Tanki zamiest aŭtamabilaŭ. VPK zamianiaje aŭtapramysłovaść u jakaści hałoŭnaha ruchavika ekanomiki Hiermanii

Paśla Druhoj suśvietnaj vajny sajuźniki likvidavali avijacyjnuju halinu Hiermanii, paśla čaho mnostva vysakakłasnych inžynieraŭ i raspracoŭščykaŭ, straciŭšy pracu, zanialisia vytvorčaściu aŭtamabilaŭ. Takaja źmiena dziejnaści stała adnym z hałoŭnych faktaraŭ, jakija zabiaśpiečyli pieratvareńnie aŭtamabilnaj pramysłovaści FRH u suśvietnaha lidara.

Paśla troch mirnych dziesiacihodździaŭ, jakija nadyšli paśla zakančeńnia ŭžo chałodnaj vajny, abaronny siektar krainy apynuŭsia ŭ «zahonie». Ale paśla troch hadoŭ vajny va Ukrainie i na fonie admovy novaj administracyi ZŠA ad namahańniaŭ pa harantavańni jeŭrapiejskaj biaśpieki pačaŭsia zvarotny praces.

Niamiecki VPK zabiraje palmu pieršynstva ŭ aŭtamabilnaha siektara, jaki, budučy mocna aryjentavany na ekspart, paciarpieŭ ad zapavoleńnia kitajskaj ekanomiki i prajhraŭ kitajskim ža kankurentam na rynku elektramabilaŭ. Na fonie pieršaha za 80 paślavajennych hadoŭ rašeńnia Volkswagen skaracić pracoŭnyja miescy ŭ Hiermanii vytvorcy tankaŭ, radaraŭ i inšych vidaŭ uzbrajeńniaŭ rychtujucca zabiaśpiečyć novy ŭzdym ekanomiki krainy.

Rheinmetall, najbujniejšaja abaronnaja kampanija Hiermanii, paviedamiła na minułym tydni, što pieraprafiluje dva zavody, jakija vyrablajuć aŭtamabilnyja detali; jany pačnuć vypusk zbroi. Kampanija Hensoldt, jakaja vyrablaje radarnyja sistemy TRML-4D, što vykarystoŭvajucca Ukrainaj u vajnie z Rasijaj, viadzie pieramovy ab pryniaćci na pracu kala 200 rabočych z bujnych pastaŭščykoŭ aŭtazapčastak Bosch i Continental. Rheinmetall taksama choča pieravieści z Continental kala 100 supracoŭnikaŭ.

«Ciažkaści ŭ aŭtamabilnaj pramysłovaści dla nas abiarnulisia vyhadaj, — skazaŭ Reuters hiendyrektar Hensoldt Olivier Dziore, dadaŭšy, što dalejšyja inviestycyi dazvolać pavialičyć štohadovuju vytvorčaść radaraŭ bolš čym udvaja da 25-30 adzinak. — My pavinny razhladać abaronnuju pramysłovaść jak ruchavik ekanomiki Hiermanii, jana budzie adyhryvać bolš značnuju rolu, čym raniej».

VUP Hiermanii skaraciŭsia ŭ 2023-2024 hadach i praktyčny nie źmianiŭsia z 2019 hoda. Pry hetym spad pramysłovaj vytvorčaści skłaŭ 11% z dapandemijnaha ŭzroŭniu, pavodle danych Fiederacyi niamieckaj pramysłovaści.

Volkswagen płanuje likvidavać 35 000 pracoŭnych miescaŭ u Hiermanii da 2030 hoda i skaracić vypusk bolš čym na 700 000 mašyn u hod. Continental choča da kanca hoda vyłučyć prablemnaje aŭtamabilnaje padraździaleńnie ŭ asobnuju kampaniju.

Pavodle acenki Kilskaha Instytuta suśvietnaj ekanomiki, VUP Jeŭrasajuza moža dadatkova raści na 0,9-1,5% u hod, kali ES pavialičyć abaronnyja vydatki da 3,5% VUP ź ciapierašnich 2%. Pryčym dla Hiermanii ź jaje raźvitaj pramysłovaj infrastrukturaj tempy rostu buduć kala vierchniaj miažy hetaha dyjapazonu, miarkuje ekanamist instytuta Jachanes Binder:

«U siarednieterminovaj i doŭhaterminovaj pierśpiektyvie, i pra heta śviedčyć, u pryvatnaści, amierykanskaja ekanamičnaja historyja, takija vajskovyja vydatki mohuć prynieści značnyja vyhady ŭ tym, što tyčycca pradukcyjnaści, spadarožnych efiektaŭ i technałahičnych dasiahnieńniaŭ».

