«Яны вось проста паміж дамоў падаюць». Карпянкоў расказаў, што дроны ў Беларусі падаюць і выбухаюць амаль кожны тыдзень
Намеснік міністра ўнутраных спраў і камандуючы ўнутраных войскаў Мікалай Карпянкоў у інтэрв'ю прэс-службе ўнутраных войскаў паведаміў тое, пра што маўчаць улады, заўважыла «Люстэрка».
Карпянкоў сказаў, што дроны «вельмі часта ў прымежжы залятаюць да нас», распавядаючы пра працу падраздзяленняў па размініраванні.
Як вынікае з расказу Карпянкова, толькі выпадкова ад дрона не загінулі людзі. Карпянкоў кажа, што «Бог ахоўвае Рэспубліку Беларусь».
«Вось колькі яны ў палях падалі — столькі яны выбухалі. Але колькі яны падалі ў населеных пунктах — Лойнікі, у Хоеве (маюцца на ўвазе Хойнікі і Лоеў. — Заўв. рэд.) — вы ведаеце, яны не выбухаюць. Яны вось проста паміж дамоў вось падаюць, на дарогу падаюць, да дома застаецца 50-60 метраў. І, вы ведаеце, яны не дэтануюць», — распавёў Карпянкоў.
«І вось немагчыма разабрацца ў гэтым дроне — у ім ёсць самаліквідатар, пастаўлены ён, атрымліваецца, на самазнішчэнне ці не, без чалавека гэта вырашыць немагчыма. І ўсюды мясцовасць такая — робата не адправіш, нічога не зробіш», — дадаў ён.
Паводле яго слоў, да дрона сапёр у спецыяльным касцюме «падносіць рэнтген» і глядзіць, што знаходзіцца ўнутры корпуса — аскепкава-фугасны або тэрмабарычны зарад. Пазней дроны адцягваюць і ўзрываюць.
Карпянкоў заявіў, што «нейкія дроны збіваюцца, а нейкія дроны залятаюць, і мы потым іх размінуем — ну, гэта вайна, гэта наступствы таго, што адбываецца ў нашым паўднёвым прымежжы».
«Гэта адбываецца практычна кожны тыдзень», — паведаміў ён.
Дзяржаўную прыналежнасць дронаў, што залятаюць у Беларусь, Карпянкоў не ўказваў.
Як піша «Флагшток», люты стаў рэкордным па колькасці здарэнняў з расійскімі дронамі ў Беларусі. Падзенні фіксаваліся як мінімум у Хойніках, Маложыне, Мазырскім і Гомельскім раёнах і Гомелі. Улады звычайна ніяк не каментуюць такія здарэнні, а мясцовыя дзяржСМІ не пішуць пра такое — няма дазволу.
Вылецела ў невядомым кірунку спікерка КР Анжаліка Мельнікава30
Каментары
[Зрэдагавана]