Чаму не зашкварна хадзіць на канцэрты Меладзэ — тлумачыць Лойка

Нядаўна спявак Валерый Меладзэ выступіў з канцэртам у Варшаве. Шмат хто з беларусаў на ім прысутнічаў і быў у захапленні. Аднак знайшліся і тыя, хто палічыў, што ісці на канцэрт прадстаўніка расійскай папсы, які да таго ж у 2021 годзе выступіў перад Віктарам Лукашэнкам, — гэта зашквар.

У новым аналітычным выпуску ТОКу эканамічная аглядальніца Вольга Лойка паспрабавала патлумачыць, чаму, на яе погляд, абвінавачанні ў адрас спевака неабгрунтаваныя.

Лойка адзначыла, што не валодае дакладнай інфармацыяй пра тое, калі канкрэтна і пры якіх абставінах Валерый Меладзэ спяваў у 2021 годзе для старэйшага сына Аляксандра Лукашэнкі. Для таго, каб не лічыць прысутнасць на канцэрце зашкварам, ёй дастаткова таго, што ён з'ехаў з Расіі, не падтрымаў вайну, не даваў канцэрты на акупаваных тэрыторыях.

Лойка згадвае, што ў першай палове 2021 года яна сама «была ў розных месцах. І ў Нацбанку, і ў палатцы (Палаце прадстаўнікоў — НН), і міністэрствах». У той час, як яе калегі-журналісты з Белсата і Tut.by ужо знаходзіліся ў зняволенні.

«У гэты момант, дапусцім, Зяленскі працягваў размаўляць з Лукашэнкам, ведаючы, што Лукашэнка робіць са сваімі беларусамі. Усё-такі хуткасць рэакцыі на нейкія ўнутраныя рэчы досыць адрозніваецца ў вонкавых актараў.

Чаму Зяленскі не звяртаў увагу сусветнай супольнасці на тое, што ў 2021 годзе мучаць беларусаў? Таму што ў яго быў свой парадак дня, ён заняты быў сваімі справамі».

У той жа час, як заўважае Лойка, яна добра разумее пазіцыю людзей, якія асуджаюць тых, хто прысутнічаў на канцэрце. У якасці прыкладу яна звяртаецца да гісторыі фашысцкай Германіі.

«Вось я паглядзела, якія разборкі былі ў адносінах да музыкантаў фашысцкай Германіі. І нават калі суд цябе апраўдваў, усё роўна знаходзіўся які-небудзь умоўны Томас Ман, які казаў, што хлопцы, гэта зашквар. І музыку ўсіх гэтых штраусаў мы не можам слухаць, таму што ён падтрымліваў гітлераўскую Германію. Хаця было рашэнне суда, што не падтрымліваў».

Па словах аналітыка, стаўленне залежыць ад глыбіні траўмы, ад таго, дзе ў момант канкрэтнай падзеі знаходзіўся чалавек.

«Калі ты сам сядзеў у гэты момант у канцлагеры, то, напэўна, для цябе чалавек, які там нешта ў вярхах вырашае з уладамі, гэта зашквар. Ты не пойдзеш на яго канцэрт і не захочаш слухаць яго музыку», —

даводзіць сваю пазіцыю Лойка і дадае, што «жыццё трохі складаней уладкавана».

«У нас у кожнага сваё жыццё. І сутнасць яго не ў тым, што мы кагосьці павінны зрынуць ці задаволіць чыйсьці запыт. Мы жывём сваё жыццё так, як мы яго бачым і разумеем», — даводзіць Лойка і прапануе:

«Калі вас гэта так трыгерыць, ну спытаеце ў яго: «Валерый, тады ў 2021-м вам здавалася, што гэта ок?» Нам усім у 2021-м здавалася, што некаторыя рэчы ок».

Лойка адзначае, што не трэба ацэньваць падзеі мінулага з пазіцый сённяшняга дня:

«Не трэба заднім розумам. Мы ўсе перажывалі гэтую гісторыю ўпершыню. Я думаю, што калі б Меладзэ зараз вырашаў, ці спяваць яму на канцэрце ў Віці Лукашэнкі, напэўна, рашэнне было б іншым».

Лойка дапускае, што спявак, як і шмат хто з творчых людзей, на 2021 год «не быў у павестцы»:

«Мы чакаем ад музыкантаў, што яны ўцягнуты [ў падзеі грамадска-палітычнага жыцця] і ў парадак дня. А яны творчыя людзі, на сваёй хвалі».

• 18
• 7
• 3
• 11
• 0
• 1
• 3
• 1