«Мы ўнікальныя нават і ў такіх простых рэчах». Беларуска за мяжой стварыла настольную гульню пра Беларусь
Выдавецтва Gutenberg Publisher нядаўна выпусціла настольную гульню «Я ніколі не». Гульня прыдуманая для дарослых дзеля стварэння добрага настрою ў кампаніі.
«Натхненнем для стварэння гульні былі сябры, любоў да Беларусі і вялікая ахвота зрабіць нешта, што я змагу патрымаць у руках ці паставіць на палічку і сказаць: гэта зрабіла я. Раней я займалася відэа, ладзіла івэнты і працавала менеджаркай. Усё гэта, на жаль, не патрымаеш у руках», — распавядае выданню Lixtar аўтарка гульні Ганна Шымановіч.
«Думаю, як і большасць беларусаў у эміграцыі, мы часта з сябрамі распавядалі адно аднаму, хто дзе быў у Беларусі, што любіў ці любіла рабіць. І аказалася, што нас усіх аб‘ядноўваюць нейкія рэчы, да якіх мы так прызвычаіліся ў Беларусі.
Так і нарадзілася гульня, таму што яна пра кожнага і кожную з нас. У нас ёсць наш код беларусаў, толькі мы ведаем, што за боль чуць «Белоруссия», толькі мы можам спрачацца наконт таго, якая згушчонка смачнейшая і ці патрэбна мука ў драніках. Мы ўнікальныя не толькі ў сваёй мове, культуры, але нават і ў такіх простых рэчах», — расказвае Ганна.
Ганна — толькі аўтарка гульні, а ўсе бізнэс-пытанні (пошук друкарні, друк, рэклама і продаж) узяло на сябе выдавецтва Gutenberg Publisher. Аднак ёсць шмат ідэй, што можна было б выпусціць яшчэ, і з гэтага, магчыма, ужо народзіцца і ўласны бізнэс.
Правілы ў настолкі вельмі простыя. У вас ёсць калода са 110 карткамі з фактамі пра Беларусь. Кладзяце яе пасярод гульцоў, цягнеце карткі па чарзе і чытаеце. Калі рабілі тое, што напісана, выпіваеце. Можна замяніць алкаголь на нейкае іншае «пакаранне», напрыклад, адцісканне.
Набыць гульню з дастаўкай па ўсім свеце можна праз сайт выдавецтва.
У інстаграм-профілі гульні можна знайсці спіс крамаў з гульнёй у Вільні, Варшаве, Гданьску, Кракаве, Рызе і Менску.
А таксама ў Telegram можна дадаць сабе стыкеры з гульні — вось спасылка.
«Карткі прыдумлялі з сябрамі. Гэта калектыўная творчасць. Дарэчы, чарнавы спіс гэтых картак складаўся з каля 500 фактаў. А ўжо фінальны спіс я адбірала сама. Я часта жартую, што гэта гульня пра тое, што люблю менавіта я. Ілюстрацыі да гульні рабіла цудоўная @danko_m_gallery. Яны ўсе аўтарскія і вельмі смешныя», — заканчвае аповед Ганна.
Цяпер чытаюць
Фёдар Віктаравіч і «Віктар Фёдаравіч». Супрацоўнік «Варгеймінга» мае пашпарт прыкрыцця. Яго жонка Вольга Сямашка — вядомая журналістка42
Каментары