U Asipovičach imkliva razbudoŭvajuć infrastrukturu. Imavierna, dla rasijskaj jadziernaj zbroi
Ułady Biełarusi imkliva razbudoŭvajuć vajskovuju infrastrukturu ŭ Asipovičach, śviedčyć analiz spadarožnikavych zdymkaŭ. Pavodle abarončych ekśpiertaŭ, mienavita tut mohuć raźmiaścić rasijskuju jadziernuju zbroju. Pra heta — u rasśledavańni «Svabody».
Asipovičy — horad u Mahiloŭskaj vobłaści z nasielnictvam 29 tysiač čałaviek za 100 kilametraŭ ad Miensku i za 190 kilametraŭ ad ukrainskaj miažy. Heta bujny čyhunačny vuzieł, jaki złučaje biełaruskuju stalicu adrazu z dvuma abłasnymi centrami — Homlem i Mahilovam — u kirunkach Ukrainy i Rasiei.
U horadzie i pobač ź im znachodziacca adrazu niekalki vajskovych abjektaŭ, źviazanych z artyleryjaj i rakietnymi vojskami. Hetaje miesca pryciahnuła da siabie ŭvahu hramadzkaści paśla zajavaŭ Pucina i Łukašenki ab pieradačy Biełarusi sučasnaha rasiejskaha rakietnaha kompleksu «Iskander» i stratehičnaj jadziernaj zbroi. Eksperty pahadžajucca ŭ dumcy, što i toje, i druhoje moža raźmiaścicca mienavita tut.
Analiz spadarožnikavych zdymkaŭ,ździejśnieny «Svabodaj», pakazvaje, što z pačatku poŭnamaštabnaj vajny va Ŭkrainie vajskovaja infrastruktura pad Asipovičami razbudoŭvajecca jašče bolš. Adrazu ŭ niekalkich miescach tut idzie budaŭnictva i abnaŭleńnie kazarmaŭ, składoŭ zachoŭvańnia zbroi, mahčymych novych anharaŭ dla «Iskanderaŭ» i inšaj specyjalnaj techniki. Budujecca asobnaja čyhunačnaja kalaina, jakaja budzie złučać usio heta pamiž saboju.
Svaboda atrymała i praanalizavała razam z ekspertami śviežyja spadarožnikavyja zdymki, zroblenyja kampanijaj Planet Labs u lutym 2025 hodu, a taksama infarmacyju ŭ adkrytym dostupie, kab zrazumieć, što ŭsio heta moža značyć.
«Iskander» — rasiejski aperatyŭna-taktyčny rakietny kompleks (ATRK). Jaho asnoŭnaje pryznačeńnie — naniasieńnie dakładnych udaraŭ pa klučavych abjektach praciŭnika, časam pry hetym abaronienych srodkami supraćpavietranaj abarony (kamandnyja punkty i vuzły suviazi, aeradromy, abjekty infrastruktury, kancentracyi vojskaŭ i techniki i tak dalej). Aficyjny radyjus dziejańnia rakiet «Iskander-M» — da 500 km. Heta značyć, rakiety, raźmieščanyja ŭ Biełarusi, mohuć pahražać praktyčna ŭsioj terytoryi Polščy, Litvy i Łatvii, a taksama bolšaj častcy terytoryi Ŭkrainy.
Budaŭnictva ŭ Asipovičach
Ułady Biełarusi nazyvajuć Asipovičy «stalicaj artyleryi». U samim horadzie ŭ hety momant znachodziacca prynamsi try vajskovyja bryhady, źviazanyja z hetym rodam vojskaŭ: 51-ja hvardziejskaja artyleryjskaja bryhada, 336-ja reaktyŭnaja artyleryjskaja bryhada i 465-ja rakietnaja bryhada.
Rakietny kompleks «Iskander-M», zdolny vykarystoŭvać jadziernyja bojehałoŭki, imavierna, znachodzicca na ŭzbrajeńni 465-j rakietnaj bryhady. U Biełaruś zavieźli jak minimum dva dyvizijony takich kompleksaŭ — takuju infarmacyju ahučyŭ Łukašenka ŭ lutym 2024 hodu.
