Як запаволіць старэнне? Медыкі і навукоўцы ўсё больш даведваюцца пра гэта.
Сёння дажыць да 100 гадоў — гэта ўжо не незвычайная з'ява, але ўсё яшчэ рэдкасць. The Economist робіць цікавы агляд апошніх намаганняў у гонцы чалавека за прадаўжэннем жыцця.
Асабліва важлівай мэтай уяўляецца не прадаўжэнне жыцця як такое, а каб дадатковыя гады былі здаровымі і прыносілі задавальненне. Прагрэс, дасягнуты сёння, дагэтуль накіраваны на барацьбу з прычынамі смерці, асабліва з інфекцыйнымі захворваннямі. Аднак сам працэс старэння з такімі спадарожнымі хваробамі, як, напрыклад, дэменцыя, навукоўцам пакуль не пад сілу запаволіць. Таму цяпер усё больш намаганняў скіравана менавіта на гэта.
Ідэя заключаецца ў тым, каб маніпуляваць біялагічнымі працэсамі, звязанымі са старэннем, якія пры доследах на лабараторных жывёлах, здаецца, прадаўжаюць іх жыццё. Некаторыя з метадаў даўно вядомыя, напрыклад, строгае абмежаванне колькасці калорый, якія спажывае жывёла ў рамках збалансаванай дыеты. Вядома, жыць з абмежаваннем калорый вельмі складана для большасці людзей, але прэпараты, якія ўплываюць на адпаведныя біялагічныя шляхі, здаецца, прыносяць падобныя вынікі.
Адзін з такіх прэпаратаў — метфармін (metformin), які быў ухвалены для выкарыстання супраць дыябету 2 тыпу. Іншы — рапаміцын — імунасупрэсант, які выкарыстоўваецца пры трансплантацыі органаў. Некаторыя карыстальнікі пачынаюць прымаць гэтыя лекі «не па прызначэнні», самастойна або тады, калі падпісваюць кантракты на абслугоўванне з новым класам фірмаў, якія займаюцца даўгалеццем.
Іншы шлях заключаецца ў распрацоўцы лекаў, што забіваюць старыя клеткі, якія арганізму больш не патрэбныя. Сеналітыкі — гэта клас супрацьузроставых лекавых прэпаратаў, адметнай асаблівасцю якіх з'яўляецца здольнасць выбарачна ініцыяваць гібель састарэлых клетак. Натуральныя сродкі для ўтылізацыі гэтых клетак, як і шэраг іншых механізмаў аднаўлення, самі слабеюць з часам. Працягнуць ім руку дапамогі — гэта не проста навесці парадак. Клеткі, што старэюць, выклікаюць разнастайныя збоі ў сваіх здаровых суседзяў. А сеналітычныя прэпараты, накіраваныя на іх, ствараюць відавочную небяспеку: цяжка знішчыць адзін тып клетак і не пашкодзіць іншы. Але напрамак для навукоўцаў зразумелы.
Для сапраўдных аптымістаў гэта толькі пачатак. Групы акадэмічных і камерцыйных даследчыкаў вывучаюць, як амаладзіць клеткі і тканкі шляхам змены «эпігенетычных» маркераў на храмасомах, якія паведамляюць клеткам, якія гены яны павінны актываваць. Гэтыя маркеры назапашваюцца з узростам. Многія лічаць, што шляхам маніпуляцыі з імі можна стварыць клеткі 20-гадовага цела ўнутры цела 65-гадовага чалавека.
Адна з галоўных прычын для турботы навукоўцаў — чалавечы мозг. Запаволенне старэння не зменіць таго факта, што мозг мае абмежаваную ёмістасць і, як мяркуецца, шляхам натуральнага адбору прыстасаваны да звычайнай працягласці жыцця. Гэтае пытанне стаіць асобна ад турботы пра дэменцыю, якая выклікаецца пэўнымі захворваннямі. Такім чынам, доўгажыхарам трэба будзе знайсці спосабы прыстасавацца да нармальнага, звычайнага старэння мозгу: напрыклад, людзі могуць апынуцца ў сітуацыі, калі ўсё больш яны будуць звяртацца да свайго памочніка са штучным інтэлектам з пытаннямі, адказы на якія яны калісьці ўспомнілі б без намаганняў.
