Маршрутчык гадамі падманваў даверлівых жанчын і выцягнуў з іх амаль 70 тысяч рублёў
48-гадовы жыхар Маладзечанскага раёна шмат гадоў працаваў кіроўцам маршруткі «Мінск-Нясвіж-Клецк-Сіняўка», а паралельна праявіў сябе як сапраўдны майстар уздзеяння на людскія пачуцці. У выніку яго ахвярамі сталі пяць даверлівых жанчын, якія агулам страцілі амаль 70 тысяч рублёў, паведамляе Следчы камітэт.
Гісторыя пачалася амаль 10 гадоў таму, у 2016 годзе. Кіроўца маршруткі, які выклікаў давер да сябе знешнасцю і падвешаным языком, магічна ўздзейнічаў на некаторых пасажырак. Ён прадстаўляўся ім былым святаром, расказваў пра трагічную гібель сям'і ў аўтакатастрофе, а таксама пра сваю ганаровую місію — дабрачынную дзейнасць у дзіцячым хоспісе ў Бараўлянах.
Пасля расказвання гэтых гісторый афлайн камунікацыя пераходзіла ў віртуальную прастору. Падчас перапісак кіроўца праяўляў увагу і клопат, прызнаваўся ў сімпатыях і нават любові, але ніколі не пераходзіў межы дазволенага. А пасля пачыналіся просьбы аб фінансавай дапамозе: то на пахаванне дзіцяці з хоспіса, то на тэрміновую аперацыю бацьку ў Германіі, то на рэабілітацыю ўсё таго ж сваяка ў Маскве.
Даверлівыя жанчыны аддавалі махляру апошняе. Адна з ахвяр, жанчына з мужам-інвалідам і двума непаўналетнімі дзецьмі, страціла больш за 16 тысяч даляраў, другая аддала ўсе свае ашчаджэнні, назапашаныя гадамі, — 7500 даляраў ЗША — на «рамонт аўтамабіля». Трэцяя аформіла на сваё імя крэдытную карту «Халва» і перадала яе мужчыну. Пасля ёй прыйшлося залазіць у даўгі, каб разлічыцца з банкам.
Чацвёртай жанчыне ашуканец перадаў просьбу аб дапамозе ад імя яе былога сужыцеля, пераконваючы жанчыну сабраць буйную суму. Пасля гэтыя грошы былі аддадзеныя як задатак за дом, які мужчына збіраўся купіць у гэтага самага сужыцеля.
Апошняй пацярпелай ён расказаў пра планы адкрыць свой маршрут, але для рэалізацыі бізнэсу не хапала грошай на куплю мікрааўтобуса. Жанчына паверыла і ўзяла для яго крэдыт у банку на 5800 рублёў. Першыя месяцы мужчына спраўна плаціў працэнты, а потым знік, пакінуўшы яе сам-насам з абавязкам.
Калі махлярскія схемы раскрыліся, прадпрымальны маршрутчык спрабаваў схавацца і нейкі час яму гэта паспяхова ўдавалася. Аднак у снежні 2024 года шанцаваць яму перастала. Аднойчы ўвечары, падчас звычайнай праверкі дакументаў, ягоны аўтамабіль быў спынены супрацоўнікамі ДАІ. Мужчыну затрымалі і перадалі следчым органам.
Усяго ў ягоныя ашуканскія сеткі трапілі 5 жанчын, махляр завалодаў іх грашыма на агульную суму звыш 68 тысяч рублёў. Грошы ён траціў на арэнду камфартабельнага жылля, куплю дарагіх гаджэтаў, абслугоўванне прэстыжнага аўтамабіля і ўвогуле нябеднае існаванне.
Дзеянні 48-гадовага кіроўцы маршруткі кваліфікаваныя следчымі Нясвіжскага раённага аддзела Следчага камітэта па ч. 4 арт. 209 (махлярства, здзейсненае ў асабліва буйным памеры) Крымінальнага кодэкса Беларусі.
«Яна забрала дзяцей і вярнулася ў Мінск»: гісторыя беларуса, які эміграваў у Барселону з сям'ёй, а застаўся адзін18
Каментары
[Зрэдагавана]