Ułady znajšli sposab zabiaśpiečać nasielnictva ajčynnaj śvininaj. Voś płan
Pabudujuć čatyry śvinahadoŭčyja kompleksy na 100 tysiač hałoŭ kožny, a taksama vosiem mienšych. Adnak plemiannych śviniej, mahčyma, kupiać na Zachadzie.
Paśla taho, jak epidemija «śvinoha hrypu» ŭ 2013-2014 vykasiła śvinahadoŭčyja kompleksy Biełarusi, kraina ŭsio nijak nie moža viarnucca ad raniejšaha ŭzroŭniu vytvorčaści śvininy.
Takuju vysnovu možna zrabić, kali aznajomicca sa źmiestam dakumienta, jaki «Naša Niva» atrymała ad «Biełpoła».
«Dakład pa pytańni ab raspracoŭcy na 10-hadovuju pierśpiektyvu stratehii raźvićcia ŭltrasučasnaj śvinahadoŭli» byŭ nakiravany ŭradam na imia Alaksandra Łukašenki ŭ listapadzie 2024 hoda.
U dakumiencie za podpisam vice-premjera Juryja Šulejki śćviardžajecca, što zapatrabavanaść rynku ŭ śvininie składaje kala 500-520 tysiač ton u žyvoj vazie na hod. Na siońnia zabiaśpiečvajecca tolki 84%. Astatniaje impartujecca. Tak, u minułym hodzie svaich śviniej było vyhadavana ahulnaj vahoju 424 tysiačy ton (dla paraŭnańnia, u 2012 hodzie było 472,5 tysiač ton), jašče 76 tysiač ton zakupili za miažoj.
Čynoŭniki paviedamlajuć ab tym, što za apošnija dziesiać hadoŭ u krainie ŭviedziena ŭ ekspłuatacyju 29 novych śvinahadoŭčych kompleksaŭ ahulnaj mahutnaściu 1,2 miljona hałoŭ. Jany pastaŭlajuć krainie 147 tysiač ton śvininy ŭ žyvoj vazie, što składaje tracinu ŭsiaho abjomu vytvorčaści.
Usiaho ŭ krainie, pa słovach čynoŭnikaŭ, naličvajecca kala 100 śvinahadoŭčych kompleksaŭ, adnak jany staryja, tamu majuć nizkija pakazčyki vytvorčaści i nie mohuć zabiaśpiečyć kankurentnazdolnuju vytvorčaść śvininy.
Što prydumali čynoŭniki?
Pabudavać dadatkovyja novyja kompleksy. Čatyry (da 2027 hoda) na 100 tysiač hałoŭ śviniej kožny i 8 mienšych (da 2030-ha) — na 24-50 tysiač hałoŭ.
Spačatku płanavałasia, što ŭsie čatyry bujnyja kompleksy źjaviacca ŭ Mahiloŭskaj vobłaści ŭ sielhaspradpryjemstvach, jakija faktyčna paviesili na Biełaruskuju nacyjanalnuju bijatechnałahičnuju karparacyju (BNBK), jakaja šukaje sposaby ajčynnaj vytvorčaści vysokapraduktyŭnych, zbałansavanych kambikarmoŭ. Prajekt adpaviednaha ŭkaza Łukašenki byŭ raspracavany ŭ lutym 2024 hoda.
Adnak niešta pajšło nie tak. I ŭžo ŭ červieni, «uličvajučy niezdavalniajučyja vyniki raboty» BNBK, było vyrašana ad idei admovicca, a haspadarki viarnuć pad kantrol miascovych uład.
Ciapier śvinahadoŭčyja kompleksy na 100 tysiač hałoŭ pavinny źjavicca ŭ Bresckaj (AAT «Biełaviežski»), Viciebskaj (AAT «Aršanski»), Minskaj (AAT «Barysaŭski kambinat chlebapraduktaŭ») i Mahiloŭskaj (AAT «Babrujski miasakambinat») abłaściach. Kambikorm dla śviniej pavinna budzie pastavić BNBK.
Finansavać budaŭnictva płanujuć za košt biudžetnych kredytaŭ. Miescy raźmiaščeńnia vaśmi mienšych kompleksaŭ u dakumiencie nie nazyvajucca. Adznačajecca tolki, što ich pabudujuć u druhi etap. Heta źviazana z «abmiežavańniem finansavych resursaŭ i vytvorčaha patencyjału budaŭničaj haliny».
Čynoŭniki zapeŭnivajuć, što, kali pabudujuć usie 12 kompleksaŭ, kraina zmoža zabiaśpiečyć vytvorčaść dadatkova 80 tysiač ton śvininy ŭ žyvoj vazie, jakoj joj nie chapaje.
Urad paviedamlaje Łukašenku, što źbirajecca kamplektavać novyja śvinakompleksy pieravažna za košt śviniej ź plemiannych pradpryjemstvaŭ krainy. Jak vynikaje z dakumienta, paralelna vučonyja zajmajucca vyviadzieńniem ajčynnych śviniej miasnych i kambinavanych parod, a taksama raspracoŭkaj racyjonaŭ, jakija b dazvolili atrymać 900 hramaŭ pryvahi (ciapier na novych kompleksach jana składaje 700 hram).
Voś tolki kompleksy pavinny pabudavać da 2030 hoda, a pracy pa vyviadzieńni novych parod i raspracoŭcy novych karmoŭ, zhodna sa stratehijaj, praciahnucca da 2034 hoda. Prynamsi, na taki pieryjad jana raźličana.
Chiba što ŭrad nie vielmi vieryć u navukoŭcaŭ, bo paviedamlaje Łukašenku ab tym, što «ŭ vypadku nieabchodnaści buduć arhanizavany impartnyja pastaŭki z krain Zachodniaj Jeŭropy i Rasii».
Nakolki płany buduć paśpiachovymi, pakaža žyćcio. Pakul što, jak pišuć sami čynoŭniki, kolkaść śviniej u paraŭnańni ź minułym hodam źniziłasia na 182 tysiačy hadoŭ i skłała 92,3% da letašniaha ŭzroŭniu.
Kamientary