Ні адна з вышэй згаданых ідэй яшчэ не была афіцыйна выпрабаваная на людзях. Гэта збольшага таму, што кіруючыя органы па зацвярджэнні лекаў яшчэ не прызнаюць старасць захворваннем, якое паддаецца лячэнню, што ўскладняе рэгістрацыю выпрабаванняў. Па сваёй прыродзе ў такіх выпрабаваннях павінны ўдзельнічаць тысячы людзей на працягу многіх гадоў, што павялічвае кошт і складанасць даследаванняў.
Адсутнасць тэставання таксама часткова звязана з тым, што ў многіх першапачатковых прапановах выкарыстоўваюцца малекулы, якія незапатэнтаваныя, што мала цікавіць фармацэўтычныя кампаніі. Тым не менш некаторыя выпрабаванні вядуцца: напрыклад, у выпрабаванні з выкарыстаннем метфарміну будуць назірацца 3000 амерыканцаў ва ўзросце 60-70 гадоў. Мэта — даведацца, ці сапраўды прэпарат дапамагае прадаўжэнню жыцця ў цэлым. Канечне, такія даследаванні абавязкова зоймуць час.
Што будзе, калі ўсё ж такі атрымаецца?
Некаторыя людзі, назіраючы зацікаўленасць мільярдэраў у стартапах, якія спрыяюць даўгалеццю, непакояцца, што перавагі атрымаюць у асноўным багатыя, што прывядзе да таго, што клас доўгажыхароў-суперлюдзей будзе панаваць над недаўгавечнымі звычайнымі людзьмі. Але тэхналогіі распаўсюджваюцца і таннеюць. Цяжка ўявіць прывілей, які з большай імавернасцю можа выклікаць паўстанне, чым наяўнасць кіруючага класа, які назапашвае сродкі для прадаўжэння ўзросту, каб пазбегнуць вялікага ўраўняльніка ў абліччы смерці.
Калі некаторыя людзі будуць жыць значна даўжэй, гэта будзе мець далёкія наступствы. Відавочна, што працоўны ўзрост будзе павялічаны, а для жанчын адкрыецца больш магчымасцяў не ахвяраваць сваёй кар'ерай з-за нараджэння дзяцей, што, магчыма, зменшыць няроўнасць на працоўным месцы. З часам могуць адбыцца і больш глыбокія зрухі. Людзі, якія жывуць даўжэй, могуць больш клапаціцца пра пагрозы, якія знаходзяцца далей у часе, напрыклад, пра стан свету ў 2100 годзе. Даўгалецце дазваляе цярпліва назапашваць капітал, які ёсць фактарам з'яўлення сярэдняга класа. Сем'і будуць ахопліваць нават больш пакаленняў і, як мяркуецца, больш шырокія сеткі разнастайных зводных братоў, сясцёр і чатырох’юрадных кузэнаў. Гэта перасварыць іх ці аб'яднае? Ці будзе лішак стагадовых людзей маргіналізаваць моладзь, ці ўзнікне культ маладосці, ці першае і другое разам?
Відавочна адно: людзі ўхопяцца за эліксір жыцця, калі ён стане даступным. Але натуральны адбор не зацікаўлены ў бясконцым даўгалецці як такім. Тым не менш унутранае імкненне трымацца за жыццё — магчыма, самая асноўная рыса з усіх, што ўласцівыя жывым арганізмам.
Фёдар Віктаравіч і «Віктар Фёдаравіч». Супрацоўнік «Варгеймінга» мае пашпарт прыкрыцця. Яго жонка Вольга Сямашка — вядомая журналістка34
Каментары