Ад зачыненага Чырвонага касцёла патрабуюць амаль 150 тысяч рублёў
На імшы 22 снежня пробашч парафіі закрытага Чырвонага касцёла закрануў «далікатнае пытанне аб сітуацыі на канец года». Ксёндз Франц Рудзь паведаміў, што доўг парафіі перад дзяржаўным прадпрыемствам «Спадчына», якое з'яўляецца ўласнікам касцёла, складае 148 тысяч рублёў. Гэта 43 тысячы даляраў па цяперашнім курсе, піша katoilk.life.
«Гэты доўг я атрымаў, і гэта на нашай парафіі. На заканчэнне года няма з чаго асабліва падводзіць вынікі. Але тое, з чаго я з вамі распачынаю, такая вось сітуацыя. Молімся аб тым, каб мы маглі вярнуцца ў свой касцёл, і каб там парафія жыла, як гэта было адпачатку», — сказаў святар.
Таксама ён падзякаваў парафіі за тое, што яна дружная, збіраецца разам на працягу апошніх гадоў, нягледзячы на тое, што храм зачынены. Адзначыў, што захаваліся і хор, і малітоўныя суполкі і групы.
Пробашч не канкрэтызаваў, за што менавіта гэты доўг. Верагодна, выплата гэтай сумы з'яўляецца адной з умоваў таго, каб парафію зноў пусцілі ў Чырвоны касцёл, робіць дапушчэнне katolik.life.
На вячэрняй Імшы святар дадаў, што доўг быў адпачатку, калі ён прымаў парафію, і што яго давядзецца выплачваць. Пры гэтым, ніякіх фінансавых сродкаў яму не перадалі, а рахунак парафіі ўвогуле арыштаваны па рашэнні суда — і калі там з'яўляюцца нейкія сродкі, іх адразу забіраюць на выплату доўга.
У 2020 годзе супольнасці ўжо выстаўлялі патрабаванне аплаціць буйную суму. Тады яна была яшчэ большай — 156 тысяч рублёў. Гэта абумоўлівалі «амартызацыяй» храма і падаткамі за карыстанне зямлёй. Тады ў парафіі палічылі неправамернымі такія патрабаванні і прасілі перадаць касцёл ва ўласнасць супольнасці. Аднак гэтага не адбылося.
У Курыі архідыяцэзіі тады назвалі выплаты непад'ёмнымі і несправядлівымі.
Фёдар Віктаравіч і «Віктар Фёдаравіч». Супрацоўнік «Варгеймінга» мае пашпарт прыкрыцця. Яго жонка Вольга Сямашка — вядомая журналістка34
Каментары
Няхай Бог даруе нашаму народу нашыя грахі што адвярнуліся ад веры продкаў і сваіх нацыянальных сімвалаў, што страцілі былую веліч сваёй краіны і няхай дапаможа нам вярнуць свабоду і ўсталяваць лідараў якія маюць мудрасць і служаць Богу, народу і краіне і павядуць краіну ў правільным накірунку.
Няхай зрынуць з нашага краю і з ўсіх ўплывовых пасад ўсе непрыстойныя асобы, хто ненавідзіць наш народ, хто не служыць Беларусі, усе хто павязаў сябе ў карупцыі, служэнні чужынцам, хто жыве супраць Слова Божага.
Няхай нашы лідары будуць людзьмі якія шануюць Святое імя Бога ад каго ёсць сапраўдная мудрасць, шануюць беларускі народ, мову, культуру, гісторыю.
Мы верым і молімся ў імя Езуса Хрыста, Амен.
***
Будзем верыць і маліцца і сапраўдная ўлада ад Бога і народа Беларусі перадасць касцёл каталікам для служэння Богу як гэта і было з дня заснавання касцёла.
Амен.