Čamu nie zaškvarna chadzić na kancerty Mieładze — tłumačyć Łojka

Niadaŭna śpiavak Valeryj Mieładze vystupiŭ z kancertam u Varšavie. Šmat chto ź biełarusaŭ na im prysutničaŭ i byŭ u zachapleńni. Adnak znajšlisia i tyja, chto paličyŭ, što iści na kancert pradstaŭnika rasijskaj papsy, jaki da taho ž u 2021 hodzie vystupiŭ pierad Viktaram Łukašenkam, — heta zaškvar.

U novym analityčnym vypusku TOKu ekanamičnaja ahladalnica Volha Łojka pasprabavała patłumačyć, čamu, na jaje pohlad, abvinavačańni ŭ adras śpievaka nieabhruntavanyja.

Łojka adznačyła, što nie vałodaje dakładnaj infarmacyjaj pra toje, kali kankretna i pry jakich abstavinach Valeryj Mieładze śpiavaŭ u 2021 hodzie dla starejšaha syna Alaksandra Łukašenki. Dla taho, kab nie ličyć prysutnaść na kancercie zaškvaram, joj dastatkova taho, što jon źjechaŭ z Rasii, nie padtrymaŭ vajnu, nie davaŭ kancerty na akupavanych terytoryjach.

Łojka zhadvaje, što ŭ pieršaj pałovie 2021 hoda jana sama «była ŭ roznych miescach. I ŭ Nacbanku, i ŭ pałatcy (Pałacie pradstaŭnikoŭ — NN), i ministerstvach». U toj čas, jak jaje kalehi-žurnalisty ź Biełsata i Tut.by užo znachodzilisia ŭ źniavoleńni.

«U hety momant, dapuścim, Zialenski praciahvaŭ razmaŭlać z Łukašenkam, viedajučy, što Łukašenka robić sa svaimi biełarusami. Usio-taki chutkaść reakcyi na niejkija ŭnutranyja rečy dosyć adroźnivajecca ŭ vonkavych aktaraŭ.

Čamu Zialenski nie źviartaŭ uvahu suśvietnaj supolnaści na toje, što ŭ 2021 hodzie mučać biełarusaŭ? Tamu što ŭ jaho byŭ svoj paradak dnia, jon zaniaty byŭ svaimi spravami».

U toj ža čas, jak zaŭvažaje Łojka, jana dobra razumieje pazicyju ludziej, jakija asudžajuć tych, chto prysutničaŭ na kancercie. U jakaści prykładu jana źviartajecca da historyi fašysckaj Hiermanii.

«Voś ja pahladzieła, jakija razborki byli ŭ adnosinach da muzykantaŭ fašysckaj Hiermanii. I navat kali sud ciabie apraŭdvaŭ, usio roŭna znachodziŭsia jaki-niebudź umoŭny Tomas Man, jaki kazaŭ, što chłopcy, heta zaškvar. I muzyku ŭsich hetych štrausaŭ my nie možam słuchać, tamu što jon padtrymlivaŭ hitleraŭskuju Hiermaniju. Chacia było rašeńnie suda, što nie padtrymlivaŭ».

Pa słovach analityka, staŭleńnie zaležyć ad hłybini traŭmy, ad taho, dzie ŭ momant kankretnaj padziei znachodziŭsia čałaviek.

«Kali ty sam siadzieŭ u hety momant u kancłahiery, to, napeŭna, dla ciabie čałaviek, jaki tam niešta ŭ viarchach vyrašaje z uładami, heta zaškvar. Ty nie pojdzieš na jaho kancert i nie zachočaš słuchać jaho muzyku», —

davodzić svaju pazicyju Łojka i dadaje, što «žyćcio trochi składaniej uładkavana».

«U nas u kožnaha svajo žyćcio. I sutnaść jaho nie ŭ tym, što my kahości pavinny zrynuć ci zadavolić čyjści zapyt. My žyviom svajo žyćcio tak, jak my jaho bačym i razumiejem», — davodzić Łojka i prapanuje:

«Kali vas heta tak tryhieryć, nu spytajecie ŭ jaho: «Valeryj, tady ŭ 2021-m vam zdavałasia, što heta ok?» Nam usim u 2021-m zdavałasia, što niekatoryja rečy ok».

Łojka adznačaje, što nie treba aceńvać padziei minułaha z pazicyj siońniašniaha dnia:

«Nie treba zadnim rozumam. My ŭsie pieražyvali hetuju historyju ŭpieršyniu. Ja dumaju, što kali b Mieładze zaraz vyrašaŭ, ci śpiavać jamu na kancercie ŭ Vici Łukašenki, napeŭna, rašeńnie było b inšym».

Łojka dapuskaje, što śpiavak, jak i šmat chto z tvorčych ludziej, na 2021 hod «nie byŭ u paviestcy»:

«My čakajem ad muzykantaŭ, što jany ŭciahnuty [ŭ padziei hramadska-palityčnaha žyćcia] i ŭ paradak dnia. A jany tvorčyja ludzi, na svajoj chvali».

• 18
• 7
• 3
• 11
• 0
• 1
• 3
• 1