Standartny skład dyvizijonu «Iskander-M» rasiejskaj armii ŭklučaje ŭ siabie 2 rakietnyja batarei — kala 12 bajavych mašyn roznaha typu pryznačeńnia (kamandna-štabnaja mašyna, mašyna žyćciezabieśpiačeńnia, samachodnaja puskavaja ŭstanoŭka z rakietami, transpartna-zaradžalnaja mašyna, ruchomy punkt rychtavańnia infarmacyi i mašyna rehlamentu i techničnaha absłuhoŭvańnia). To bok dva dyvizijony Biełarusi — heta prykładna 24 vajskovyja mašyny, 8 ź jakich niasuć na sabie rakiety.
Pad takuju kolkaść mašyn u asipovickaj vajskovaj častcy № 12147 z kastryčnika 2022 hodu pačali budavać novyja anhary. Adzin ź ich uźviali letam 2023-ha, a z vosieni 2023 hodu zakłali padmurki jašče dvuch. Pavodle našych padlikaŭ, adzin anhar źmiaščaje ŭ sabie adzin dyvizijon «Iskander-M». Heta aznačaje, što ŭ asipovickaj vajskovaj častcy ciapier možna budzie raźmiaścić try takija dyvizijony, što faktyčna budzie składać novuju poŭnuju vajskovuju bryhadu. Jana moža stać užo čaćviortaj u Asipovičach.
Spadarožnikavy zdymak Asipovičaŭ za 25 lutaha 2025 hodu, jaki atrymała Svaboda, śviedčyć, što budaŭničyja pracy na terytoryi vajskovaj častki na finalnaj stadyi. Akramia dadatkovych anharaŭ dla «Iskanderaŭ», ź lipienia 2023 hodu tut pabudavali try budynki-schoviščy dla vajskovych mašyn i majomaści, zrabili rekanstrukcyju zakinutaha budynka kazarmy, składu i administracyjnaha budynka, a taksama raźmiaścili spartovy kompleks z paŭnavartasnym futbolnym polem.
Taksama ŭ paŭnočna-zachodniaj častcy Asipovičaŭ, na byłoj terytoryi vajskovaj častki, budujuć adrazu niekalki vyšynnych šmatkvaternych damoŭ i novuju vialikuju škołu z stadyjonam. Abjadnańnie byłych biełaruskich siłavikoŭ BelPol raniej publikavała infarmacyju pra toje, što prynamsi dva damy pad adrasami vulica Kryłoviča, 32 i Kryłoviča, 34 buduje «Ŭpraŭleńnie kapitalnaha budaŭnictva Ŭzbrojenych siłaŭ Biełarusi». Zhodna z apublikavanym BelPol dakumentam, usie pracy adbyvajucca na padstavie ŭkazu Alaksandra Łukašenki № 289s ad 20 vieraśnia 2023 hodu ŭ karotkija terminy.
14 sakavika 2025 hodu Asipovicki rajony vykanaŭčy kamitet paviedamiŭ, što klučy ad 72 kvater u domie na vulicy Kryłoviča, 32 užo pieradali vajskoŭcam. Dom nazvali «arendnym» i padnačalenym Ministerstvu abarony Biełarusi. U domie, jak paviedamlajecca, «buduć žyć pradstaŭniki ŭsich vajskovych častak i padraździaleńniaŭ Asipovickaha harnizonu».
1405-ja artyleryjskaja baza bojeprypasaŭ
Za 12 km ad horadu i miesca zachoŭvańnia «Iskanderaŭ» znachodzicca 1405-ja artyleryjskaja baza bojeprypasaŭ (vajskovaja častka 42707), dzie, pavodle infarmacyi vydańnia The New York Times, a taksama Federacyi amerykanskich navukoŭcaŭ, moža rychtavacca schovišča dla jadziernych bojehałovak.
