Sud u Tbilisi admianiŭ rašeńnie Departamientu mihracyi Hruzii ab admovie ŭ prytułku pravaabaroncu Ramanu Kiślaku
Tbiliski haradski sud 26 sakavika ahučyŭ pastanovu ŭ spravie skarhi biełaruskaha jurysta i pravaabaroncy Ramana Kiślaka na admovu Departamientu mihracyi MUS Hruzii dać jamu mižnarodnuju abaronu. Pavodle pastanovy suda, prašeńnie Ramana ab prytułku musić być pierahledžanaje, piša «Biełsat».
«Sud admianiŭ rašeńnie Departamientu mihracyi MUS Hruzii ab admovie ŭ prytułku, ale nie zadavoliŭ patrabavańnia vydać mnie novy administratyŭna-pravavy akt ab statusie ŭciekača. Z dalejšymi krokami ŭ spravie ja vyznačusia ŭ najbližejšy čas razam z advakatkaj», — raspavioŭ Kiślak «Biełsatu».
Biełaruski juryst i pravaabaronca Raman Kiślak z 2021 hoda žyvie ŭ Hruzii. U 2023 hodzie jon paprasiŭ u hetaj krainie prytułku, adnak letaś atrymaŭ admovu.
Pakul pravaabaronca čakaŭ rašeńnia, u jaho skončyŭsia termin dziejańnia pašparta — ciapier biełarus nie moža vyjechać z Hruzii, a ŭ vypadku admovy ŭ prytułku i zahadu pakinuć terytoryju krainy ŭ jaho tolki adzin šlach — u Biełaruś, dzie jurystu pahražajuć źniavoleńnie i katavańni.
U 2024 hodzie Raman padaŭ skarhu na admovu Departamientu mihracyi ŭ abaronie ŭ Tbiliski haradski sud.
Jašče padčas pieršaha asnoŭnaha pasiedžańnia Raman razam z advakatkaj raspaviali pra sutnaść svajho pazovu i pra toje, čamu biełarus prosić prytułku. U vyniku na druhim asnoŭnym pasiedžańni Departamient mihracyi prezientavaŭ pravavoje zaklučeńnie, u jakim sa spasyłkaj na «Viasnu», BCHK i inšyja pravaabarončyja arhanizacyi pryznaŭ, što ŭ Biełarusi tym, kaho pieraśledujuć pavodle palityčnych artykułaŭ, moža pahražać śmiarotnaje pakarańnie.
Akramia taho, pradstaŭnica Departamientu na druhim pasiedžańni, sa słovaŭ Ramana, skazała, što jany pryznali, što pravaabaronca adpaviadaje kryteram, praduhledžanym Kanviencyjaj ab statusie ŭciekačoŭ, adnak statusu ŭciekača dać nie mohuć, bo Słužba biaśpieki Hruzii zajaviła, što Raman ujaŭlaje saboj pahrozu nacyjanalnaj biaśpiecy i jahonaje znachodžańnie na terytoryi krainy niepažadanaje.
«My sprabavali vyśvietlić, chto prymaŭ takoje rašeńnie. Ja pytaŭsia, na jakich padstavach mianie pryznali pahrozaj. Ni ja, ni advakatka hetaha nie viedajem. Pradstaŭnica Departamientu, jakaja była na sudzie, taksama nie vałodaje hetaj infarmacyjaj. Heta dziaržaŭnaja tajamnica, i ŭ Departamiencie mihracyi da jaje maje dostup tolki adzin čałaviek. U sudzie hetyja sakretnyja dakumienty taksama jość, ale mnie nie daduć ź imi aznajomicca. Takim čynam, my, nie viedajučy pryčynaŭ dla pryznańnia mianie pahrozaj, sprabavali asprečyć usie hipatetyčnyja padstavy», — raspavioŭ pravaabaronca.
Što Raman raspaviadaŭ u sudzie
Tbiliskamu sudu Raman raspaviadaŭ pra svaju jurydyčnuju i pravaabarončuju dziejnaść, siabroŭstva ŭ Kaardynacyjnaj radzie Biełarusi.
«Ja kazaŭ, što heta ŭsio nie niasie nijakaj pahrozy ŭ tym liku dla Biełarusi, a tym bolš — dla Hruzii. Raspaviadaŭ, što my stvaryli dyjasparu i dapamahajem adzin adnamu, ale ŭ hetym taksama niama nijakaha kryminału. Raspavioŭ, jak źjazdžaŭ ź Biełarusi i što asnoŭnyja kryminalnyja spravy suprać mianie źjavilisia, kali ja ŭžo byŭ tut, u Hruzii, u 2023—2024 hadach, za Kaardynacyjnuju radu i za vybary ŭ jaje treci skład», — kaža pravaabaronca.
Akramia hetaha, Raman razam z advakatkaj źviartali ŭvahu suda na toje, jakija pahrozy isnujuć dla pravaabaroncy, kali jamu admoviać u prytułku.
