Інваліду з Кобрына пагражае да сямі гадоў за «садзейнічанне экстрэмісцкай дзейнасці»
У 2016 годзе ў машыне Аляксандра Краўчука выбухнуў газавы балон — мужчыну адарвала нагу. Пасля гэтага ён няспынна змагаўся з беларускімі чыноўнікамі.
55-гадовы Аляксандр Краўчук родам з Кобрына. Да траўмы займаўся прадпрымальніцтвам. Мае дарослага сына і непаўналетнюю дачку.
Трагічная гісторыя здарылася з мужчынам у 2016 годзе. Аляксандр за пяць гадоў да гэтага набыў сабе ў Германіі «газавы» Volkswagen Touran 2006 года выпуску. У студзені 2014-га яму пазванілі з прадстаўніцтва афіцыйнага дылера Volkswagen «Атлант-М» і сказалі, што варта замяніць газавыя балоны — у Еўропе некалькі з іх выбухнулі. Брак быў на баку вытворцы аўто.
Аляксандру замянілі заднюю пару і сказалі чакаць на замену пярэдняй. Пазванілі яму толькі ў жніўні 2016 года, і яны з сынам і дачкой рушылі ў Мінск, каб замяніць балоны.
«Па дарозе я заехаў на запраўку. Усё як звычайна — газавы шланг у аўтамабіль, працэс пайшоў… Калі я прачнуўся, вакол стаяў лямант. Я прыўзняўся і пабачыў, што аўто разнесла ад выбуху. На шчасце, жонка і дзіця не надта пацярпелі, а мне аскепкамі адарвала нагу ніжэй за калена», — распавядаў Аляксандр выданню «Аўтабізнэс».
Пасля гэтага пачаўся бой Краўчука з чыноўнікамі. Той спрабаваў высветліць, хто панясе адказнасць за выбух балона, але ад яго паўсюль адмахваліся. Беларускія следчыя тады казалі, што ім складана прааналізаваць, што ж насамрэч адбылося — такіх выпадкаў у Беларусі да гэтага не было.
У выніку ён дамогся невялікіх кампенсацый для сябе і сына — 4000 і 400 даляраў адпаведна.
У апошнія гады Краўчук жыў у вёсцы Дзявяткі Кобрынскага раёна. Там ён спрабаваў добраўпарадкаваць дзедаву сядзібу. За тое, што вычысціў сажалку побач з домам, у 2019 годзе атрымаў штраф у 5500 рублёў — сажалка была дзяржаўная, таму, маўляў, права на гэты ён не меў.
Таксама ён дамагаўся вяртання ільготнага падатку на карыстанне зямлёй для інвалідаў. За год за 13 сотак пад гаражы ён мусіў плаціць дзве свае пенсіі. Прадаць, па яго словах, іх не выходзіла — пакупнікоў не было.
Дамагаўся і працы для сябе з дастойнай аплатай, даходзіў да міністраў. Апошнім вядомым месцам працы мужчыны была Кобрынская ветэрынарная станцыя, але адтуль ён 25 сакавіка 2021 года пайшоў у стачку.
Што-нішто зрабіць скаргамі насамрэч удавалася. Напрыклад, да сядзібы ў Дзявятках праклалі дарогу.
Праз актыўнасць Краўчука на яго перыядычна пісалі пасквілі праўладныя медыя. У 2021 годзе раёнка прысвяціла Аляксандру цэлы цыкл з некалькіх публікацый.
«Мясцовы аматар дзяржаўнай падтрымкі і «змагар» па перакананнях, вядомы нашым чытачам інвалід Аляксандр Краўчук», — так пісала пра яго афіцыйнае выданне.
Судовыя эпапеі ды пераслед Краўчука працягваліся. У 2023-м яго як мінімум адзін раз штрафавалі за «распаўсюд экстрэмізму» і адзін раз за «няправільнае выкарыстанне зямельных рэсурсаў». Таксама за апошнія два гады прайшло некалькі судоў, па якіх ён дамагаўся кампенсацыі за выбух машыны, праз які ён стаў інвалідам. Вынік іх невядомы.
Невядома таксама, ці затрыманы цяпер Аляксандр або знаходзіцца пад хатнім арыштам. Апошнюю скаргу разгледзелі 18 мая 2024 года, акурат на «прымяненне затрымання, заключэння пад варту ці хатняга арышту або працягу тэрміна ўтрымання».
Суд над кобрынцам пачнецца 22 кастрычніка ў Брэсцкім абласным судзе. Яго абвінавачваюць у «садзейнічанні экстрэмісцкай дзейнасці». Судзіць яго будзе старшыня суда Любанскага раёна Андрэй Сіз.
Аляксандру Краўчуку пагражае да сямі гадоў калоніі. Сутнасць абвінавачанняў невядомая.
«Наша Нiва» — бастыён беларушчыны
ПАДТРЫМАЦЬ
Цяпер чытаюць
Фёдар Віктаравіч і «Віктар Фёдаравіч». Супрацоўнік «Варгеймінга» мае пашпарт прыкрыцця. Яго жонка Вольга Сямашка — вядомая журналістка15
Каментары