«Dazvoliŭ sabie hańbić BRSM, vinu pryznaju». Jurfak BDU apublikavaŭ videa sa studentam na manier HUBAZiKa
Jurydyčny fakultet BDU pieraniaŭ praktyku siłavikoŭ i staŭ zapisvać videa sa studentami, dzie prymušaje ich vybačacca.
Takoje videa jurfak apublikavaŭ u storyz svajho instahram-akaŭnta.
U im student-treciakurśnik na fonie emblemy BDU i vyjavy Fiemidy vybačajecca pierad administracyjaj fakulteta i BRSM.
«Ja, student treciaha kursa BDU, dazvalaŭ sabie raspaŭsiudžvać źviestki, jakija dyskredytavali administracyju jurydyčnaha fakulteta, a taksama źviestki, jakija hańbiać BRSM jurydyčnaha fakulteta. Svaju vinu całkam pryznaju, kajusia. Na asnovie svaich pamyłak rekamienduju moładzi pilna sačyć, što, kamu, dzie i ŭ jakoj situacyi jany havorać, a taksama pracavać na karyść svajoj krainy», — ahučvaje ŭ videa student tekst, jaki, vidavočna, jaho prymusili skazać.
Jurydyčnaja supolnaść adreahavała na takoje parušeńnie pravoŭ.
Ekśpiertka ŭ halinie mižnarodnaha prava i pravoŭ čałavieka Kaciaryna Dejkała zaŭvažaje: paradaksalna, što mienavita jurfak, dzie pavinny byli b vučyć pavažać pravy, pieraniaŭ takuju praktyku.
«Źviarnicie ŭvahu (i heta samaje strašnaje), što robiać heta moładzievyja arhanizacyi fakulteta. Nie HUBAZiK, nie kadebešniki, a moładzievyja arhanizacyi fakulteta, jakija navat nie saromiejucca stavić svaje tehi: studsajuz jurfaka, studencki prafsajuz i BRSM.
U chłopcaŭ — budučych jurystaŭ — navat nie chapaje kiemlivaści, kab zrazumieć, što heta ŭsio — dokazy, jakija fiksujucca. U kamsamolskim zapale tak chočacca adznačycca: my nasrali i napisali horda «heta zrabili my»!
Nu i nahadaju, što mienavita parušajecca takim videa: svaboda ad źnievažalnaha hodnaść zvarotu, svaboda vykazvańnia mierkavańnia, prava na nieŭmiašańnie ŭ asabistaje žyćcio i prava na adukacyju (u častcy stvareńnia spryjalnaj atmaśfiery biez abraz i prynižeńnia hodnaści ŭ adukacyjnaj ustanovie)», — prakamientavała ŭ fejsbuku Kaciaryna Dejkała.
Na toje, što hetym videa fakultet parušaje zakon, źviartaje ŭvahu i advakatka Maryja Kolesava-Hudzilina.
«Prymus da ŭdziełu ŭ takich rolikach parušaje svabodu vykazvańnia mierkavańniaŭ. Heta pramoje parušeńnie prezumpcyi nievinavataści, kali čałaviek vymušany ŭ niepracesualnaj formie pryznavacca ŭ ździajśnieńni zabaronienych dziejańniaŭ.
Takoje videa parušaje prava nie padviarhacca žorstkamu, biesčałaviečnamu i źnievažalnamu abychodžańniu abo katavańniam.
Ja ŭpeŭniena, što tych, chto prymušaje zdymacca ŭ padobnych videa, možna pryciahnuć da adkaznaści. Heta traplaje pad kvalifikacyju art. 426 Kryminalnaha kodeksa (złačynstva suprać čałaviečnaści, jakoje ździajśniajecca pradstaŭnikom dziaržavy)»,
— padkreślivaje Kolesava-Hudzilina.
«Naša Niva» — bastyjon biełaruščyny
PADTRYMAĆCiapier čytajuć
Fiodar Viktaravič i «Viktar Fiodaravič». Supracoŭnik «Varhiejminha» maje pašpart prykryćcia. Jaho žonka Volha Siamaška — viadomaja žurnalistka54
Kamientary