Pastaŭki iduć praz kampanii-pasiaredniki z Kazachstanu, Kyrhyzstanu, Turcyi i Kitaja.
«Sankcyjonka — nie prablema». Heta słovy pradstaŭnika adnoj z kampanijaŭ-prakładak, praź jakija ŭ Biełaruś iduć zabaronienyja kamplektujučyja dla zavodu «Intehrał». Pradukcyju hetaha pradpryjemstva vykarystoŭvaje rasiejskaja vajskovaja pramysłovaść dla stvareńnia rakietaŭ i vysokadakładnaha ŭzbrajeńnia.
BRC razabraŭsia, čamu jano ŭsio jašče «vyrablajecca, lotaje, zabivaje».
Materyjał padrychtavany pry padtrymcy mižnarodnaha Centru pa daśledavańni karupcyi i arhanizavanaj złačynnaści OCCRP.
Zachodnija sankcyi pavinnyja byli spynić dostup Rasiei da technałohijaŭ i materyjałaŭ, nieabchodnych dla vytvorčaści rakietaŭ i vysokadakładnaha ŭzbrajeńnia. U listapadzie 2022 hoda ministr abarony Ukrainy Alaksiej Reźnikaŭ paviedamiŭ, što ŭ Kramla zastałosia 119 rakietaŭ «Iskandier» z 900, jakija byli ŭ najaŭnaści na pačatak poŭnamaštabnaj vajny. Kolkaść inšych vysokadakładnych rakietaŭ taksama źmienšyłasia.
Praz dva hady, u śniežni 2024-ha, pradstaŭnik Hałoŭnaha ŭpraŭleńnia vyviedki Minabarony Ukrainy Andrej Jusaŭ zajaviŭ, što kolkaść rakietaŭ, vyrab jakich «krytyčna zaležyć ad zamiežnych kampanientaŭ», u Rasiei pavialičyłasia. Niahledziačy na rehularnyja abstreły. Pavodle jaho, Rasieja štomiesiac vyrablaje da 50 novych kompleksaŭ «Iskandier», a taksama naroščvaje zapasy inšych typaŭ rakietaŭ.
Jak pakazała rasśledavańnie BRC, Biełaruś maje da hetaha niepasrednaje dačynieńnie.
Čamu rakiety nie zakančvajucca?
U kastryčniku 2022 hoda Alaksandr Łukašenka, vystupajučy paśla sustrečy z Uładzimiram Pucinym, paćvierdziŭ vostruju patrebu RF u mikraschiemach:
«Na apošnich pieramovach prezident Rasiei zajaviŭ: my hatovyja płacić lubyja hrošy za pradukt mikraelektroniki».
Praz hod ukrainski admysłoviec u halinie elektroniki i ŭzbrajeńniaŭ Siarhiej Biaskresnaŭ z pazyŭnym «Fłeš» apublikavaŭ u svaim telehram-kanale fotazdymki bartavoha vyličalnaha modula «Zaria-61M», jaki vykarystoŭvajecca ŭ rasiejskich rakietach. Heta pryłada, jakaja vykonvaje funkcyi kiravańnia, składajecca z čatyroch asnoŭnych płataŭ.
«Tak, usio maralna sastarełaje. Tak, vialikaje. Ale, na žal, całkam z kamplektujučych RF. Vyrablajecca, lotaje, zabivaje», — napisaŭ jon.
BRC vyvučyŭ apublikavanyja Biaskresnavym fotazdymki płataŭ i vyśvietliŭ, što nie ŭsia elektronika ŭ pryładzie rasiejskaj vytvorčaści. Na šerahu mikraschiemaŭ bačny łahatyp u formie małanki ci rasiejskaj litary «i». Heta tavarny znak biełaruskaha dziaržaŭnaha pradpryjemstva «Intehrał» (poŭnaja nazva AAT «Intehrał» — kirujučaja kampanija chołdynhu «Intehrał»).
