Kijeŭ pačaŭ nacyjanalizacyju ŭkrainskich aktyvaŭ «Biełaruśkalija». Častku ź ich paśpieli pradać

Ministerstva justycyi Ukrainy praz sud damahłosia zabarony pradavać vahony, što naležać biełaruskamu pradpryjemstvu «Biełaruśkalij» i jaho daččynym ukrainskim kampanijam, aktyvy jakich aryštavali paśla pačatku poŭnamaštabnaha rasijskaha vajennaha ŭvarvańnia, padtrymanaha ŭładami Biełarusi.

U kancy 2024 hoda ŭ Ahienctvie vyšuku i mieniedžmientu aktyvaŭ (AVMA) Ukrainy paviedamili ab pačatku maštabnaha prodažu 30 431 tony chłarydu kaliju, jakija na 24 lutaha 2022 hoda znachodzilisia na terytoryi Ukrainy. Z pačatku hoda praz adpaviednyja aŭkcyjony ŭžo zmahli pradać niekalki łotaŭ uhnajeńniaŭ.

Čamu pazoŭ padali praz dva hady paśla sankcyj

Ministerstva justycyi Ukrainy arhumientavała svoj pazoŭ tym, što pradpryjemstva «Biełaruśkalij» całkam kantralujecca palityčnaj viarchuškaj Biełarusi, najpierš Alaksandram Łukašenkam, «svaimi dziejańniami spryjaje viadzieńniu vajny suprać Ukrainy praź finansava-haspadarčyja ŭzajemaadnosiny z pradpryjemstvami VPK Rasii i akupacyjnymi administracyjami samaabvieščanych «DNR» i «ŁNR», a taksama nadavała transpart dla pieramiaščeńnia ŭkrainskich dziaciej, vyviezienych z časova akupavanych terytoryj, na terytoryju Respubliki Biełaruś.

Sud dla zabieśpiačeńnia razhladu pazovu Ministerstva justycyi Ukrainy zabaraniŭ AVMA pradavać čyhunačnyja vahony i abaviazaŭ ahienctva padać usiu infarmacyju pra sumu hrošaj, atrymanych za ŭžo realizavanyja kalijnyja ŭhnajeńni.

Akramia taho, sud zabaraniŭ dziaržaŭnym rehistrataram ažyćciaŭlać lubyja rehistracyjnyja dziejańni, źviazanyja z aktyvami ŭkrainskaj kampanii «Ahrorozkvit». Jak vyśvietliłasia, raniej takoj zabarony nie było, a za hety čas jaje aktyvy skłali 324 miljony hryŭniaŭ (pryblizna 8 miljonaŭ dołaraŭ u ekvivalencie). U 2020-m jany składali 255,8 miljona hryŭniaŭ — 8,5 miljona dołaraŭ u ekvivalencie pavodle kursu na toj momant.

Što viadoma pra kampaniju «Ahrorozkvit»

Kampanija «Ahrorozkvit» zarehistravanaja 5 lipienia 2016 hoda. Jaje zasnavalnik — Biełaruskaja kalijnaja kampanija. U Ministerstvie justycyi Ukrainy miarkujuć, što praz BKK 48% aktyvaŭ ukrainskaha pradpryjemstva naležyć «Biełaruśkaliju».

U toj ža čas viadoma, što «Ahrorozkvit» peŭny čas byŭ źviazany z hramadzianinam Ukrainy Alaksandram Skrypkam i jaho kampanijaj «SanAhro Ukrajina». Ich źviazvaŭ navat adzin supolny zasnavalnik — brytanskaja kampanija Agrofertrans Ltd, ułaśnikam jakoj i byŭ Alaksandr Skrypka.

U 2016 hodzie kapitał Agrofertrans Ltd byŭ vykarystany dla rehistracyi kampanii «Biełahrafiert» u miežach svabodnaj ekanamičnaj zony «Hrodnainviest». Na aficyjnym sajcie SEZ paznačana, što pradpryjemstva stvorana z udziełam brytanskich inviestycyj. Praŭda, nazva brytanskaj kampanii nie zhadvajecca.

