Сем тыпаў «п’янай асобы»: кім вы становіцеся пад уздзеяннем алкаголю і што гэта азначае?

Паводле спецыялістаў, алкаголь стымулюе выкід норадрэналіну — нейрамедыятара, які актывізуе мозг і цела. Гэта зніжае самакантроль, робіць нас больш імпульсіўнымі. Таксама алкаголь прыгнятае працу прыфрантальнай кары, якая адказвае за рацыянальныя рашэнні.

Выпітае хутка трапляе ў кроў і дасягае мозгу прыкладна за пяць хвілін. Чым большая канцэнтрацыя алкаголю ў арганізме, тым мацнейшае ўздзеянне на асобу. У выніку чалавек траціць стрыманасць і можа зрабіць тое, на што ў цвярозым стане ніколі б не адважыўся.

Рэакцыя на алкаголь залежыць ад шэрагу фактараў, у тым ліку ад генетыкі і індывідуальных асаблівасцяў характару. Хтосьці застаецца такім, як ёсць, а хтосьці змяняецца да непазнавальнасці.

Як піша medonet.pl, доктар Алекс Лі (Alex Lee), які дапамагае людзям з алкагольнай залежнасцю праз платформу тэлемедыцыны Ria Health, вылучае сем тыпаў «п'янай асобы».

1. Вясёлы п’яніца

Большасць людзей пасля выпітай чаркі адчувае эйфарыю, але ў некаторых гэтае адчуванне застаецца, колькі б яны ні выпілі. Яны могуць блытацца ў словах ці губляць каардынацыю, але настрой у іх заўсёды выдатны.

Алкаголь зніжае ўзровень трывожнасці, дапамагаючы на пэўны час забыцца на праблемы і весяліцца ўсю ноч.

— Калі вы не ўжываеце алкаголь рэгулярна для зняцця трывогі, няма нічога дрэннага ў тым, каб быць вясёлым п’яніцам, — кажа доктар Лі.

2. Агрэсіўны п’яніца

Гэты тып з'яўляецца поўнай супрацьлегласцю папярэдняму. Замест радасці чалавек адчувае ўсё больш раздражнення і злосці. Ён можа станавіцца варожым і нават агрэсіўным.

Даследаванні паказваюць, што алкаголь мацней за ўсё ўздзейнічае на агрэсію ў тых, хто схільны засяроджвацца на «тут і цяпер», а не на будучыні.

Калі раздражненне перарастае ў агрэсію, гэта можа пагражаць сям’і і сябрам.

3. Чуллівы п’яніца

У такіх людзей алкаголь здымае псіхалагічныя бар’еры, робячы іх больш эмацыйнымі і пяшчотнымі.

Празмерная пяшчота і эмацыйнасць у адносінах да знаёмых — звычайная з’ява. Аднак алкаголь зніжае самакантроль і аслабляе пільнасць, асабліва ў зносінах з незнаёмцамі. Гэта можа прывесці да непажаданых сітуацый: празмернай даверлівасці, непрыстойных кантактаў або небяспечных паводзін.

4. Неахайны п’яніца

«Неахайныя п’яніцы» маюць схільнасць перабіраць з алкаголем, а ў стане ап’янення не звяртаюць увагі на тое, што яны растрапаныя ці выпацканыя. У такім стане яны могуць паводзіць сябе не самым лепшым чынам і трапіць у няёмкія сітуацыі.

— Залішняе спажыванне алкаголю можа зрабіць неахайнымі нават самых акуратных людзей. Гэта звязана з тым, што алкаголь актывуе ў мозгу рэцэптар, які пагаршае каардынацыю рухаў, — тлумачыць доктар Лі.

Акрамя таго, спецыяліст звяртае ўвагу на тое, што падобныя паводзіны могуць негатыўна ўплываць на адносіны з блізкімі, якія могуць стаміцца ад пастаянных клопатаў пра чалавека, які зноў перабраў са спіртным.

5. Безразважны п’яніца

Некаторыя людзі пад уздзеяннем алкаголю губляюць пачуццё меры і схільныя да рызыкоўных учынкаў. Гэта можа быць як спантанная пакупка, так і нешта больш небяспечнае, напрыклад, кіраванне аўтамабілем у стане ап’янення.

Фінскія навукоўцы выявілі генетычную мутацыю, звязаную з такімі паводзінамі. Людзі з гэтым генам схільныя да імпульсіўнасці нават у цвярозым стане і часцей пакутуюць ад расстройства настрою.

6. Незаўважны п’яніца

Ёсць людзі, якія нават пасля вялікай колькасці алкаголю выглядаюць спакойнымі і сабранымі.

Гэта звязана з генетыкай, але высокая ўстойлівасць да алкаголю — не заўсёды добра. Такія людзі могуць піць больш, каб адчуць эфект, што павышае рызыку залежнасці.

7. П’яны да бяспамяцтва

Калі чалавек ужывае занадта шмат алкаголю за кароткі час, у яго могуць узнікаць правалы ў памяці, і ён амаль нічога не будзе памятаць пра вечар, калі піў.

Спецыялісты папярэджваюць, што калі такое здараецца часта, то варта задумацца: гэта можа быць ранняй прыкметай алкагольнай залежнасці або сігналам таго, што вы ўжо не здольныя спыніцца ці кантраляваць спажыванне алкаголю.

Якім бы тыпам «п’янай асобы» вы ні былі, памятайце: калі алкаголь становіцца рэгулярнай звычкай і вам цяжка сябе стрымліваць, магчыма, варта падумаць пра скарачэнне яго спажывання.

• 14
• 1
• 9
• 6
• 1
• 3
• 0
• 0