Vykarystańnie mikraschiemaŭ «Intehrała» ŭ rasiejskim uzbrajeńni taksama paćviardžajuć materyjały ŭkrainskaha ekśpierta, vajskoŭca Uzbrojenych siłaŭ Ukrainy, jaki pažadaŭ zastacca ananimnym. U videabłohu na YouTube jon demanstruje hetyja kampanienty ŭ rakietach R-37, Ch-59M2A, S-300, Ch-101 i «Iskandier». U kamientary dla BRC jon udakładniŭ, što ŭ dvuch apošnich pałova mikraschiemaŭ zroblenaja na «Intehrale». Častka ź ich, jak bačna na fotazdymkach, była vypuščanaja ŭ 2023 hodzie.
Vykarystańnie zroblenych na «Intehrale» kamplektujučych u rasiejskich rakietnych kompleksach taksama paćvierdzili BRC u Słužbie biaśpieki Ukrainy. «Padčas vyvučeńnia abłomkaŭ rasiejskaj rakiety sa składu rakietnaha kompleksu «Kalibr» śledčymi Słužby biaśpieki było ŭstanoŭlena, što ŭ jaje składzie vykarystoŭvajucca mikraschiemy, vyrablenyja na mahutnaściach zapytanaha vami pradpryjemstva», — adznačyli va ŭkrainskim viedamstvie.
To bok Rasieja moža praciahvać rakietnyja abstreły Ukrainy ŭ tym liku dziakujučy pastaŭkam ź Biełarusi. Ahułam, pa najaŭnych u rasparadžeńni BRC mytnych dadzienych, z sakavika 2022 pa červień 2024 hoda «Intehrał» pastaviŭ u Rasieju bolš za 6 młn mikraschiemaŭ na bolš jak $130 młn. Dziela paraŭnańnia: ahulny abjom pastavak biełaruskich mikraschiemaŭ u RF za hety čas skłaŭ krychu bolš za $165 młn. Heta značyć, što «Intehrał» zabiaśpiečyŭ 80% ad ich.
Z pačatku poŭnamaštabnaj vajny va Ukrainie dachody «Intehrała» mocna vyraśli. U 2023 hodzie čysty prybytak pradpryjemstva pavialičyŭsia bolš čym u 11 razoŭ u paraŭnańni z 2022 hodam — amal da 150 młn biełaruskich rubloŭ (kala $50 młn). Heta ŭ 40 razoŭ bolš, čym prybytak «Intehrała» ŭ 2021-m. Dadzienych za 2024 hod u adkrytym dostupie na momant publikacyi niama.
Klijenty z rasiejskaha VPK
BRC praanalizavaŭ pastaŭki «Intehrała» z sakavika 2022 da lipienia 2024 hoda. Najbujniejšym rasiejskim pakupnikom jaho mikraschiemaŭ za hety pieryjad źjaŭlajecca smalenskaja kampanija AT «Intiehrał-Zapad». Jana nabyła pradukcyi na $31,3 młn. Choć pradpryjemstva nie maje niepasrednaj suviazi ź biełaruskim «Intehrałam», jano naležyć hramadzianinu Biełarusi. Da lipienia 2022 hoda na sajcie kampanii paviedamlałasia ab jaje supracy ź Ministerstvam abarony Rasiei. Na momant publikacyi našaha rasśledavańnia sajt znachodzicca na rekanstrukcyi.
Druhaja pa abjomie zakupak — rasiejskaja kampanija AT «Śpiec-Elektronkomplekt», jakaja nabyła ŭ «Intehrała» mikraschiemaŭ na $30 młn. Na jaje sajcie adsutničaje infarmacyja ab suviaziach z abaronnaj pramysłovaściu. Adnak partnior kampanii, bujny rasiejski vytvorca mikraschiemaŭ AT «Anhstriem», na svaim sajcie paznačaje, što «Śpiec-Elektronkomplekt» u 1998 hodzie atrymaŭ atestacyju Ministerstva abarony RF i siertyfikat №1 «Druhoha Pastaŭščyka» (aficyjnaje pryznańnie nadziejnym pastaŭščykom VPK).