Na spadarožnikavym zdymku kampanii Planet Labs za 24 lutaha 2025 hodu, jaki atrymała Svaboda, zaŭvažnyja źmieny adrazu ŭ niekalkich miescach terytoryi hetaj vajskovaj častki. Za dva apošnija hady tut pabudavali novyja abjekty, rekanstrujavali staryja.
Tak, prykładna z pačatku sakavika 2023 hodu, u paŭnočnaj častcy vajskovaj bazy pačalisia budaŭničyja pracy. Na hetym miescy spačatku vysiekli častku lesu, paśla źjaviłasia trochuzroŭnievaja aharodža na perymetry, unutry jaje ŭźviali i rekanstrujavali niekalki pabudovaŭ, ustalavali niešta padobnaje da viežy suviazi ci małankaadvodu.
Heta adbyłosia amal adnačasova z zajavaj Uładzimira Pucina 25 sakavika 2023 hodu ab tym, što Rasieja raźmieścić svaju taktyčnuju jadziernuju zbroju ŭ Biełarusi. Pavodle jaho słovaŭ, budaŭnictva schovišča dla jaje ŭ Biełarusi planavałasia zaviaršyć 1 lipienia 2023 hodu. Apošni raz pra najaŭnaść na terytoryi Biełarusi jadziernaj zbroi Alaksandar Łukašenka zajaŭlaŭ 10 śniežnia 2024 hodu, ale nijakich dokazaŭ svaim słovam čarhovy raz nie pryvioŭ:
«Ja siudy zavioz jadziernyja bojehałoŭki. Nie adzin dziasiatak štuk. Mnohija pišuć: «A, heta žart, nichto ničoha nia ŭvioz». Uvieźli. A toje, što jany havorać, što heta žart, značyć, jany praziavali. Jany navat nie zaŭvažyli, jak my siudy ich zavieźli».
U publikacyi Federacyi amerykanskich vučonych mienavita hetaje miesca eksperty nazvali ŭ 2023 hodzie najbolš padobnym da miesca dla zachoŭvańnia rasiejskaj jadziernaj zbroi. Pra heta, pavodle ekspertaŭ, mohuć śviedčyć analahičnaja dla takich ža abjektaŭ u Rasiei struktura raźmiaščeńnia budynkaŭ, specyjalnaja trochuzroŭnievaja aharodža, mahčymy kantrolna-prapuskny punkt.
Akramia taho, mienavita ŭ hetym miescy, pavodle słovaŭ Uiljama Alberka, dyrektara analityčnaha centru «Mižnarodny instytut stratehičnych daśledavańniaŭ» (IISS), supracoŭnika Pentahonu i NATO, u časy «chałodnaj vajny» mahła zachoŭvacca jadziernaja zbroja. Ź jaho słovaŭ, jakija pryvodzić vydańnie NYT, u Asipovičach i vakolicach Saviecki Sajuz pačaŭ bazavać rakietna-jadziernyja bryhady ŭ 1960-ch hadach. U samim horadzie tady raźmiaščaŭsia vajskovy padraździeł, jaki zajmaŭsia kiravańniem imi.
Pry ŭjeździe na terytoryju 1405-j artyleryjskaj bazy bojeprypasaŭ, u jaje zachodniaj častcy, ź viasny 2023 hodu rekanstrujavali niekalki budynkaŭ, u tym liku štab, a taksama ŭźviali try budynki, dva ź jakich, padobna, kazarmy. Heta bačna na spadarožnikavym zdymku 24 lutaha 2025 hodu, što atrymała Svaboda.
Hetaja infarmacyja paćviardžajecca praviedzienymi ź lutaha 2023 hodu dziaržaŭnymi tenderami na budaŭničyja pracy, što my znajšli na sajcie dziaržaŭnych zakupaŭ. Tak, paznačana, što na terytoryi častki padlahali adnaŭleńniu staraja kazarma, pamiaškańnie varty, budynak klubu, skład, łaźnia, a taksama pavieć dla 24 adzinak specyjalnaj techniki. Tut ža dva skasavanyja tendery na pabudovu dźviuch modulnych kazarmaŭ na 120 čałaviek, pamiery i forma jakich całkam supadajuć z tymi, što my bačym na spadarožnikavym zdymku. To bok ich usio ž mahli pabudavać, ale, mahčyma, nia koštam dziaržaŭnaha biudžetu, a ź niejkaj inšaj krynicy finansavańnia.
