Гамеапатыю і іншыя метады нетрадыцыйнай медыцыны дагэтуль уключаюць у пералік платных паслуг у дзяржаўных клініках
У абноўленым пераліку платных паслуг дзяржаўных бальніц і паліклінік засталіся гамеапатыя, лячэнне пчоламі, п'яўкамі і іншыя нетрадыцыйныя працэдуры. Такія метады многія ў медычным коле лічаць сумніўнымі.
У выдадзенай 10 красавіка ўрадам пастанове — пералік платных паслуг, якія могуць аказваць дзяржаўныя медыцынскія ўстановы. Некаторыя з гэтых працэдур у медыцынскім асяроддзі лічацца псеўдамедыцынай, а ў самім дакуменце называюцца «нетрадыцыйнымі метадамі аказання дапамогі». Так, у пераліку згадваецца гамеапатыя, гірудатэрапія (лячэнне п'яўкамі), апітэрапія (лячэнне пчоламі).
Гэтыя метады і раней ўключалі ў пералік платных паслуг.
Сярод дактароў такі падыход выклікае дыскусію.
«Медыцына — гэта навука, якая грунтуецца на доказах, эфектыўнасці тых ці іншых метадаў лячэння і дыягностыкі хваробаў. Калі ёсць доказы таго, што метад эфектыўны і бяспечны, то ён прымаецца і выкарыстоўваецца. Калі няма доказаў, то гэта не медыцына…» — тлумачыць практыкуючы доктар Вадзім.
Паводле яго, ужыванне тэрміну «нетрадыцыйная медыцына» — маркер кваліфікацыі службоўцаў, якія складалі пералік. Акрамя таго, акцэнтуацыя ўвагі, напрыклад, на гамеапатыі, дыскрэдытуе сістэму аховы здароўя.
Дадатак да пастановы ўраду ад 10 красавіка 2023 года № 182 з абноўленым пералікам платных паслуг быў апублікаваны ў тэлеграм-канале Міністэрства аховы здароўя, але потым яго чамусьці прыбралі.
Медыкі згаджаюцца, што «нетрадыцыйныя метады лячэння» папулярныя ў пацыентаў і яны гатовыя за іх плаціць. У бальшыні выпадкаў да дактароў, якія аказваюць такія паслугі, ідуць людзі, расчараваныя ў традыцыйнай медыцыне, альбо тыя, хто спадзяецца на цуд.
«Знахарства ва ўсе часы было папулярным, і часам толькі зёлкі ратавалі», — адзначае неўрапатолаг Вячаслаў, які сам ставіцца да гамеапатыі насцярожана.
Скептычна ўспрымае гамеапатыю і наогул «нетрадыцыйную медыцыну» доктар з 20-гадовым стажам Пётр.
«Часцей за ўсё проста не ведаеш, што знаходзіцца ў таблетцы ці бутэлечцы з вадкасцю. І хто ўсё гэта прыгатаваў, — выказваецца ён. — У самой гамеапатыі можа і нічога дрэннага няма. Ведаю адну калегу з Віцебска, якая даўно займаецца гамеапатычнымі прэпаратамі. Яна ведае ў гэтым сэнс. Працуе ва ўніверы, займаецца навукай. Сама вырабляе прэпараты, са зразумелай сыравіны».
Святлана, медык з 30-гадовым стажам, сутыкалася з гамеапатыяй і знаёмая з калегамі, якія вырабляюць такія прэпараты.
«Гэта як дадатак да традыцыйных метадаў лячэння. Пацыенты вераць у іх гаючую моц. Гэтыя віды лячэння, аднак, не ўваходзяць у афіцыйныя пратаколы, якія прадугледжаныя для кожнай паталогіі. У комплексе з афіцыйнымі метадамі яны рэальна дапамагаюць», — цвердзіць доктарка.
Яна, аднак, салідарная з калегамі, што ў афіцыйным дакуменце найперш павінны фігураваць паслугі традыцыйнай медыцыны.
Гамеапатыю Міністэрства аховы здароўя легалізавала ў 1991 годзе. Тады быў выдадзены загад, які дазваляў ствараць прыватныя гамеапатычныя цэнтры і аптэкі.
Медыкі, які займаюцца гамеапатыяй, сцвярджаюць, што сыравінаю для гамеапатычных лекаў служаць, у асноўным, рэчывы расліннага, жывёльнага паходжання і мінералы. У апошні час сталі прымяняцца таксама арганныя прэпараты. Разам з тым прызнаецца, што механізм дзеяння такіх лекаў дагэтуль дастаткова не вывучаны.
У Мінску 17 гадоў працуе цэнтр «Класічная гамеапатыя».
У розных краінах стаўленне да гамеапатыі рознае.
Напрыклад, у Расіі гамеапатыя афіцыйна ў 2017 годзе прызнаная ілжэнавукаю. Нацыянальная акадэмія навук палічыла яе небясшкоднай, паколькі хворыя марнуюць значныя сродкі на нядзейныя прэпараты і грэбуюць тымі лекамі, якія маюць пацверджаную эфектыўнасць.
У суседняй Польшчы, дзе дзеіць страхавая медыцына, сам пацыент вырашае, да каго звяртацца, калі праблемы са здароўем.
У 2016 годзе ўлады Швейцарыі пастанавілі прыраўняць метады альтэрнатыўнай медыцыны да традыцыйных. Большасць насельніцтва на рэферэндуме падтрымала такі крок.
Цяпер у каталогу паслуг поліса абавязковага медстрахавання пазначана і гамеапатыя. Але не ўсё проста. Для аплаты альтэрнатыўных метадаў лячэння неабходна скласці дамову дадатковага добраахвотнага страхавання, якая асобна пакрывае расходы на гамеапатыю.
«Наша Нiва» — бастыён беларушчыны
ПАДТРЫМАЦЬГлядзіце таксама:
Мінздароўя ўвяло новыя правілы для аптэк. Іх стане менш: хочуць прыдушыць канкурэнтаў «БелФармацыі»
«Пандэмія і рэпрэсіі ўзарвалі сістэму». Дактары расказваюць, як змянілася медыцына за тры гады
Каментары