Jašče adnym bujnym pakupnikom źjaŭlajecca daččynaja kampanija biełaruskaha «Intehrała» ŭ Sankt-Pieciarburzie — BP AT «Intiehrał SPb». Jana zakupiła mikraschiemaŭ na $16,8 młn. Hienieralny dyrektar kampanii Uładzimir Łazoŭski adkryta zajaŭlaŭ, što vajskova-pramysłovy kompleks Rasiei zjaŭlajecca adnym ź jaje klučavych klijentaŭ. U 2021 hodzie pradpryjemstva atrymała siertyfikat adpaviednaści ad sistemy «Oboronsiertifika», a paśla pačatku poŭnamaštabnaj vajny trapiła pad sankcyi Jeŭraźviazu.
Akramia pieraličanych vyšej, «Intehrał» pastaŭlaŭ pradukcyju rasiejskim kampanijam AT «EKB Innovacionnyje tiechnołohii», jakaja zakupiła mikraschiemaŭ na $16,7 młn, TAA «Don», jakaja nabyła pradukcyi na $9,5 młn, i AT «Radiant-EK», jakaja zakupiła mikraschiemaŭ na $5,3 młn. Hetyja kampanii taksama źviazanyja z rasiejskaj abaronnaj pramysłovaściu.
Zachodniaje abstalavańnie
Jak bačna ź siužetaŭ biełaruskich i rasiejskich dziaržaŭnych telekanałaŭ 2024 hoda, na «Intehrale» vykarystoŭvajuć zachodniaje abstalavańnie. Na kadrach pakazanyja, naprykład, niamieckija mikraskopy Axiotron Carl Zeiss AG dla kantrolu jakaści mikraschiemaŭ, šviejcarskija kłapany VAT Vakuumventile AG i brytanskija vakuumnyja sistemy Edwards, nieabchodnyja dla padtrymańnia sterylnaści ŭ vytvorčych pracesach.
Taksama možna pabačyć japonskija režučyja ŭstanoŭki DISCO Corporation, jakija zabiaśpiečvajuć padzieł paŭpravadnikovych płaścinaŭ z dakładnaściu da mikronu, i abstalavańnie HORIBA dla analizu materyjałaŭ. Aproč hetaha pakazanyja amierykanskija sistemy testavańnia Cascade Microtech (FormFactor), jakija dazvalajuć praviarać pracazdolnaść mikraschiemaŭ da ich zborki.
Pra toje, što «Intehrał» vyrablaje pradukcyju z vykarystańniem zachodniaha abstalavańnia, havorycca ŭ aficyjnym katałohu pradpryjemstva. Dla ekspłuatacyi hetaj techniki «Intehrału» patrabujucca pastajannyja pastaŭki zachodniaj syraviny i kamplektujučych, bieź jakich jaje vykarystańnie niemahčyma. Ich prodaž Biełarusi zabaraniajuć sankcyi.
Značnaść hetych kampanientaŭ paćviardžajuć źviestki z unutranaj pierapiski arhanizacyi, jakaja ŭvachodzić u rasiejski dziaržaŭny kancern «Rostiech» — najbujniejšaha vytvorcu rasiejskaha ŭzbrajeńnia:
«U isnujučych palityka-ekanamičnych abstavinach asnoŭnyja pastaŭščyki PKV, takija jak AT «Hirikond», AT «NZPP Vostok», AT «Elekond», pavialičyli terminy pastaŭki da 540 dzion, što składaje 150% terminu vykanańnia damovy na pastaŭku vyrabaŭ AT «SKTB RT». Taksama pastaŭščyki aktyŭnych kampanientaŭ AT «Hruppa «Kriemnij-EŁ»», AT «Anhstriem», AT «VZPP-S», AAT «Intehrał», jakija zaležać ad pastaŭki impartnych materyjałaŭ i chimii, nie mohuć harantavać vykanańnie pastavak u adras AT «SKTB RT»», — havorycca ŭ paviedamleńni z uciečki elektronnych listoŭ i ŭnutranych dakumientaŭ «Roselektronika», jakija atrymaŭ OCCRP i praanalizavaŭ BRC.