Pabudova prynamsi dźviuch kazarmaŭ aznačaje, što asabovy skład častki moža być pavialičany da 240 čałaviek.
Analiz spadarožnikavych zdymkaŭ pakazvaje taksama, što z červienia 2023 hodu ŭ vajskovaj častcy dla systemaŭ supraćpavietranaj abarony nasypali dva vialikija ziemlanyja ŭzhorki. Jany vyšejšyja za budynki kazarmaŭ.
Dziaržaŭnyja tendery taksama pakazvajuć, što «Babrujskaje ekspluatacyjnaje ŭpraŭleńnie Ŭzbrojenych siłaŭ» zakuplała dla hetaj vajskovaj častki ŭ 2024 hodzie roznaha typu tryvałaści beton, druz, armaturu, tratuarnuju plitku, bardziury, vokny, dźviery, aharodžu, dva małankaadvody vyšynioj 25 metraŭ. Była zakuplenaja systema achovy perymetru «Reljef-2». Na sajcie vytvorcy takija systemy apisvajucca tak:
«Vykarystoŭvajucca dla arhanizacyi druhoha rubiažu achovy na abjektach z padvyšanymi patrabavańniami da biaśpieki, takich jak turmy, chimičnyja vytvorčaści, atamnyja stancyi, vajskovyja i vybuchovaniebiaśpiečnyja abjekty».
Čyhunka
Da vajskovaj bazy padvodziać asobnuju čyhunku, jakaja budzie źviazvać 1405-ju artyleryjskuju bazu bojeprypasaŭ z Asipovičami, dzie znachodziacca «Iskandery». Dla hetaha budujuć asobnaje adhalinavańnie ad čyhunačnaj linii Asipovičy — Mahiloŭ. Na spadarožnikavym zdymku bačna, što dla prakładki darohi ŭ lesie ŭžo zroblenaja prasieka, iduć ziemlanyja pracy, zakładzienyja padmurki pahruzačnych platformaŭ unutry bazy.
Imavierna, dla pahruzačnych platformaŭ «Babrujskaje ekspluatacyjnaje ŭpraŭleńnie Ŭzbrojenych siłaŭ» zakuplaje ciapier praź dziaržaŭnyja tendery dźvie elektryčnyja tali (padviesnyja krany) hruzapadymalnaściu 3,2 tony i vyšynioj padjomu 6 metraŭ kožny.
Čyhunku pačali budavać u kancy leta 2024 hodu. Ale plany jaje pabudovy vajskoŭcy mahli mieć daŭno, śćviardžajecca ŭ dakumentach, atrymanych BelPol. U apublikavanym abjadnańniem byłych siłavikoŭ budaŭničym prajekcie čyhunki, zroblenym arhanizacyjaj «TransSajuzPrajekt» ŭ 2020 hodzie na zamovu «Babrujskaha ekspluatacyjnaha ŭpraŭleńnia Ŭzbrojenych siłaŭ», paviedamlajecca:
«Budaŭnictva abjektu adbyvajecca ŭ metach vykanańnia prahramy Sajuznaj dziaržavy «Udaskanaleńnie abjektaŭ vajskovaj infrastruktury, jakija planujucca dla sumiesnaha vykarystańnia ŭ intaresach zabieśpiačeńnia rehijanalnaj hrupoŭki vojskaŭ (siłaŭ) Respubliki Biełaruś i Rasiejskaj Fiederacyi, zaćvierdžanaj Pastanovaj Savietu Ministraŭ Sajuznaj dziaržavy ad 8.12.2017 № 46».
