Ankalityčnaja virusnaja terapija — tanny i efiektyŭny sposab lačeńnia raku

Rak zastajecca adnoj z hałoŭnych pryčyn śmierci va ŭsim śviecie. Aproč taho, chvaroba z kožnym hodam atakuje ŭsio bolš maładych ludziej.

Vučonyja raspracavali šmat mietadaŭ lačeńnia: chimija– i imunaterapija, pramianiovaja terapija, apieratyŭnaje ŭmiašańnie, a ŭ apošniaje dziesiacihodździe — i pieradavaja CAR-T-terapija, pry jakoj u arhanizm uvodziacca madyfikavanyja T-kletki, što sami šukajuć i źniščajuć puchlinu. Ale ŭsie hetyja mietady majuć surjoznyja abmiežavańni.

Chimijaterapija časta źniščaje nie tolki rakavyja, ale i zdarovyja kletki, vyklikajučy ciažkija pabočnyja efiekty. Imunaterapija i asabliva CAR-T-terapija pakazvajuć dobryja vyniki, ale ich košt — dziasiatki, a to i sotni tysiač dalaraŭ. Akramia taho, šmatlikija puchliny z časam stanoviacca ŭstojlivymi da lekaŭ, mucirujuć i navučajucca abychodzić imunnuju abaronu.

Na hetym fonie ŭsio bolšuju ŭvahu pryciahvaje inšy mietad — terapija na asnovie ankalityčnych virusaŭ. Heta adnosna tanny, technałahična praściejšy i pry hetym efiektyŭny sposab zmahacca z puchlinami, jaki abjadnoŭvaje pryrodnuju siłu virusaŭ i intelekt hiennaj inžynieryi. I mienavita Kitaj ciapier ličycca adnym ź lidaraŭ u hetaj halinie.

Jak adznačaje South China Morning Post, u krainie ciapier pravodzicca kala 60 kliničnych vyprabavańniaŭ hetaha mietadu, jaki maje patencyjał radykalna źmianić padychod da lačeńnia ankałahičnych zachvorvańniaŭ.

Što takoje ankalityčny virus?

Hetyja virusy možna ŭjavić sabie jak schavanych zabojcaŭ. Ich madyfikujuć u łabaratoryjach takim čynam, kab jany pranikali ŭ puchliny, razmnažalisia ŭnutry rakavych kletak i razburali ich znutry niby mikraskapičnyja hranaty.

Akramia taho, virusy mohuć vyzvalać admysłovyja białki. Jany dapamahajuć imunnaj sistemie raspaznavać rakavyja kletki. U vyniku arhanizm vučycca zmahacca z puchlinaj samastojna i źniščaje tyja kletki, što zastalisia.

Ankalityčnyja virusy asabliva efiektyŭnyja ŭ tych vypadkach, kali paśla apieracyi ci chimijaterapii ŭ arhaniźmie zastalisia asobnyja rakavyja kletki, — jany dapamahajuć ich źniščyć. Jašče adna pieravaha — zdolnaść dziejničać na puchliny, ustojlivyja da zvykłych mietadaŭ lačeńnia, bo virusy atakujuć kletki naŭprost. Akramia taho, takaja terapija źnižaje ryzyku recydyvu, bo zdolnaja źniščać navat rakavyja stvałavyja kletki, jakija časta stanoviacca pryčynaj viartańnia chvaroby.

Daśledavańni ŭ hetaj halinie viaducca ŭžo bolš za sto hadoŭ, ale sučasnyja hienietyčnyja technałohii značna pašyryli mahčymaści hetaha mietadu. Pakul što va ŭsim śviecie tolki piać ankalityčnych terapij atrymali dazvoł na vykarystańnie — pieravažna ŭ ZŠA i Japonii. Adnak kitajskija navukoŭcy chutka dahaniajuć, prapanoŭvajučy inavacyjnyja i dastupnyja pa canie rašeńni.

