«Dla nas 8 sakavika pačynajecca jašče letam». Hrodziency prosta ŭ svajoj chacie vyraścili 15 tysiač ciulpanaŭ
Voś užo bolš za 10 hadoŭ Iryna i Dźmitryj stvarajuć śviata dla žycharak Hrodna. Ciulpany dla bukietaŭ vyroščvajucca ŭ siamiejnaj aranžarei, raźmieščanaj u adnym z rajonaŭ pryvatnaj zabudovy horada, piša Newgrodno.by.
Na kalendary jašče zima, ale ŭ tych, chto zajmajecca kvietkami, pačynajecca samaja haračaja para. Padrychtoŭka ŭžo vyjšła na finišnuju pramuju, a napiaredadni śviata uvohule pačnucca biassonnyja nočy. Iryna znajšła čas, kab raskryć sakrety vyroščvańnia hałoŭnaha atrybutu 8 sakavika.
«Kali hladzieć zboku, to padajecca, što ničoha składanaha ŭ hetym niama. Pasadziŭ cybuliny, sabraŭ uradžaj, pieraličyŭ prybytak i adpačyvaješ», — pa ŭśmiešcy Iryny možna zrazumieć, što na spravie ŭsio kudy składaniej.
Sustrelisia ź joj prosta ŭ siamiejnaj aranžarei. Tut kvietki vyroščvajuć nie ŭ ciaplicy, a prosta ŭ chacie!
Dla hetych metaŭ prystasavali adzin z samych vialikich pakojaŭ na druhim paviersie. Raniej hetaje pamiaškańnie z voknami praktyčna pa kole vykarystoŭvali dla vialikich siamiejnych śviataŭ, a bolšuju častku hoda płoščy prosta pustavali.
«Ciulpanami zajmajucca baćki Dzimy. Tamu nielha skazać, što my ŭvajšli ŭ śfieru zusim užo biez vopytu. Choć i nam daviałosia prajści svoj šlach sprobaŭ i pamyłak», — pryznajecca Iryna.
Jana raskazvaje, što dla bolšaści ludziej padrychtoŭka da 8 sakavika pačynajecca zvyčajna ŭ kancy lutaha. Chtości zadumvajecca pra padarunak svajoj pałavincy, inšyja pačynajuć vyvučać, dzie nabyć bukiet.
«A dla nas 8 sakavika pačynajecca za šmat miesiacaŭ da śviata. Jašče ŭ krasaviku vyznačajemsia z sartami na nastupny siezon. Zakazvajem ich u pastaŭščyka. Uletku zakuplajem cybuliny. Pierad pasadkaj ich treba pravilna astudzić: u nas u roli refryžeratara vystupaje sklep», — raskazvaje Iryna.
Darečy, prafiesijanały vykarystoŭvajuć cybuliny ciulpanaŭ tolki adzin raz. Na druhi hod nie ŭsie ź ich zdolnyja dać kvietki, tamu i nasienny materyjał abnaŭlajecca štohod.
U kastryčniku-listapadzie pačynajecca «pasiaŭnaja». Jość, darečy, niekalki varyjantaŭ vyroščvańnia ciulpanaŭ. U ciaplicach čaściakom vykarystoŭvajecca hidraponika, a voś Iryna i Dźmitryj vysadžvajuć cybuliny ŭ śpiecyjalny hrunt: heta sumieś torfu i piasku. Darečy, da svajho «receptu» hruntu pryjšli za niekalki hadoŭ.
«Heta vielmi pracajomki praces. Ujavicie, tut zvyš 200 skrynak, u kožnaj pa 70 cybulin, kožnuju ź jakich treba pasadzić uručnuju. Na ŭsio idzie niekalki dzion», — raskazvaje haspadynia kvietnika.
I dalej pačynajecca karpatlivy dohlad za kvietkami. Im treba zabiaśpiečyć i pravilnuju tempieraturu, i paliŭ, i aśviatleńnie. Ciulpany ŭ hetym płanie kapryznyja. Spačatku skrynki z kvietkami vytrymlivajuć pry 8-9 hradusach, zatym płaŭna pavyšajuć tempieraturu. Varta trochi pierahreć ci, naadvarot, niedahreć, i ŭsie raboty mohuć być marnymi…
I čym bližej da śviata, tym bolš uvahi patrabujuć kvietki. Za paru tydniaŭ da 8 sakavika pačynajecca samaja haračaja para: za hety čas bolš za 15 000 ciulpanaŭ treba akuratna zrezać, rasfasavać, spakavać zhodna z zajaŭkami i zakazami. Apošnija sutki pierad śviatami dakładna buduć biassonnymi. Inakš prosta nie paśpieješ usio zrabić.