Sama prahrama tak zvanaj Sajuznaj dziaržavy padpisanaja ŭ 2017 hodzie ŭ Homli z raźlikam na try hady (2018—2021). Źviestki pra jaje vydalenyja z sajtu infarmacyjna-analityčnaha partału Sajuznaj dziaržavy, ale zachavalisia ŭ archivie.
Zajaŭlenaje finansavańnie — srodki biudžetu Sajuznaj dziaržavy ŭ pamiery 12 miljardaŭ rasiejskich rubloŭ (prykładna 200 miljonaŭ dalaraŭ). U ramkach jaje pavinna było adbycca «ŭdaskanaleńnie» abjektaŭ avijacyjnaj infrastruktury, bazaŭ zachoŭvańnia ŭzbrajeńnia, «infrastruktury tyłu».
Apublikavany BelPol budaŭničy prajekt kampanii «TransSajuzPrajekt» padrabiazna apisvaje detali budučaj čyhunki «nieahulnaha karystańnia» ad prypynku Haroža da terytoryi vajskovaj častki № 42707″. Tut paznačana, što, akramia samoj darohi, pry hetym pavinny być pabudavanyja:
- raźjezd na «pierahonie Asipovičy-2 — Jalizava ŭ rajonie prypynku Haroža»
- 4 pahruzačna-razhruzačnyja platformy adkrytaha i zakrytaha typu
- zajeznyja/vyjaznyja bramy ŭ «vonkavaj i ŭnutranaj dracianych aharodžach»
- pavinna być abstalavanaje miesca dla raźjezdu ciahnikoŭ z dahladnaj placoŭkaj za 600 metraŭ ad vajskovaj bazy dla mahčymaści abhonu lakamatyva i jaho dahladu
- pamiaškańnie dla varty na 8 čałaviek
- systemy radyjosuviazi, videanazirańnia i syhnalizacyi
- kamunikacyi
- i inšaje.
Košt budaŭnictva — amal 27 miljonaŭ biełaruskich rubloŭ (na toj momant kala 10 miljonaŭ dalaraŭ).
Jak bačna, budaŭnictva nie pačałosia ŭ nazvanyja terminy. Jaho mahli pieranieści. Pra heta śviedčyć inšy dakument, apublikavany arhanizacyjaj BelPol. Jon datavany 2023 hodam i padpisany kiraŭnikom arhanizacyi kapitalnaha budaŭnictva Ŭzbrojenych siłaŭ Biełarusi pałkoŭnikam Alaksandram Budziankovym. U im paznačany novy termin zaviaršeńnia pabudovy čyhunačnych šlachoŭ z usioj prylehłaj infrastrukturaj — 2024 hod. Krynica finansavańnia — pazabiudžetnyja srodki Ministerstva abarony.
«Učastak dla jodnaj prafilaktyki»
U adnym z dadatkaŭ da prajektu paznačany ŭ raźmieščanaj niepadalok vioscy Małaja Haroža ŭčastak dla «jodnaj prafilaktyki». Takaja prafilaktyka — adna z abaviazkovych mieraŭ dapamohi ludziam, jakija ŭ vypadku radyjacyjnaj avaryi znachodziacca pablizu atamnaj elektrastancyi ci miesca vybuchu jadziernaj zbroi. U pieralik abjektaŭ pad pahrozaj radyjacyjnaj niebiaśpieki traplajuć, zhodna z pastanovaj biełaruskich ministerstva zdaroŭja i ministerstva nadzvyčajnych sytuacyjaŭ, 100-kilametrovyja zony vakoł Astravieckaj, Ihnalinskaj, Čarnobylskaj, Rovienskaj i Smalenskaj atamnych stancyjaŭ. Asipovičy nie traplajuć ni ŭ adnu ź ich.
12 vieraśnia 2024 hodu na terytoryi 1405-j bazy bojeprypasaŭ jaje kiraŭnik padpałkoŭnik Valery Kuźmin vinšavaŭ svaich supracoŭnikaŭ z dniom zasnavańnia vajskovaj častki. U sacyjalnych sietkach my znajšli fatazdymak hetaj padziei. Na im bačny abnoŭleny budynak štabu, na jakim visić indykatar sa značeńniem radyjacyjnaha fonu na vajskovaj bazie — 0,09 mkZv/h.
