«Hublaju 300 rubloŭ u miesiac». Ajcišniki z zarobkam u dalarach narakajuć na padzieńnie kursu

Ajcišniki z Polščy chvalujucca i nie suprać abmierkavać pierachod na złotyja, a ŭ Biełarusi vierać, što dalar adnovicca.

Artur, frontend, dośvied u IT — 5+ hadoŭ, žyvie ŭ Minsku. Dla jaho padzieńnie dalara «nie adčuvalnaje», bo zarpłata — «tolki adna z krynic» dachodu.

— Usie vialikija vydatki i pakupki i tak, i tak pryviazanyja da dalara. A štodzionnyja pakupki, takija jak pradukty, — nie samy vialiki artykuł raschodaŭ u miesiac, — kaža jon.

Artur ličyć, što chvalavacca i niešta rabić nie varta: «na doŭhaj dystancyi rubiel budzie tańnieć, a inflacyja dalara — nižej».

Andrej (raspracoŭščyk, u IT — 6 hadoŭ) taksama žyvie i pracuje ŭ Biełarusi, zarpłata ŭ jaho ŭ dalarach — ale vypłačvajuć u rublach pa kursie.

— Prasiadańnie dalara, kali i chvaluje, dyk nie nastolki, kab pieraškadžała spać. Ja tut [u Biełarusi] usio žyćcio pražyŭ, šmat čaho bačyŭ — i nie vielmi vieru ŭ toje, što rubiel u siaredniaj i doŭhaterminovaj pierśpiektyvie (ad 1 hoda) zdolny vystupać jak nadziejny srodak nazapašvańnia. Da IT prosta adkładać nie było čaho.

Usia hetaja situacyja z kursam chvaluje mianie, mabyć, tolki tamu, što ceny ŭ «biełkach» vyraśli razam z kursam, a kali kurs pačaŭ padać — nazad uniz jany nie pajšli. Tak što adzinaje, što ja «straciŭ», možna skazać, — heta peŭnaja prasiadańnie majoj zarpłaty pa pakupnickaj zdolnaści. Zanačka ž ničoha nie straciła — jana jak była ŭ jeŭra i dalarach, tak i zastałasia.

Kali ščyra, ja navat nie viedaju, što tut možna skazać: kab chvalavacca z-za padzieńnia kursu dalara, treba mocna vieryć u biełaruski rubiel, a ŭ jaho nie vieryć navat Nacbank. Tak, niepryjemna, ale nie krytyčna — voś jak. Tym bolš, ja padazraju, što ciaham hoda-dvuch dalar svajo adyhraje.

Padobnuju pazicyju vykazvaje i Alaksandr —.NET-raspracoŭščyk (dośvied u IT — 7 hadoŭ) ź Minska.

— Niepryjemna — ceny ž ad hetaha nie źnižajucca. Ale jość nadzieja, što dalar u pierśpiektyvie ŭmacujecca, jak jon zvyčajna heta rabiŭ. Ja ŭ siarednim stračvaju 300 rubloŭ ad zarpłaty pry prasadcy kursu dalara na 0,1 — ale raduje choć toje, što i za kvateru ciapier płacić mienš.

Vital — top-mieniedžar, u IT — 7 hadoŭ, «apošnija 4 hady jaho zarpłata pryviazanaja da dalara». Žyvie i pracuje ŭ Biełarusi.

— Padzieńnie kursu dalara mianie nie turbuje, bo tady ja radujusia za ŭsich, a kali dalar raście — ja radujusia za siabie.

Alaksandr — raspracoŭščyk na Go (4 hady dośviedu ŭ IT). Jon pracuje ŭ Biełarusi.

— Nie čakaŭ takoj mocnaj prasadki dalara. Ale vieru, što heta časova i kurs vierniecca na ŭzrovień 3,2—3,3, kali nie vyšej.

Viadoma, straty adčuvajucca, bo ŭ rublach suma vychodzić mienš, a ceny zastajucca na miescy. Adnak raduje, što arenda kvatery taksama pryviazanaja da dalara.

Alaksandr kaža, što na jaho štodzionnyja vydatki padzieńnie kursa dalara nie paŭpłyvała — «chiba što trochi mienš valuty mahu kupić».

Raman (Full Stack QA, 4+ hady ŭ IT) kaža, što pieražyvaje z-za padzieńnia kursu dalara.

— Kali byŭ rost z 3,1 da 3,5 — heta było jak pavyšeńnie zarpłaty na +15% na roŭnym miescy. Pasłuhi i tavary tady nie źmianialisia ŭ košcie, tamu pavyšeńnie było pryjemnaje, a adkat — naadvarot. Ja jašče i stračvaju, kali raspłačvajusia kredytkaj (jaje vyhadna vykarystoŭvać, kali kurs dalar raście).

Zarpłata Mikity (jon frontend-raspracoŭščyk z dośviedam u IT 4 hady, žyvie va Urocłavie) pryviazanaja da dalar.

— Ja pierajechaŭ ź Biełarusi krychu bolš za paŭtara hoda tamu — tady kurs dalara da złotaha byŭ 4,3, ciapier — 3,8. Usie nazapašvańni — u dalarach.

Ceny ŭ Polščy mnie spačatku zdavalisia nižejšymi za biełaruskija (ja havaru nie pra ježu, a pra rečy — knihi, nastołki). Byli dumki pra kuplu žylla, ale ciapier daviadziecca adkłaści. My ź dziaŭčynaj užo žartujem, što tolki jana ŭ našaj pary zarablaje narmalnyja hrošy, bo jaje zarpłata ŭ złotych.

Jaki vychad: pieravieści zarpłatu ŭ złotyja nie atrymajecca, bo ja pracuju na amierykanskuju kampaniju. Pačaŭ chadzić na sumoŭi — ale heta, kali ščyra, nie źviazana z prasadkaj kursu dalara. Ja ŭsio jašče ŭpeŭnieny, što jon adnovicca da 4, Tramp ža nie viečny.

Jašče my ź dziaŭčynaj abmiarkoŭvajem na słovach, što treba b pačać ekanomić, ale nasamreč nijakich źmien nie adbyłosia.

Jašče adzin Andrej (praduktovy mieniedžar, bolš za 15 hadoŭ u IT) žyvie ŭ Polščy. Prasadka kursu dalara jaho «pakul nie turbuje, ale kali jon apuścicca nižej za 3,5 — tady budu niervavacca».

— Opcyi pieravieści apłatu ŭ złotyja niama, bo ja pracuju na amierykanskuju kampaniju. Kamanda ŭ nas nie prosta polskaja — bolšaść supracoŭnikaŭ z adnaho horada. Napeŭna, dalar praciahnie padać, i my budziem abmiarkoŭvać karekciroŭku zarpłaty na ŭzroŭni kamandy.

Andrej pryznaŭsia, što źbieražeńni ŭ jaho prykładna roŭnymi častkami zachoŭvajucca ŭ dalarach, jeŭra i złotych. «Ale suadnosiny troški mianiajucca. Naprykład, adzin z papiarednich pracadaŭcaŭ płaciŭ u jeŭra — i tady padrasła jeŭravaja paduška. Ciapier raście dalaravaja».

• 0
• 1
• 2
• 0
• 0
• 0
• 0
• 0