Abnadziejvajučyja vyniki

U studzieni 2025 hoda ŭ navukovym časopisie Cell byŭ apublikavany artykuł pra 58-hadovuju žančynu z apošniaj stadyjaj raku šyjki matki, ustojlivaha da lačeńnia. Jana, jak i inšyja 19 udzielnic vyprabavańnia, atrymała ekśpierymientalnuju terapiju na asnovie ankalityčnaha virusa, paśla čaho jaje mietastazy całkam źnikli. Žančyna pražyła bolš za 36 miesiacaŭ paśla lačeńnia.

Kamanda vučonych ź Miedycynskaha ŭniviersiteta Huansi vykarystała hienietyčna madyfikavany virus, jaki «maskiravaŭ» rakavyja kletki pad tkanki śvińni. Heta vyklikała reakcyju hipiervostraha adrynańnia ŭ puchlinie — reakcyju, jakaja anałahičnaja imunnaj pry niaŭdałaj transpłantacyi orhanaŭ.

U hetym nievialikim vyprabavańni ŭ 90% pacyjentaŭ z ustojlivymi da lekaŭ formami raku piečani, jaječnikaŭ i lohkich było adznačana pamianšeńnie abo stabilizacyja rostu puchliny.

Va ŭschodnim Kitai inšaja kamanda raspracoŭvaje pieršy ŭ śviecie ankalityčny virus, jaki źmiaščaje čatyry imunastymulujučyja cytakiny — białki, što pieradajuć sihnały pamiž kletkami. Hety madyfikavany virus, viadomy jak VG161, raspracavany vučonymi Čžeczianskaha ŭniviersiteta.

Vyniki vyprabavańnia na 40 pacyjentach z rakam piečani byli apublikavanyja ŭ sakaviku 2025 hoda ŭ časopisie Nature. Pavodle daśledavańnia, VG161 zatarmaziŭ rost puchliny na 65%, a taksama likvidavaŭ ustojlivaść da imunaterapii. Pacyjenty, usie na poźniaj stadyi chvaroby, dziakujučy hetaj terapii pražyli ŭ siarednim 17,3 miesiaca zamiest zvyčajnych 9,4. Pry hetym pabočnyja efiekty byli minimalnyja.

Akramia taho, ankalityčnaja terapija, viadomaja jak OH2, raspracavanaja kampanijaj Binhui Biotechnology pakazała dobryja vyniki ŭ lačeńni miełanomy.

Jak paviedamlajecca, i OH2, i VG161 užo dapuščanyja da pieršaj fazy kliničnych vyprabavańniaŭ (vyprabavańnie biaśpieki). Kamanda vučonych z Huansi čakaje dazvołu na druhuju (vyprabavańnie efiektyŭnaści) i treciuju (maštabnaja pravierka pierad rehistracyjaj) fazy vyprabavańniaŭ.

Akramia efiektyŭnaści, hety padychod maje jašče adnu istotnuju pieravahu — nizki košt i patencyjał da masavaj vytvorčaści. Dla paraŭnańnia: adno lačeńnie CAR-T-terapijaj u Kitai kaštuje kala $140 tysiač. Injekcyi ankalityčnych virusaŭ abychodziacca ŭsiaho ŭ $140, što dazvalaje ŭkłaścisia ŭ mienš jak $4200 za hadavuju prahramu lačeńnia.

Biezumoŭna, hety mietad maje svaje ciažkaści: havorka idzie pra žyvyja virusy (choć bolšaść ź ich vyklikaje tolki słabyja simptomy nakštałt hrypu), i ŭvodzić ich treba niepasredna ŭ puchlinu, pryčym časta nieadnarazova. Asabliva składana danieści ich da kletak kryvi, jak, naprykład, pry lejkiemii.

Tym nie mienš ekśpierty adznačajuć značny prahres kitajskich daśledčykaŭ u halinie sistemnaha raspaŭsiudžvańnia virusaŭ i aktyvacyi imunnaj sistemy. Jany nazyvajuć hetuju terapiju «nastupnaj miažoj u ankałohii».

• 21
• 0
• 0
• 0
• 1
• 0
• 0
• 2