Tym nie mienš, niahledziačy na sankcyi Jeŭraźviazu i ZŠA, skiravanyja na abmiežavańnie pastavak u Biełaruś stratehična važnych materyjałaŭ i abstalavańnia padvojnaha pryznačeńnia, «Intehrał» praciahvaje atrymlivać nieabchodnyja kampanienty i syravinu z krainaŭ JEZ.
Salanaja kisłata dla «Intehrała»
Adnym z krytyčna važnych materyjałaŭ dla «Intehrała» źjaŭlajecca vysokačystaja salanaja kisłata, viadomaja taksama jak chłaryd vadarodu.
Salanaja kisłata vykarystoŭvajecca dla apracoŭki paŭpravadnikovych płaścinaŭ. Hety praces zabiaśpiečvaje ich idealnuju čyściniu i hładkaść — klučavyja paramietry dla naniasieńnia składanych struktur mikraschiemaŭ. Najmienšyja zabrudžvańni na płaścinach mohuć pryvieści da defiektaŭ pradukcyi i źnizić jaje jakaść.
U 2021 hodzie salanuju kisłatu čyścinioj 99,999% «Intehrału» pastaŭlała niamieckaja kampanija UrSeCo Handels GmbH & Co. KG. Ale ŭ 2022-m, kali sankcyi zabaranili pastaŭlać hety chimikat u Rasieju, źjaviłasia novaja schiema dastaŭki. Pierš čym trapić u Biełaruś, pastaŭki pajšli praz Polšču i Turcyju ŭ Kazachstan. Atrymalnik kisłaty ŭ Kazachstanie — miascovaja kampanija TAA United Trading Group. Za salidnaj nazvaj chavajecca firma z adnym pracaŭnikom, stvoranaja praź niekalki tydniaŭ paśla pačatku poŭnamaštabnaj vajny. Jana pastaŭlała takuju ž zvyščystuju kisłatu ŭ Rasieju, u pryvatnaści kampanijam TAA «Siłtron» i TAA «Elektronsnab».
Hetyja dźvie kampanii dastaŭlali kisłatu z tymi ž charaktarystykami ŭ Biełaruś. U pastaŭkach na «Intehrał» ad «Elektronsnaba» miescam vytvorčaści paznačanaja Niamieččyna.
Ab tym, što ź Niamieččyny ŭ Rasieju pa apisanym nami łancužku ŭ abychod sankcyjaŭ išła adna i taja ž niamieckaja kisłata, mohuć śviedčyć supadzieńni ŭ datach i abjomach paśladoŭnych pastavak.
U pryvatnaści, 9 červienia 2022 hoda niamieckaja UrSeCo Handels pastaviła 860 kh zvyščystaj salanaj kisłaty vytvorčaści niamieckaha kancernu Wacker Chemie AG u Kazachstan firmie United Trading Group.
U tym ža miesiacy United Trading Group pastaviła partyju taho ž rečyva vytvorčaści Niamieččyny z dakładna takoj ža vahoj rasiejskaj kampanii «Elektronsnab».
«Intehrału» «Elektronsnab» pastaŭlaŭ niamieckuju kisłatu da kanca 2023 hoda.