U katalohu pradukcyi biełaruskaj kampanii «Atamtech», jakaja zajmajecca vytvorčaściu abstalavańnia dla radyjacyjanaha kantrolu, my znajšli takuju pryładu pad nazvaj «indykatar-syhnalizatar SRK-AT2327 ź infarmacyjnym tabło».
Jak ukazana ŭ apisańni ad vytvorcy, pryznačeńnie pryłady — «manitorynh radyjacyjnaj abstanoŭki na radyjacyjna adčuvalnych i radyjacyjna niebiaśpiečnych abjektach i terytoryjach».
Dakładna takija ž indykatary-syhnalizatary SRK-AT2327 z 2020 hodu vajskoŭcy ŭ Biełarusi zakuplali tolki dla 8-j bryhady radyjacyjnaj biaśpieki, chimičnaj i bijalahičnaj abarony, a taksama dla vajskovaj častki № 7434, jakaja abaraniaje Astravieckuju AES.
Na fatazdymku, što Svaboda znajšła ŭ adkrytym dostupie ŭ sacyjalnych sietkach (vizualnaje śviedčańnie maje redakcyja RS), hety indykatar nie pracavaŭ u kastryčniku 2023 hodu, paśla madernizacyi štabu. Na inšym zdymku, u kastryčniku 2024 hodu, jon užo pakazvaje značeńni radyjacyjnaha fonu.
Svaboda paprasiła prakamentavać hety fakt byłoha biełaruskaha vajskoŭca (jon pažadaŭ zastacca ananimnym), jaki prachodziŭ słužbu ŭ savieckaj armii ŭ časy, kali ŭ Biełarusi znachodziłasia jadziernaja zbroja, i amal 20 hadoŭ — užo ŭ časy niezaležnaści. Jon uzhadvaje, što ŭ saviecki čas Asipovičy taksama byli mocnym artyleryjska-rakietnym centram, u horadzie dyślakavalisia adrazu 5 vajskovych bryhadaŭ. U adnoj ź ich jon niejki čas prachodziŭ słužbu. U toj čas za 20 kilametraŭ ad horadu, u vioscy Łapičy, dzie i ciapier mieścicca vajskovy haradok, znachodzilisia jadziernyja rakiety.
Sa słovaŭ surazmoŭcy Svabody, dazymetar zvyčajna znachodzicca na poście ŭ kožnaha dziažurnaha ŭ vajskovaj častcy. Tamu jon nia bačyć u hetym čahości niezvyčajnaha. Nabyćcio hetaha novaha dazymetra SRK-AT2327 u peŭnyja asobnyja vajskovyja častki moža tłumačycca tym, što na bolšaści astatnich abjektaŭ dahetul pracujuć jašče savieckija dazymetry, jakija spraŭlajucca z svajoj zadačaj. Na jaho dumku, novyja dazymetry mohuć stavić u novyja ci śvieža rekanstrujavanyja vajskovyja častki.
Ale najaŭnaść učastku jodnaj prafilaktyki pablizu 1405-j artyleryjskaj bazy bojeprypasaŭ, z słovaŭ vajskoŭca, nie zusim zvyčajnaja praktyka. Raniej takija ŭčastki raźmiaščali tolki kala «asablivych» miescaŭ, dzie moh adbycca mienavita jadzierny vybuch.
Što moža aznačać razbudova vajskovaj infrastruktury pad Asipovičami?
Konrad Muzyka, dyrektar kampanii Rochan Consulting, jakaja zajmajecca daśledavańniem i analizam biaśpieki na postsavieckaj prastory, adznačaje ŭ kamentary Svabodzie, što Biełaruś madernizuje svoj patencyjał zachoŭvańnia i razhortvańnia rakietnych kompleksaŭ «Iskander».
