Pad Varšavaj palicyja zatrymała 30-hadovaha hramadzianina Biełarusi na kradzienaj mašynie i ź vialikim zapasam narkatyčnych srodkaŭ, piša «Radyjo Svaboda».
Pavodle infarmacyi palicyi, mužčyna kiravaŭ aŭtamabilem Mercedes, skradzienym u Ispanii. Jaho zatrymali, kali jon vychodziŭ z hetaj mašyny. Pry zatrymańni mužčyna sprabavaŭ uciačy i akazaŭ supraciŭleńnie.
Padčas pravierki vyjaŭlena, što dakumienty na aŭtamabil byli padroblenyja — mašyna była aformlena ŭ Polščy, ale VIN-numar śviedčyŭ, što jaje skrali ŭ Ispanii ŭ listapadzie 2024 hoda.
Pry vobšuku ŭ kvatery zatrymanaha i ŭ inšym aŭtamabili, jaki jamu naležaŭ, palicyja vyjaviła ahułam 92 kiłahramy narkatyčnych rečyvaŭ. U pryvatnaści, u horadzie Zombki pad Varšavaj u adnym z Mercedes znajšli bolš za 53,5 kh marychuany, amal 15,5 kh amfietaminu i kala 2,7 kh tabletak MDMA.
U kvatery, dzie žyŭ mužčyna, znajšli bolš za 20 kh hašyšu. Akramia taho, u mašynie, na jakoj jon pierasoŭvaŭsia, byli znojdzienyja zbroja i hrašovyja srodki ŭ jeŭra i złotych.
Sud pryniaŭ rašeńnie ab źmiaščeńni biełarusa pad vartu. Jamu vystaŭlenyja abvinavačvańni pa čatyroch artykułach Kryminalnaha kodeksa.
Palicyja taksama pravodzić pravierku, jak mužčynu ŭdałosia zarehistravać u Polščy aŭtamabil, jaki byŭ skradzieny ŭ Ispanii.
Kamientary