U lipieni 2024 hoda sankcyi Jeŭraźviazu zabaranili pastaŭlać niamieckuju kisłatu nie tolki ŭ Rasieju, praź jakuju jana išła na «Intehrał» z pačatku poŭnamaštabnaj vajny, ale i ŭ Biełaruś. Hety chimikat na pradpryjemstva pačaŭ vazić i rasiejski «Siłtron», zasnavany praź niapoŭnyja try miesiacy paśla poŭnamaštabnaha ŭvarvańnia Rasiei va Ukrainu. U vieraśni 2024-ha kampanija pradała jaje «Intehrału» niepasredna. U lipieni taho ž hoda ŭžo praz pasiarednika — biełaruskuju firmu TAA «Dzihna-NTR».
U pastaŭkach kazachstanskaj United Trading Group «Siłtronu» vytvorcam kisłaty paznačanaja sama United Trading Group. Ale heta naŭrad ci adpaviadaje rečaisnaści.
Pa-pieršaje, pavodle aficyjnaha rejestru subjektaŭ pradprymalnictva Kazachstanu, u kampanii pracuje tolki adzin pracaŭnik (u rejestry jana ŭniesienaja ŭ katehoryju «Mikrapradprymalnictva»).
Pa-druhoje, u śpisie dziejnaści hetaha mikrapradpryjemstva niama jakoj-kolviek vytvorčaści, tolki aptovy handal. Taksama my nie znajšli infarmacyi ab tym, što ŭ Kazachstanie isnuje vytvorčaść salanaj kisłaty z čyścinioj 99,999%. U vieraśni 2023 hoda kazachstanski ŭrad pryniaŭ pastanovu, ź jakoj vynikaje, što adzinym vytvorcam salanaj kisłaty ŭ krainie zjaŭlajecca akcyjaniernaje tavarystva «Kaustik». Maksimalnaja dastupnaja čyścinia rečyva na toj momant składała 35%. Z tych časoŭ paviedamleńniaŭ ab zapusku novych vytvorčaściaŭ, zdolnych dasiahnuć nieabchodnych paramietraŭ, nie było.
Narešcie, u niekatorych pastaŭkach nibyta kazachstanskaj kisłaty ŭ Biełaruś ad «Siłtrona» paznačanaja marka rečyva — SEMICOSIL HLC 5.5. Hety tavarny znak naležyć niamieckamu kancernu Wacker Chemie. U dakumientach «Intehrała» ab zakupcy kisłaty ad «Dzihna-NTR», jakaja atrymlivała chimikat u «Siłtrona», miescam vytvorčaści kisłaty paznačanaja Niamieččyna.
U lipieni 2024 hoda «Siłtron» pastaviŭ «Dzihna-NTR» dźvie partyi kisłaty: abjomam 150 kh i 100 kh. U abiedźviuch pastaŭkach krainaj pachodžańnia byŭ paznačany Kazachstan. Pry hetym marka rečyva — niamieckaja SEMICOSIL HLC 5.5. «Dzihna-NTR», u svaju čarhu, pastaviła toj ža abjom «Intehrału».
Rasiejski «Siłtron» naŭprost źviazany z UrSeCo Handels — pastaŭščykom kisłaty ź Niamieččyny. Abiedźvie kampanii naležać čalcam adnoj siamji. Kirujučym dyrektaram i ŭładalnikam 45% niamieckaj kampanii UrSeCo Handels zjaŭlajecca Alaksandr Andrejevič Ždanaŭ. U listapadzie 2023 hoda čałaviek z takim ža proźviščam — Alaksandr Alaksandravič Ždanaŭ — daŭ pazyku rasiejskamu «Siłtronu». 13 studzienia 2025 hoda, pavodle dadzienych z rasiejskaj bazy dadzienych ab kampanijach i pradprymalnikach SPARK, jon ža staŭ uładalnikam 90% hetaj kampanii.
Jak vyśvietliŭ BRC, Alaksandr Andrejevič i Alaksandr Alaksandravič Ždanavy, vierahodna, — baćka i syn. Zhodna z pašpartnaj bazaj RF, jany źjaŭlajucca čalcami adnoj siamji.