«Biełahrafiert» (hetuju kampaniju ŭ svoj čas kantralavaŭ Viktar Šejman) pabudavaŭ zavod dla vytvorčaści hranulavanaha sulfatu amoniju na asnovie syraviny AAT «Hrodna Azot». Raniej paviedamlali, što hety zavod vyrablaje da 200 tysiač ton uhnajeńniaŭ za hod. Bolšuju ich častku pastaŭlali va Ukrainu praz kampaniju «SanAhro Ukrajina», bienieficyjaram jakoj taksama była brytanskaja Agrofertrans Ltd.

U kancy 2020 hoda Agrofertrans Ltd vyjšła i sa składu bienieficyjaraŭ pradpryjemstva «SanAhro Ukrajina» i kampanii «Ahrorozkvit».

Pavodle finansavaj spravazdačy, u 2020 hodzie «SanAhro Ukrajina» atrymała 1,9 miljarda hryŭniaŭ dachodu, ale čysty prybytak skłaŭ 61,4 miljona hryŭniaŭ (adpaviedna 69,9 i 2,2 miljona dołaraŭ u ekvivalencie pavodle kursu na śniežań 2020 hoda). Za apošnija čatyry hady dachodnaść hetaj kampanii pavialičyłasia ŭ paŭtara raza — da 3,2 miljarda hryŭniaŭ (amal 80 miljonaŭ dołaraŭ), a čysty prybytak — da 98,6 miljona hryŭniaŭ (2,5 miljona dołaraŭ). Admietna, što i aktyvy kampanii pavialičylisia z 246,8 miljona hryŭniaŭ (6,1 miljona dołaraŭ) u 2020-m da 1,1 miljarda hryŭniaŭ (28,5 miljona dołaraŭ) u 2024 hodzie.

Kampaniju «SanAhro Ukrajina», jakaja była aficyjnym dyleram biełaruskaha kaliju va Ukrainie, padazravali va ŭdziele ŭ finansavańni pajezdak ukrainskaha deputata Jaŭhiena Šaŭčenki ŭ Biełaruś (jon znachodzicca ŭ śledčym izalatary pavodle padazreńnia ŭ dziaržaŭnaj zdradzie).

Pavodle infarmacyi inicyjatyvy «Rabočy ruch», stvoranaj paśla akcyj pratestu ŭ 2020 hodzie dla abarony pravoŭ pracoŭnych, Alaksandr Skrypka ŭ 2015 hodzie naviedvaŭ Vjetnam jak hienieralny dyrektar Agrofertrans Ltd razam z Alenaj Kudraviec, hienieralnaj dyrektarkaj Biełaruskaj kalijnaj kampanii.

TAA «Ahrorozkvit» u 2020 hodzie atrymała 3 miljardy hryŭniaŭ dachodu i 19,8 miljona hryŭniaŭ čystaha prybytku (adpaviedna 110 miljonaŭ i 713 tysiač dołaraŭ u ekvivalencie). U nastupnyja čatyry hady dachodnaść pradpryjemstva źnižałasia, pakul u 2024 hodzie nie dasiahnuła 16,2 miljona hryŭniaŭ sa stratami ŭ 9,7 miljona hryŭniaŭ (adpaviedna 404 630 i 242 085 dołaraŭ u ekvivalencie).

Ciapier u kampanii niama nivodnaha pracaŭnika. Jaje apošni kiraŭnik Vadzim Kulik, jaki ŭ 2022 hodzie napisaŭ zajavu ab zvalnieńni, doŭha sudziŭsia, kab pajści z hetaj pasady, bo praz vajnu kampanija nie mahła pravieści ŭ hetych metach ahulny schod akcyjanieraŭ. U listapadzie 2023 hoda Haspadarčy sud Kijeva pryznaŭ jaho «pracoŭnyja adnosiny spynienymi ŭ suviazi sa zvalnieńniem z pasady dyrektara pa ŭłasnym žadańni».

U červieni 2024 hoda padatkovyja orhany anulavali rehistracyju pradpryjemstva «Ahrorozkvit» jak płacielščyka PDV na padstavie dekłaracyi ab adsutnaści pastavak.

• 0
• 1
• 1
• 0
• 0
• 0
• 0
• 0