Kavaleŭski: Treba addać naležnaje Donaldu Trampu — jon razvarušyŭ situacyju, prymusiŭ dziejničać

Drakachrust: Voś niekalki admietnych faktaŭ apošniaha času: vizit pradstaŭnika Dziarždepartamentu Krystafera Śmita ŭ Minsk, vyzvaleńnie troch palitviaźniaŭ, publikacyja ŭ NYT pra ambitny płan administracyi Donalda Trampa nakont vialikaha abmienu — vyzvaleńnie palitviaźniaŭ na asłableńnie sankcyjaŭ. Publikacyja źjaviłasia 15 lutaha. Z taho času byli niejkija kroki ŭ realizacyi hetaha płanu?

Kavaleŭski: Tak, sapraŭdy, płan dosyć ambitny. Ale pakul što ŭ nas jość infarmacyja vyklučna ad The New York Times, to-bok heta nie aficyjnaja krynica. Ni biełaruski, ni amierykanski baki nijakim čynam nie kamientavali jaje. Ale nie było i niejkaha abviaržeńnia hetaj infarmacyi.

A toje, što my nie bačym publičnaj infarmacyi pra tyja kroki, jakija mahli b rabicca dziela realizacyi hetaha prajekta, hetaj ździełki, nie aznačaje, što ničoha nie robicca. Naadvarot, mnie zdajecca, što jakraz zaraz toj čas cišyni, jaki patrebny dla taho, kab uzhadnić peŭnyja elemienty hetaj damoŭlenaści: jak jana budzie vyhladać i jak vykonvacca. Ja nie ździŭleny. Naadvarot, mnie zdajecca, što tut usio raźvivajecca dosyć łahična.

Drakachrust: Letaś u demakratyčnych siłach Biełarusi stali vyrazna bačnyja dva pryncypova roznyja padychody: staŭka na sankcyi, na cisk na režym i jaho izalacyju, a z druhoha boku — staŭka na dyjałoh, na abmien pryznańnia režymu i vyzvaleńnia palitviaźniaŭ na asłableńnie sankcyjaŭ. Čutki pra novuju palityku amierykanskaj administracyi — ci pahłybili jany hety padzieł u šerahach biełaruskaj apazicyi?

Kavaleŭski: Ja jak raz naležu da druhoj płyni, jakaja vystupaje za toje, kab usio ž taki dypłamatyja była bolš aktyŭnaj, kab sankcyjami karystacca dziela vyzvaleńnia ludziej. Ja baču, što palityčnyja struktury (heta ofis Śviatłany Cichanoŭskaj, Abjadnany pierachodny kabiniet) usio ž taki padciahvajucca da hetaj pazicyi taksama, tamu što amierykancy zaraz iduć padobnym trekam. Heta taja realnaść, ź jakoj treba ličycca i procidziejničać joj davoli składana.

Drakachrust: A jak ža pryncypy?

Kavaleŭski: Ja dumaju, što pryncypy — heta važna. My nie admaŭlajemsia ad pryncypaŭ: treba vyzvalać ludziej, treba damahacca źmien u Biełarusi, abaraniać jaje niezaležnaść, adnaŭlać suvierenitet. Inšaja sprava, ci my pryznajem realnaść źmieny ŭ paradyhmie. I što my robim z hetymi źmienami? Ci adaptujem svaju palityku da hetaha novaha kantekstu? Demakratyčny ruch maje dosyć abmiežavany nabor instrumientaŭ, z dapamohaj jakich možna ŭpłyvać na situacyju ŭ Biełarusi. Ja vystupaju za toje, što hetyja źmieny patrebny, bo kantekst źmianiŭsia vielmi mocna i jaho niemahčyma ihnaravać.

Drakachrust: Litaralna ŭ apošnija dni my nazirali istotnyja źmieny ŭ palitycy ZŠA adnosna vajny va Ukrainie. Rezkaja razmova prezidentaŭ ZŠA i Ukrainy Trampa i Zialenskaha na minułym tydni, samit jeŭrapiejskich krainaŭ z udziełam Zialenskaha, prypynieńnie amierykanskaj vajskovaj dapamohi Ukrainie. Paśla razmovy Zialenskaha z Trampam Śviatłana Cichanoŭskaja napisała: «Vajna Rasii suprać Ukrainy — heta vajna suprać samoj svabody. Advažny narod Ukrainy zmahajecca nia tolki za ŭłasnuju budučyniu, ale i za svabodnuju, mirnuju i biaśpiečnuju Jeŭropu. Biełarusy na baku Ukrainy».

Jašče bolš vyraznaja pazicyja — u kiraŭnika NAU Paŭła Łatuški: «Heta fijaska nie Zialenskaha — toje, što adbyłosia ŭ Avalnym kabiniecie. A heta fijaska amierykanskaj dypłamatyi. Bolšaść lidaraŭ, palitykaŭ, jeŭrapiejskich demakratyj, demakratyčnych dziaržaŭ va ŭsim śviecie ŭśviadomili paśla hetaj hutarki, što ZŠA bolš nie źjaŭlajucca lidaram svabodnaha śvietu» A jakaja pazicyja ŭ hetym pytańni inšaj płyni ŭ demakratyčnych siłach? Ci vykazanaja jana?

Kavaleŭski: Ja nasamreč taksama adreahavaŭ u tonie, jaki byŭ padobny da taho pasta, jaki napisała Cichanoŭskaja. Ja padkreśliŭ, što ton razmovy byŭ niedastatkova pavažlivy. Ale ja dumaju, što vielmi zaŭčasna zaraz kazać pra toje, što Złučanyja Štaty bolš nie lidar svabodnaha śvietu.

Ja b nie śpiašaŭsia z takimi paśpiešlivymi acenkami. Hetaksama jak i kazać, što taktyka Złučanych Štataŭ u dasiahnieńni miru va Ukrainie adnaznačna projhryšnaja. Usio ž taki treba addać naležnaje Donaldu Trampu — jon razvarušyŭ hetu situacyju, prymusiŭ dziejničać i Rasiju, i Jeŭropu, i Zialenskaha.

• 4
• 5
• 0
• 2
• 0
• 0
• 3
• 0