Abchodnyja šlachi
Salanaja kisłata — adzin z mnostva prykładaŭ taho, jak «Intehrał» u abychod sankcyjaŭ praciahvaje zakuplać zabaronienaje zachodniaje abstalavańnie, zapčastki i materyjały. Siarod stratehična važnych dla «Intehrała» materyjałaŭ i technałohijaŭ — hazavyja ruchaviki MWM 2032 i zapčastki da ich. Hetyja niamieckija matory zabiaśpiečvajuć stabilnuju padaču enierhii dla vytvorčych pracesaŭ. Abychodzić zabaronu na ich ekspart u Biełaruś i Rasieju, uviedzienuju ŭ 2022 hodzie, pradpryjemstvu dapamahajuć kampanii-pasiaredniki.
Tolki viasnoj 2024 hoda pradpryjemstva zakupiła zapčastki dla hetych ruchavikoŭ piać razoŭ praź biełaruskija kampanii TAA «Matory i Tranśmisija», TAA «Pramełkam» i TAA «Impieryja Zachad». Akramia taho, 20 śniežnia 2024 hoda «Intehrał» raźmiaściŭ novy tendar na zakup detalaŭ i zapčastak dla ruchavikoŭ MWM na ahulnuju sumu $300 tys.
Vykarystańnie schiemaŭ abychodu sankcyjaŭ BRC paćvierdzili i sami pastaŭščyki «Intehrała». Žurnalisty patelefanavali pradstaŭnikam kampanijaŭ-pasiarednikaŭ, nazvaŭšysia klijentami.
«Sankcyjonka taksama nie prablema», — paviedamiŭ namieśnik kiraŭnika TAA «Impieryja Zachad» Illa Baroŭski. Jon raspavioŭ, što taksama ŭ ich jość «svaja kampanija ŭ Polščy, tamu jana zakuplaje, potym užo z Polščy tavary jeduć u Biełaruś, … u Rasieju, pa ŭsich inšych krainach, to bok impartujecca pieršapačatkova z Polščy».
Zasnavalnik TAA «Pramełkam» Jaŭhien Kazakoŭ skazaŭ, što schiemy abychodu sankcyjaŭ dazvalajuć pastaŭlać pradukcyju apieratyŭna: «Pa terminach my chutka pryviaziem. Tydzień-dva. Ciapier užo naładzili. Byccam, pavinna, tam napisali «praz Kyrhyzstan». Vozim. To bok, heta budzie chutka».
Prabieły ŭ sankcyjach
Jašče adzin prykład abychodu sankcyjaŭ, jaki znajšli žurnalisty BRC, — zakup mini-elektraruchavikoŭ vytvorčaści niamieckaj kampanii Faulhaber Group. U traŭni 2024 hoda «Intehrał» nabyŭ 44 takija pryłady ŭ kitajskaj kampanii Hebei Nanuo Alloy Material Co., Ltd.
«Jość takoje paniaćcie, jak reinžynirynh. Heta kali kapijujuć jaki-niebudź zachodni elemient: raźbirajuć jaho, šlifujuć pa słajach, vyvučajuć, jak jon pracuje, i mohuć jaho adnavić».
Dla niekatorych ź ich takoj nieabchodnaści niama. Siarod zakupak «Intehrała» BRC znajšoŭ zachodnija kampanienty, jakija nie ŭklučanyja ŭ sankcyjnyja śpisy ZŠA i JEZ. Heta, naprykład, arhon-ionnyja łaziery, paliravalnyja suśpienzii, paliravalnyja kruhi, detali, jakija vykarystoŭvajucca ŭ vytvorčaści paŭpravadnikoŭ i mikraelektroniki.
Akramia taho, choć asnoŭnaje pradpryjemstva chołdynhu «Intehrał» uklučanaje ŭ sankcyjnyja śpisy ZŠA, adnak JEZ nie ŭnios jaho ŭ svoj śpis abmiežavańniaŭ.