»Iskandery» — heta bolš vysokatechnalahičnaja systema, čym «Točka», jakaja patrabuje inakšych namahańniaŭ dla jaje padtrymańnia, tamu toj fakt, što madernizujecca schovišča, dzie mohuć zachoŭvajucca bojehałoŭki dla «Iskanderaŭ», zvyčajnyja bojehałoŭki i, što bolš važna, jadziernyja bojehałoŭki, — heta važnaja padzieja, — adznačaje vajskovy analityk. — Bo, jak mnie zdajecca, jana paćviardžaje, što mienavita hetaje schovišča budzie absłuhoŭvać «Iskandery»».
Konrad Muzyka źviartaje taksama ŭvahu, jak zapeŭnivajuć biaśpieku vajskovaj bazy: «Pabudova placovak, jakija ŭzvyšajucca nad ziamloju, ukazvaje, što jany buduć raźmiaščać srodki supraćpavietranaj abarony, a heta, u svaju čarhu, śviedčyć, što heta sapraŭdy miesca pavyšanaha intaresu i što Biełaruś zrobić šmat, kab abaranić jaho ad rakietnych udaraŭ».
Ekspert bačyć niekalki pryčynaŭ, čamu mienavita Asipovičy stanoviacca mocnym vajskovym centram u Biełarusi, čamu biełaruskija ŭłady investujuć u jaho raźvićcio i, mahčyma, mienavita tut planujuć raźmiaścić rasiejskuju jadziernuju zbroju.
Tak, na jaho dumku, tut užo raniej była stvoranaja zručnaja infrastruktura dla artylerystaŭ i rakietnych vojskaŭ. A blizkaść raźmiaščeńnia schovišča, dzie tearetyčna mohuć zachoŭvacca jadziernyja bojehałoŭki, i «Iskanderaŭ», jakija mohuć hetuju zbroju nieści, zastajecca vielmi važnym faktaram. Pabudova čyhunki jašče bolš udaskanalvaje hety praces i robić jaho bolš chutkim i prostym.
Svaboda nia maje paćvierdžańnia, što na vajskovaj bazie № 1405 pad Asipovičami na hety momant zachoŭvajecca jadziernaja zbroja. Ale pra toje, što tut užo ciapier mohuć znachodzicca kala 20 rasiejskich vajskoŭcaŭ, paviedamlała ŭ lutym 2025 hodu dziaržaŭnaje ŭkrainskaje infarmacyjnaje ahienstva «Ukrinform» z spasyłkaj na svaje krynicy.
Konrad Muzyka ŭ kamentary Svabodzie adznačyŭ, što absłuhoŭvańnie i zachoŭvańnie jadziernych bojehałovak nia moža adbyvacca biez udziełu rasiejskich vajskoŭcaŭ: «Usio, ad zachavańnia da pieramiaščeńnia i dałučeńnia jadziernaj bojehałoŭki da rakiety, usio heta robić 12-je hałoŭnaje ŭpraŭleńnie Ministerstva abarony Rasiei».
Ekspert kaža, što niemahčyma dalej pradkazać, jak moža pašyracca prysutnaść rasiejskich vajskoŭcaŭ u Biełarusi. Najbolš pilna jon raić nazirać za sumiesnymi vučeńniami dźviuch krainaŭ, što projduć sioleta ŭ vieraśni.
«Biełaruskija ŭzbrojenyja siły ŭ značnaj stupieni intehravanyja ŭ rasiejskija z hledzišča kamandavańnia i kiravańnia abjadnanaj hrupoŭkaj vojskaŭ. Rasieja bačyć Biełaruś pieradavym lahistyčnym centram dla supraćdziejańnia pahrozam z Zachadu. U Biełarusi my naličyli 30 roznych schoviščaŭ. Na ich zachoŭvajecca ŭsio — ad praduktaŭ charčavańnia da nižniaj bializny, uniformy, artyleryjskich i tankavych bojeprypasaŭ, rakiet, paliva. Heta toje, što pavinna być nadadziena jak biełaruskim, tak i rasiejskim uzbrojenym siłam, kali jany prybuduć u Biełaruś, kab, naprykład, učynić napad na Polšču ci krainy Bałtyi».
Kamientary