčaj pracy. Sałdaty hladziać filmy «Słužba bieź niebiaśpieki», «Špijon-telefon», «Nie na suviazi» i «Kredytka». Dalej pačynajecca «biahučaje infarmavańnie» i prahlad prahramy «Arsienał» — z 9:00 da 9:40.

A 10-j ranicy — pastrajeńnie bryhady, jakoje ŭklučaje ŭ siabie «ahitacyju vajskoŭcaŭ dla prachodžańnia słužby pa kantrakcie» i «prachodžańnie ŭračystym maršam». Zajmaje heta paŭhadziny, a paŭtarajecca nie mienš jak jašče trojčy za dzień.

Paśla hetaha paŭtary hadziny sałdaty trenirujucca vykonvać praktykavańni №12, 28 i 29, a taksama «paskorana ruchacca». Paralelna trenirujecca niaštatnaja rota hanarovaj varty.

Z 12-j hadziny sałdaty dvie hadziny hladziać patryjatyčnyja filmy i sustrakajucca z baćkami. Z 11 da 15 hadzinaŭ aficery sustrakajucca z baćkami tych, chto słužyć, i pravodziać ich apytańni. Z 14:30 da 15:00 sałdat pad rośpis znajomiać z zahadami Minabarony.

Z 15:00 da 15:30 sałdaty mohuć napisać listy. U 16:00 da ich prychodzić śviatar i pravodzić hadzinnuju hutarku ŭ kłubie pa «duchoŭna-maralnym vychavańni vajaroŭ». Paralelna na płacu dźvie hadziny pravodziać «zaniatak» z tymi, chto parušaŭ voinskuju dyściplinu, i dvuchhadzinny zaniatak z tymi, chto prapuściŭ płanavyja zaniatki pa ideałahičnaj padrychtoŭcy.

Dniom miž usimi zaniatkami možna schadzić u carkvu (z 11 da 19) i na poštu (z 11 da 16). Aficery z 16:30 da 17:50 chodziać pravieryć, jak tam chvoryja sałdaty.

Z 16:00 pa 18:40 «adpačynak» (kali paščaściła nie pajści da śviatara, nie parušyć dyscyplinu i nie prapuścić ideałahičny zaniatak u budni), možna navat paspać. Z 20:30 da 21:00 sałdaty hladziać naviny pa BT. Paśla 10-chvilinnaja sumiesnaja prahułka i son.

A jakaja ideałahičnaja rabota pravodzicca ciaham tydnia?

Jaje vielmi šmat, ale jana vartaja ŭvahi. Jana raźbitaja na niekalki častak dla roznych katehoryj vajskoŭcaŭ.

Jość praca, jakaja pravodzicca dla ŭsich. Štodzionna padčas viečarovych pravierak da vajskoŭcaŭ «davodziać pałažeńni pra adkaznaść za parušeńnie statutnych praviłaŭ znosinaŭ i zahadaŭ ministra abarony pra asudžeńnie vajskoŭcaŭ za ździejnienyja złačynstvy». Štotydzień pa piatnicach u čaści analizujuć toje, jak jašče palepšyć ideałahičnuju pracu. Pa paniadziełkach, sieradach i piatnicach z 16:00 da 18:00 možna schadzić da staršaha aficera-psichołaha.

Paniadziełak, 7 krasavika, davoli nasyčany. Zranku aficeraŭ i praparščykaŭ z 9-j ranicy čakaje paŭhadzinnaja «pravavaja hadzina», dzie im raskažuć, jak karajuć za pravaparušeńni i pakažuć prykłady pakarańnia za ich.

Z 10:30 da 12:20 projduć ideałahičnyja mierapryjemstvy dla ŭsich. Pakul aficery i praparščyki buduć słuchać lekcyju pra toje, jak važna padtrymlivać dyściplinu, sałdaty buduć słuchać pra hienacyd biełaruskaha naroda (hadzina — lekcyja, hadzina — abmierkavańnie).

Z 16:00 da 16:50 aficery pasłuchajuć lekcyju pra vajennuju daktrynu Biełarusi. U 17:00 pačniecca dziesiacichvilinka, dzie sałdatam raskažuć naviny ŭ Biełarusi i za miažoj i «prademanstrujuć materyjał, nakiravany na prafiłaktyku supraćpraŭnych pavodzinaŭ». Paśla hetaha, u 17:10, pačniecca 40-chvilinnaja lekcyja pra toje, što byvaje za vajskovyja złačynstvy i toje, jak za ich karajuć (na prykładach).

Nastupnyja mierapryjemstvy zapłanavanyja na sieradu, 9-ha krasavika. U hety dzień z 17:00 sałdatam spačatku raskažuć pra toje, što narkamanija — heta drenna. Praź dziesiać chvilinaŭ pačniecca 40-chvilinny ahulny schod pa troch temach:

• słužba ŭ vojsku — jaskravaja staronka tvajoj bijahrafii;
• jakasnaje absłuhoŭvańnie i ekspłuatacyja techniki — abaviazak kožnaha voina;
• abmierkavańnie stanu ŭnutrykalektyŭnych znosinaŭ, daviadzieńnie infarmacyi pra fakty niestatutnych adnosin i adkaznaści, praduhledžanaj KK RB za ich.