BRC skiravaŭ zapyty ŭ Jeŭrapiejskuju kamisiju i profilnym rehulataram z prośbaj patłumačyć razychodžańni ŭ sankcyjnaj palitycy ŭ dačynieńni da «Intehrała» i jahonych pastaŭščykoŭ.
Žurnalisty atrymali kamientar ad Toma Kitynha, dyrektara Centru finansaŭ i biaśpieki pry Karaleŭskim abjadnanym instytucie abaronnych daśledavańniaŭ (RUSI), jaki śpiecyjalizujecca na pytańniach abarony, biaśpieki i mižnarodnych stasunkaŭ:
«Rasieja i Biełaruś bieśpierapynna šukajuć sposaby nabyvać klučavyja pradukty dla vajny Rasiei va Ukrainie, abychodziačy sankcyi. Heta niepaźbiežna aznačaje, što krainy, jakija miažujuć z Rasiejaj, asabliva tyja, jakija ŭvachodziać u Jeŭrazijski ekanamičny sajuz, buduć uciahnutyja ŭ hetuju dziejnaść pa abychodzie sankcyjaŭ. <…> Chaŭruśnikam Ukrainy treba bolš aktyŭna vykarystoŭvać svaje paŭnamoctvy dla taho, kab «abviaščać i saromić» kampanii (ci navat cełyja krainy), jakija dapuskajuć abychod sankcyjaŭ. Było praviedziena šmat dypłamatyčnych pieramovaŭ, ale ŭ niejki momant razmovy pavinnyja padmacoŭvacca dziejańniami».
Taksama žurnalisty skiravali zapyty z prośbaj prakamientavać vyjaŭlenyja fakty parušeńnia sankcyjnaha zakanadaŭstva «Intehrału» i ŭsim udzielnikam łancužka pastavak — «Dzihna-NTR», Wacker Chemie, «Elektronsnab», «Siłtron», United Trading Group i UrSeCo Handels.
U kampanii «Siłtron» adkazali, što nikoli nie impartavali chłorysty vadarod z krainaŭ JEZ, a sami vyrablajuć jaho ŭ Nižaharodskaj vobłaści «pa ŭłasnaj zapatentavanaj technałohii»: «… što dazvalaje nam nie tolki padtrymlivać kankurentazdolnyja ceny (tańniej kitajskich anałahaŭ) ale i harantuje stabilnaść pastavak, što źjaŭlajecca važnym aśpiektam dla našych partnioraŭ».
Vykanaŭčy dyrektar i saŭładalnik kampanii UrSeCo Handels Alaksandr Andrejevič Ždanaŭ u telefonnaj razmovie z BRC zajaviŭ, što salanuju kisłatu jany nikomu nie pradajuć. Na ŭdakładniajučyja pytańni ab supracy z United Trading Group i «Siłtron» jon adkazvać admoviŭsia, prapanavaŭšy skiravać piśmovyja zapyty ci pryjechać asabista ŭ ofis kampanii. U adkaz na imejł pradstaŭniki niamieckaj kampanii paviedamili, što z metaj abarony ad «paklopu i iłžyvych padazreńniaŭ» jany źviarnulisia da niamieckich dziaržaŭnych orhanaŭ. Tyja ich nibyta papiaredzili, što Biełaruski rasśledavalnicki centr zjaŭlajecca «krynicaj fejkavych navinaŭ» i paraili nie davać nijakaj infarmacyi.
Na momant publikacyi adkazaŭ ad inšych kampanijaŭ rasśledavalniki nie atrymali.
Ciapier čytajuć
U Maładziečnie ŭ pustym vahonie znajšli 27-hadovaha amierykanca, jaki nielehalna trapiŭ u Biełaruś ź Litvy10
Kamientary
Kali biznes bačyć dobry prybytak - zaŭsiody znojdziecca ščylina.
Košt snarada za vajnu padniaŭsia u 8 razoŭ. U takich abstavinach lubyja administracyjnyja zabarony nahadvajuć šłahbaŭm na lasnoj darozie.