«Pakul ja ŭ statusie prasiciela abarony, mianie nie mohuć ni departavać, ni ekstradavać. Kali mnie nie dajuć statusu, adpaviedna, ja stračvaju hetuju harantyju nievydvareńnia. I ŭ hetym prablema, — tłumačyć Raman. — Ja raspaviadaŭ, što čakaje tych, chto z palityčnych pryčynaŭ traplaje ŭ Biełarusi za kraty na padstavie apoviedaŭ byłych palitviaźniaŭ. Kazaŭ pra toje, jak ludziej katujuć i łamajuć, pra izalacyju, inkamunikada, kali čałaviek źnikaje i my navat nie viedajem, ci jon žyvy, pra ekstremiscki ŭlik i staŭleńnie da takich ludziej u kałonijach».
Asobna juryst kazaŭ pra toje, pra što, ź jahonych słovaŭ, u Hruzii ŭžo daŭno zabylisia, — śmiarotnaje pakarańnie, jakoje ŭ tym liku moža pahražać asudžanym pavodle palityčnych artykułaŭ u Biełarusi. Raman pryvodziŭ u jakaści prykładu historyju niemca Ryka Kryhiera.
«Jaho abmianiali, bo ŭ jaho niamieckaje hramadzianstva. U mianie takich šancaŭ na abmien nie było b, bo ŭ mianie tolki biełaruskaje hramadzianstva, — zaznačaje pravaabaronca. — Ja pracavaŭ u ramkach kampanii «Pravaabaroncy suprać śmiarotnaha pakarańnia», vioŭ piać spravaŭ, u jakich pradstaŭlaŭ asudžanych da śmiarotnaha pakarańnia biełarusaŭ u Kamitecie pravoŭ čałavieka AAN. Usich ich, na žal, rasstralali, choć Kamitet vyjaviŭ parušeńni, ź jakimi byli razhledžanyja ichnyja spravy. Heta ŭsio śviedčyć pra vializnuju ryzyku katavańniaŭ i navat śmiarotnaha pakarańnia pavodle palityčnych artykułaŭ. Na heta my z advakatkaj spasyłalisia, što pahroza mnie pieravyšaje hipatetyčnuju pahrozu ad mianie biaśpiecy Hruzii».
Bolš za 70 prašeńniaŭ ab prytułku i nivodnaha ŭchvaleńnia
Sa słovaŭ Ramana Kiślaka, za apošnija piać hadoŭ bolš za 70 biełarusaŭ padali prašeńnie ab nadańni mižnarodnaj abarony ŭ Hruzii. Ź ich bolš za 60 atrymali admovy. Šmat chto paśla admovaŭ pajšoŭ u sud. Adna siamja prajšła Tbiliski haradski sud i apielacyjny, i abodva adchilili skarhi. Situacyja hetaj siamji ŭskładnienaja tym, što dzicia, jakoje naradziłasia ŭ Hruzii, nie maje dakumientaŭ.
Pavodle Ramana, u takich vypadkach jość jašče nadzieja na mižnarodnyja instancyi — Jeŭrapiejski sud pravoŭ čałavieka, Kamitet pravoŭ čałavieka AAN, Kamitet suprać katavańniaŭ, Kamitet suprać rasavaj dyskryminacyi.
,«My ŭvieś čas dumajem i šukajem šlachi, jak dapamahčy biełarusam u takich situacyjach, chacia b paciahnuć čas, pakul buduć razhladacca spravy i ludzi zmohuć lehalna zastavacca ŭ krainie. Časam možna navat iznoŭ padacca na abaronu pavodle novych abstavinaŭ. Tady sprava budzie razhladacca nanoŭ. Heta składana, ale tyja, chto choča zastacca, šukajuć šlachi zmahańnia», — zaznačaje Raman.
Adnačasova šmat biełarusaŭ, źviazanych z aktyvizmam, źjazdžajuć z Hruzii, choć heta taksama niaprosta: vielmi składana apošnim časam atrymać vizy ŭ krainy Jeŭraźviazu.
«Ciapier i hruzinskim NDA niaprosta, a nam tym bolš — my pad bolš surjoznaj ryzykaj, bo hruzinskich hramadzianaŭ nie mohuć vydvaryć, a nas mohuć. U hetym sensie my ŭ bolš uraźlivym stanoviščy. Tamu ludzi źjazdžajuć, bo składana ź lehalizacyjaj, i ryzyki ŭzrastajuć», — kaža Raman.
Ad biełarusaŭ Hruzii časam možna pačuć pieraściarohi departacyi ŭ Biełaruś. Adnak na siońniašni momant Hruzija nie ekstradavała nivodnaha biełarusa, zaznačaje Raman.
«Jak budzie dalej raźvivacca situacyja, pradkazvać ciažka. Pahladzim. Mnie padajecca, hety hod budzie vyrašalnym, i ci sudy pačnuć davać abaronu, ci my ŭsie pojdziem u mižnarodnyja instancyi, i spravy raściahnucca jašče na dva-try hady», — reziumuje pravaabaronca.
Ciapier čytajuć
Mabilny Anžaliki Mielnikavaj z 19 sakavika znachodzicca na terytoryi Biełarusi67
Kamientary