U najbližejšy čas stan spraŭ u žyviołahadoŭli stanie temaj vyjaznoha respublikanskaha sieminara-narady. A siońniašniaje mierapryjemstva — adzin ź pieršych krokaŭ pa padrychtoŭcy takoha sieminara, paviedamlaje jahonaja pres-słužba.
«Praź śpiecyfiku najaŭnych prablem u śvinahadoŭli my siońnia asobna razhledzim situacyju ŭ hetym važnym napramku APK, jakoje daje čverć ad ahulnaha abjomu vytvorčaści miasa [ŭ krainie], — skazaŭ Łukašenka. — Pa vynikach pracy apošnich dvuch hadoŭ tut adznačajecca admoŭnaja dynamika, što vyklikaje ŭ mianie (spadziajusia, i va ŭsich u vas) vialikuju zaniepakojenaść. Heta pryviało da taho, što pytańnie pryjšłosia vynosić na samy vysoki ŭzrovień», — skazaŭ Łukašenka.
Jon taksama zaŭvažyŭ, što vytvorčaść (vyroščvańnie) śviniej za dva hady źniziłasia amal na 12%. Atrymanyja abjomy da zapłanavanych u dziaržprahramie «Ahrarny biznes» na 2021—2025 hady navat nie nablizilisia, a, chutčej, naadvarot. Skaračeńnie vytvorčaści nazirajecca va ŭsich abłaściach, a na Homielščynie — naohuł u dva razy.
Pahałoŭje śviniej pamienšała bolš čym na 11%, abo na 290 tysiač hałoŭ. Najbolšaje źnižeńnie adznačajecca ŭ Homielskaj i Minskaj abłaściach.
Padziež śviniej pavialičyŭsia praktyčna ŭ kožnym druhim rajonie krainy. Kolkaść prypłodu parsiučkoŭ skaraciłasia na 8%.
«Na fonie pravalnych minułych hadoŭ u hetym hodzie ŭ cełym pa respublicy zruchi ŭ adnaŭleńni pahałoŭja i abjomaŭ vytvorčaści (vyroščvańnia) śviniej možna paznačyć jak niaznačnyja, — skazaŭ Łukašenka. — Heta značyć pryrost jość, ale heta na ŭzroŭni aryfmietyčnaj chibnaści».
Adpaviednyja miery prymajucca, adnak pamorak śviniej pa-raniejšamu raście va ŭsich abłaściach, akramia Hrodzienskaj i Minskaj. Źmienšyłasia kolkaść parsiučkoŭ za košt źnižeńnia prypłodu na Viciebščynie i Minščynie. Źnižajucca pakazčyki efiektyŭnaści, raście kolkaść stratnych arhanizacyj, jakija zajmajucca śvinahadoŭlaj, paznačyŭ prablemnyja momanty Alaksandr Łukašenka.
Pryčyny situacyi, jakaja skłałasia, lažać na pavierchni. Na ich i ŭkazaŭ Łukašenka — heta hrubyja parušeńni bijałahičnaj abarony kompleksaŭ: niedastatkovaja rabota pa baraćbie z hryzunami i ptuškami, praviadzieńni dezynfiekcyi, zabieśpiačeńni śpiecadzieńniem. Adznačajucca prablemy z ulikam śviniej, fakty prypisak i ŭtojvańnia padziažu.
U vyniku patrabavańni Łukašenki ab adnaŭleńni pahałoŭja śviniej i abjomaŭ vytvorčaści śvininy da ŭzroŭniu 2012 hoda, ahučanyja jašče ŭ 2014 hodzie, niavykananyja dahetul.
«Davajcie raźbiaromsia, u čym pryčyna. Dzie parušajucca technałohii? Dzie nie realizujucca sanitarnyja mierapryjemstvy? Dzie ŭpłyvaje ŭsim viadomy čałaviečy faktar?» — źviarnuŭsia Alaksandr Łukašenka da ŭdzielnikaŭ narady.
Kamientary