Дачка міліцэйскага начальніка з Гродна расказала, як сядзіць у турме ў Непале прысуджаныя 15 гадоў
Аліне Алдошынай прысудзілі велізарны тэрмін за кантрабанду какаіну, яна адбывае пакаранне ў турме Катхманду. Яе бацька прылятаў у Непал, каб выцягнуць дачку, але ў яго нічога не атрымалася.
Вы маглі чытаць захапляльную гісторыю Аліны яшчэ ў канцы 2019 года. Тады яна, дачка тагачаснага першага намесніка начальніка міліцыі Ленінскага раёна Гродна Аляксея Алдошына, была арыштаваная ў аэрапорце Катманду з 6 кілаграмамі какаіну, схаванага ў зімовай куртцы. Разам з ёй быў затрыманы яе сябар Павел Васільеў.
Чытайце:У Непале затрымалі дваіх маладых беларусаў з 6 кілаграмамі какаіну
Какаін знайшлі падчас надгляду багажу беларусаў у аэрапорце. Маладыя людзі прыляцелі з Турцыі і ў той жа дзень павінны былі сесці ў самалёт на Ганконг.
Як сцвярджалі Аліна і Павел, пра какаін яны нават не здагадваліся, думалі, што ў куртках штосьці іншае. А на перавозку куртак пагадзіліся, бо хацелі хутка зарабіць грошай.
На допыце ў паліцыі беларусы расказалі, што тавар ім перадалі двое грамадзян Балівіі падчас сустрэчы ў гатэлі. Гарадзенцам абяцалі за працу $2000.
За кантрабанду наркотыкаў маладзёны атрымалі па 15 гадоў зняволення.
Аказваецца, Аліна па-ранейшаму знаходзіцца ў Непале — натуральна, у турме. Чаму яна не стала экстрадавацца ў Беларусь, незразумела. Магчыма, існуюць абмежаванні з непальскага боку. Магчыма, яна палічыла, што ўмовы ў гомельскай калоніі будуць горшыя, чым у Азіі, і вызваліцца яна пазней.
Як мінімум у непальскай турме зняволеныя могуць карыстацца тэлефонам. Таму Аліна расказвае ў сацсетках пра сваё жыццё ў турме і збірае тысячы рэакцый падпісчыкаў.
«Падзялюся нязначным фактам пра сябе: я адбываю пакаранне ў непальскай турме. Так, у мяне ёсць тэлефон, тут добра развіта карупцыя. Тое, што я зрабіла — гэта кончаны ўчынак, і я ні разу сябе не апраўдваю (да хэйту гатова), але хацела запытацца, ці будзе вам цікава даведацца пра жыццё непальскіх зняволеных, ды і пра непальцаў у сукупнасці?», — напісала Аліна ў Threads.
Так выглядае пакой дзяўчыны, у якім яна жыве разам з суседкай. «У турме лепшыя ўмовы, чым у некаторых непальцаў дома, плюс іх кормяць, таму [непальцы] і не збягаюць [з турмы]», — напісала Аліна ў каментарах.
Дзяўчына дадала, што ёй засталося сядзець яшчэ каля 5 гадоў, яна спадзяецца выйсці па ўмоўна-датэрміновым. Яе бацька Аляксей Алдошын прылятаў у Непал, спрабаваў выцягнуць дачку з турмы, але нічога не атрымалася. «Яму толькі суму кругленькую назвалі і ўсё», — напісала Аліна. Дарэчы, цяпер у яе бацькі іншая пасада, але незразумела якая. Аднак дзяўчына запэўнівае, што ён застаўся ў міліцыі.
Дзяўчына паказала, што ў непальскай турме даюць на вячэру: рыс, паліты гарохавым супам, шпінат і грыбы. «Хто вегетарыянец, мне здаецца, гэта вельмі смачна і карысна, я таксама ўжо прывыкла», — кажа яна ў відэа.
Непал — горная краіна. Натуральна, што і турма знаходзіцца ў гарах. Кожную раніцу Аліна можа глядзець на горы.
Цяпер чытаюць
Фёдар Віктаравіч і «Віктар Фёдаравіч». Супрацоўнік «Варгеймінга» мае пашпарт прыкрыцця. Яго жонка Вольга Сямашка — вядомая журналістка15
Каментары