Vykarystańnie svabodnych mahutnaściaŭ u aŭtasiektary dapamoža zachavać najaŭnuju vytvorčuju infrastrukturu Hiermanii i pavialičyć vypusk vajskovaj techniki, ličyć Dziore.

Frydrych Mierc, jaki nieŭzabavie stanie kancleram Hiermanii, adrazu paśla pieramohi svajoj partyi na vybarach 23 lutaha pačaŭ pieramovy ab stvareńni kaalicyi i farmiravańni fondu na 200 miljardaŭ jeŭra dla inviestycyj va Uzbrojenyja siły z metaj supraćstajać rasijskaj ahresii, stvaryć niezaležnuju ad ZŠA sistemu jeŭrapiejskaj abarony i padtrymać Ukrainu. Ale takoje značnaje pavieličeńnie vydatkaŭ niemahčyma bieź źniaćcia kanstytucyjnaha abmiežavańnia na pryciahvańnie pazyk: ciapier biudžety fiederalnaha ŭrada i ziemlaŭ pavinny być u pryncypie zbałansavanyja, zapazyčańni nie mohuć pieravyšać 0,35% VUP u hod.

Viečaram 4 sakavika Mierc damoviŭsia z sacyjał-demakratami, jakija pakul jašče ŭznačalvajuć urad, ale, jak čakajecca, uvojduć u jahonuju budučuju kaalicyju, adnosna źmieny hetaha stanovišča. Na nastupnym tydni jany ŭniasuć u Bundestah zakonaprajekt, jaki praduhledžvaje, što vydatki na abaronu zvyš 1% VUP nie buduć padpadać pad daŭhavoje abmiežavańnie.

Akramia taho, budzie prapanavanaja jašče adna kanstytucyjnaja papraŭka z metaj stvaryć fond na 500 miljardaŭ jeŭra dla inviestycyj u infrastrukturu Hiermanii na praciahu 10 hadoŭ.

«Jeŭropie nieabchodna ŭmacoŭvać abaronu, — zajaviŭ Mierc. — Paśla taho, jaki vybar apošnim časam zrabiŭ amierykanski ŭrad, bolš nielha adkładać nieabchodnyja pastanovy, asabliva ŭ dačynieńni da fiederalnaha biudžetu».

Džordž Saraviełas, dyrektar pa stratehii na suśvietnych valutnych rynkach Deutsche Bank, vitaŭ hetaje rašeńnie:

«Lidary novaj kaalicyi pradstavili płan najbujniejšych i samych chutkich źmienaŭ u biudžetnaj palitycy za ŭsiu historyju Hiermanii paśla abjadnańnia. Jon pierasiahnuŭ našy samyja aptymistyčnyja čakańni».

Reuters pryvodzić inšyja prykłady pieratoku dziełavoj aktyŭnaści z aŭtamabilnaha siektara ŭ abaronny: kampanija ZF Friedrichshafen, jakaja prachodzić restrukturyzacyju ŭ ramkach pracedury bankructva, jakaja moža pryvieści da zakryćcia zavodaŭ u Hiermanii, abmiarkoŭvaje pieravod rabočych na abaronnyja pradpryjemstvy.

Vytvorca karobak pieradač dla tankaŭ Renk, čyj kantrolny pakiet akcyj naležyć Volkswagen, paviedamiŭ, što ŭ apošni čas pryhladajecca da aŭtamabilnaha siektara z namieram pašyryć vytvorčyja mahutnaści. Niamiecka-francuzski pastaŭščyk abarončych sistem KNDS niadaŭna nabyŭ u francuzskaj Alstom tramvajny zavod, na jakim płanuje vypuskać tanki Leopard 2 i bajavyja mašyny piachoty Puma.

• 16
• 1
• 1
• 0
• 2
• 0
• 0
• 0