Aptaviki zakazvajuć u siarednim pa 1000 ciulpanaŭ. Jak pakazvaje praktyka, mienavita stolki možna pradać z adnaho punktu ŭ horadzie za pieradśviatočnyja dni i samo śviata.
«A voś ludzi zvyčajna zakazvajuć ci pa adnoj kvietcy, naprykład, pavinšavać kaleh pa pracy ci adnakłaśnic, albo nievialikija bukieciki pa 3-5 kvietak. Choć u minułym hodzie adzin chłopiec paprasiŭ sabrać dla dziaŭčyny bukiet sa 105 ciulpanaŭ!», — uspaminaje Iryna.
Jana pryznajecca, što składaniej za ŭsio było spakavać kvietki.
«My nikoli nie adrazajem vialiki list ad ściabła. Ličym, što ź im kvietka vyhladaje bolš naturalna, choć abjom bukieta ŭ hetym vypadku surjozna pavialičvajecca. Dla ekanomii miesca niekatoryja tak robiać, choć klijenty, u tym liku i aptaviki, usio čaściej patrabujuć, kab kvietki byli ź vialikim listom», — praciahvaje haspadynia.
Jana pryhadvaje jašče adzin važny niuans. Litaralna za hod da śviata treba pradbačyć, jakija kolery buduć u topie pieravah u kupcoŭ. Koler ciulpana zaležyć ad jaho sortu. Sioleta ŭ siamiejnaj aranžarei vyraścili 15 roznych sartoŭ.
«Popyt zastajecca na kłasičnyja, čyrvonyja abo ružovyja ciulpany, a taksama na dvuchkolernyja varyjanty. A voś niekalki hadoŭ tamu byŭ sapraŭdny bum žoŭtych ciulpanaŭ. Za imi «palavali» litaralna ŭsio», — padkreślivaje Iryna.
Zhadali i pra jašče adnu situacyju. U 2023 hodzie ŭ Hrodnie zdaryŭsia ciulpanny deficyt. Da siaredziny dnia 8 sakavika ŭ horadzie razabrali ci ledź nie ŭsie kvietki. Da redkich punktaŭ, dzie jašče byli ciulpany, vystrojvalisia vielizarnyja čerhi, časam sprava ledź nie da bojki dachodziła…
«Tady ja vyklučyła telefon. Jon prosta razryvaŭsia ad prośbaŭ pradać choć niešta. Niekatoryja hatovyja byli vykłaści lubyja hrošy za bukiecik… Z toj situacyi zrabili vysnovy ŭsie, tamu ŭžo ŭ minułym hodzie kvietki zakuplali z zapasam», — uspaminaje Iryna.
I sioleta, upeŭnienaja jana, kvietak chopić usim. A što pa canie?
«Aryjentujemsia, što siaredni košt u roźnicu składzie 3,5 rubla. Chtości skaža, što heta doraha. Ale, ź inšaha boku, varta ŭličvać, kolki pracy ŭkładziena ŭ kožnuju kvietku», — kaža haspadynia.
Darečy, u hetym hodzie ŭpłyŭ na canu mohuć akazać i źmienienyja praviły pa prodažy kvietak. Naprykład, fizičnyja asoby mohuć realizoŭvać tolki tyja ciulpany, jakija vyraścili samastojna. I praviarajuć heta davoli surjozna.
Bieraściejec vyraściŭ 3 000 ciulpanaŭ u vielmi niezvyčajnym miescy
«Upaŭ na kaleni i zapłakaŭ». Ukłaŭ u ciaplicu ź ciulpanami bolš za 400 tysiač rubloŭ, a jana zhareła za adnu noč
Pad Pietrykavam vyraścili pieršyja ciulpany «elitnych hałandskich sartoŭ»
«Lepš žerci ciulpany budu». Fiermiery, jakija vyroščvajuć kvietki, burna abmiarkoŭvajuć novyja ŭmovy pracy
Ciapier čytajuć
«Ludzi chočuć pieramovaŭ z tymi, chto maryć ich źniščyć fizična». Hutarka z Alaksandram Kabanavym pra žyćcio, «Biełpoł» i razychodžańnie ź Piatruchinym88
Kamientary