10 krasavika čakajecca dva mierapryjemstvy. Sałdaty i siaržanty, ale tolki kantraktniki, z 15:00 50 chvilin buduć hladzieć «prafiłaktyčnyja filmy»: «Padzieńnie», «Raskajańnie za kalučym drotam», «Ab asudžeńni šerahoŭca Vasina».

Aficery, praparščyki i hramadzianski piersanał tym časam daviedajucca pra padziei ŭ Biełarusi i śviecie, a taksama aktualnyja pytańni słužbovaj dziejnaści. Pakažuć im i materyjały, nakiravanyja na prafiłaktyku supraćpraŭdnaj dziejnaści ad Ministerstva abarony.

U piatnicu, 11 krasavika, usich z 16:00 čakaje padviadzieńnie tydniovych vynikaŭ: bajavoj padrychtoŭki, dyscypliny, słužby ŭvohule, avaryjnaści, unutranaj słužby ŭ parkach, stanu tyłu i hetak dalej. Paśla, z 16:40, sałdat čakaje 10-chvilinnaja lekcyja pra toje, što takoje vajskovaje złačynstva i jak za ich karajuć. 

Z 17:00 aficeram, praparščykam i ŭsich kantraktnikam paŭhadziny buduć raspaviadać pra toje, jakija zdarylisia pravaparušeńni, prainstruktujuć na vychodnyja i pakažuć videa pra škodnaść ałkaholu i narkotykaŭ.

U niadzielu, 13 krasavika, z 8:20 za 9:00 sałdaty pahladziać filmy «Padzieńnie», «Raskajańnie za kalučym drotam», «Ab asudžeńni šerahoŭca Vasina». Paśla — 10-chvilinny ahlad navinaŭ i prafiłaktyčnyja materyjały ad Ministerstva abarony.

Z 16:00 sałdat čakaje 50-chvilinnaja biasieda sa śviatarom, ale tolki dla tych, chto byŭ na ŭsich zaniatkach, bo z tymi, chto adsutničaŭ na ideałahičnych zaniatkach, u hety čas płanujucca dadatkovyja zaniatki.

Taksama płanujecca «prahlad patryjatyčnych filmaŭ» i «arhanizacyja kultpachoda ŭ muziej, kinateatr ci histaryčnaje miesca ŭ Breście», ale čas jašče nie vyznačany.

Da niadzieli treba raźmiaścić u miascovaj presie infarmacyju pra vajskoŭcaŭ, jakija «sumlenna vykonvajuć voinski doŭh», sučasnych vajskovych siłach abo vieteranach Druhoj suśvietnaj.

Ułasna, płany vy možacie pahladzieć tut: niadzielny i na ŭvieś tydzień.

A chto adkazny za stvareńnie dakumienta?

Płan uzhadniajecca ź pieršym namieśnikam kamandzira čaści, načalnikam štaba bryhady. Ciapier hetuju pasadu zajmaje padpałkoŭnik Ivan Dzienisienka, jaki niadaŭna pajšoŭ na pavyšeńnie. Raniej jon uznačalvaŭ asobny desantna-šturmavy bataljon. Pa źviestkach «Bajpoła», Ivan Dzienisienka — amatar pahaniać, maje bolš za 10 štrafaŭ za parušeńnie praviłaŭ darožnaha ruchu.

Pavialičyć

Ale admietny jon nie hetym. Jahony baćka — kamandzir siłaŭ śpiecyjalnych apieracyj hienierał Vadzim Dzienisienka. 

Pavialičyć

Zaćviardžaje dakumient načalnik čaści. Im letaś staŭ pałkoŭnik Valeryj Bułyha. Jahony były načalnik, Dźmitryj Koršunaŭ, pajšoŭ vučycca — zaličany słuchačom apieratyŭna-stratehičnaha ŭzroŭnia 1 kursa Vajennaj akademii Hienštaba ŭzbrojenych siłaŭ Rasii.

Pavialičyć

Sam dakumient stvaryŭ padpałkoŭnik Jaŭhien Procharaŭ. Takoha čałavieka huhł amal nie viedaje, ale ciapier jon vykonvaje abaviazki namieśnika kamandzira pa ideałahičnaj rabocie ŭ čaści.

Pavialičyć

Što stałasia ź minułym kiraŭnikom pa ideałohii Siarhiejem Suchaviłam — niezrazumieła, ale mienavita jahony podpis patrebny na tydniovych płanach ideałahičnaj raboty (prynamsi, taki šabłon). Mienavita jon u 2023 hodzie kazaŭ žurnalistam NBC News, što budzie «hryźci voraha», kali toj pryjdzie ŭ Biełaruś.

Pavialičyć

Stvaraje tydniovy płan major Dźmitryj Bialecki. Ciapier jon staršy aficer ideałahičnaj raboty, raniej zajmaŭ pasadu kamandzira źmiašanaha artyleryjskaha dyvizijona pa ideałahičnaj rabocie. Pa źviestkach «Biełpoła», mienavita jon viadzie kanał asobnaj 38-j bryhady, u jaki i byŭ vykładzieny dakumient. Taksama jon aktyvist BRSM i byŭ delehatam ad Brestčyny na łukašenkaŭskim UNS letaś.

Pavialičyć

• 0
• 2
• 12
• 21
• 0
• 0
• 3
• 0