Lichačoŭ i parušalnikaŭ na elektrasamakatach u Minsku buduć vyjaŭlać palavyja kamandy

U 2024 hodzie ŭ Minsku vyjaŭlena i zabłakavana jak minimum 2400 parušalnikaŭ praviłaŭ karystańnia arendavymi elektrasamakatami. Pra heta raspavioŭ dyrektar adnaho z šerynhavych servisaŭ Alaksandr Kalada.

Kampanii praciahvajuć udaskanalvać praviły biaśpieki. Naprykład, dla abmiežavańnia chutkaści elektrasamakataŭ u horadzie ŭžo ŭviedzieny tak zvanyja «pavolnyja zony». Heta piešachodnyja vulicy i miescy masavaha skapleńnia ludziej.

Chutkaść da 15 km/h dla srodkaŭ piersanalnaj mabilnaści abmiežavanaja ŭ miežach centralnaj častki horada i 1-ha transpartnaha kalca. Heta vulicy Mielnikajte, Suchaja, Kalektarnaja, Śviardłova, Uljanaŭskaja, M. Bahdanoviča, Kazłova, Staražoŭskaja i praśpiekt Niezaležnaści.

Taksama abmiežavańni dziejničajuć u parku Pieramohi, kala Kamaroŭskaha rynku, u parkach imia N. Hrekavaj, Čaluskincaŭ, pobač z bujnymi handlovymi centrami i na niekatorych inšych placoŭkach. Tam samakaty albo aŭtamatyčna źnižajuć chutkaść da 10—15 km/h, albo spyniajucca, paviedamlajuć «Minsk-Naviny».

«Karystalniki nie zmohuć abyści hetaje abmiežavańnie. Akramia taho, pierad pačatkam pajezdki jany vybirajuć adzin z troch chutkasnych režymaŭ: «eka», «drajv» abo «sport». U apošnim maksimalnaja chutkaść dasiahaje 25 km/h, u «drajvie» — da 20 km/h, a «eka» dazvalaje jechać nie chutčej za 15 km/h», — raspavioŭ Kalada.

Kantrolem za vykanańniem PDR zajmajucca supracoŭniki milicyi, a kikšerynhavaja kampanija sa svajho boku fiksuje parušeńni praviłaŭ karystańnia servisam i nahadvaje pra biaśpieku. Najbolš častyja pryčyny błakirovak — pieradača kiravańnia samakatam dzieciam i pajezdki ŭdvaich na adnym srodku piersanalnaj mabilnaści.

Pavodle dziejučaha zakanadaŭstva, karystacca samakatami dazvalajecca z 14 hadoŭ. Adnak kikšerynhavyja servisy abmiažoŭvajuć dostup da arendy dla niepaŭnaletnich.

«Elektrasamakaty dastupnyja tolki tym, kamu spoŭniłasia 18 hadoŭ. Kali ž dzicia ŭsio ž skarystałasia im, značyć, kiravańnie jamu pieradaŭ biezadkazny darosły — i heta padstava dla błakiroŭki akaŭnta. Pavodle našaj statystyki, siaredni ŭzrost karystalnika samakata — 27 hadoŭ», — paviedamiŭ Kaleda.

Parušalnikaŭ vyjaŭlajuć śpiecyjalnyja palavyja kamandy, jakija sočać za vykanańniem praviłaŭ. Akramia taho, kampanija reahuje na sihnały DAI i zvyčajnych haradžan.

Dla praduchileńnia vykarystańnia adnaho samakata dvuma ludźmi šerynhavyja kampanii raspracavali prahramu «Antytandem». Jana analizuje bolš za 50 paramietraŭ ruchu: źmieny bałansu, manieru kiravańnia, vibracyi płatformy i inšyja fizičnyja pakazčyki. Štučny intelekt apracoŭvaje hetyja dadzienyja ŭ realnym časie. Kali vyjaŭlajecca dva pasažyry na adnym samakacie, jon aŭtamatyčna źnižaje chutkaść.

• 1
• 0
• 1
• 0
• 0
• 0
• 0
• 0