U siektary Haza sotni ludziej vyjšli na akcyju pratestu suprać ułady CHAMAS
U aŭtorak u horadzie Biejt-Łachija na samym poŭnačy siektaru Haza adbyłasia redkaja dla hetaha rehijonu padzieja — masavaja vuličnaja akcyja pratestu suprać ułady CHAMAS, piša Bi-bi-si.
Na kadrach vidać, jak maładyja mužčyny iduć pa vulicach horada i skandujuć: «Preč, preč, preč, CHAMAS, sydzi preč!» i «Dałoŭ uładu CHAMAS, dałoŭ uładu «Bratoŭ-musulman»!
U adkaz bajcy CHAMAS u maskach, sa zbrojaj i dručkami siłaj razahnali demanstracyju. Na viečar aŭtorka pradstaŭniki hrupoŭki situacyju aficyjna nie prakamientavali. Tym časam prychilniki CHAMAS u internecie nazvali ŭdzielnikaŭ akcyi zdradnikami.
Pratest adbyŭsia na nastupny dzień paśla taho, jak bajeviki «Isłamskaha džychadu» zapuścili rakiety pa Izraili, a izrailskija vojski ŭ adkaz zahadali žycharam niekalkich rajonaŭ Biejt-Łachii evakujavacca. Heta vyklikała mocnaje abureńnie miascovych.
— My admaŭlajemsia pamirać ni za kaho — ni za partyju, ni za zamiežnuju dziaržavu, — skazaŭ adzin z udzielnikaŭ akcyi, Machamied Dyjab. Jaho brat zahinuŭ pad izrailskim avijaŭdaram hod tamu. Dom Machamieda byŭ razburany.
— CHAMAS pavinien pakinuć uładu i pačuć hołas tych, chto smutkuje, hołas, što hučyć z-pad zavałaŭ — heta samy ščyry hołas, — dadaŭ jon.
CHAMAS całkam kantraluje Hazu z 2007 hoda. U 2006-m hrupoŭka pieramahła na vybarach u Paleścinskaj aŭtanomii, a nieŭzabavie siłaj vycieśniła svaich kankurentaŭ z terytoryi Hazy.
Z pačatku novaha etapu vajny ŭ Hazie krytyka na adras CHAMAS hučyć usio čaściej — jak u internecie, tak i na vulicach. Chacia hrupoŭka pa-raniejšamu maje šmat prychilnikaŭ, zrazumieć realny bałans sił ciapier praktyčna niemahčyma.
— Prabačcie, ale na što raźličvaje CHAMAS? Jon abapirajecca na našu kroŭ, na ličby, jakija ŭvieś śviet usprymaje jak statystyku, — napisaŭ u Facebook žychar Hazy Machamied Al-Nadžar. — I sam CHAMAS bačyć u nas tolki ličby. Niachaj sychodzić, niachaj dazvolić nam zalačyć svaje rany.
Jašče da vajny ŭ Hazie byli praciŭniki CHAMAS, ale bolšaść maŭčała z-za strachu za svaju biaśpieku.
Izrail adnaviŭ vajennuju apieracyju suprać CHAMAS u siektary Haza 18 sakavika, paśla taho jak pravaliłasia pieramirje, što doŭžyłasia amal dva miesiacy.
Ciapier čytajuć
«Niečym treba zaŭsiody achviaravać. Mnie pryjšłosia achviaravać siamjoj»: syn Iny Afanaśjevaj pra pavaroty losu9
Kamientary