У Мінску паставілі помнік з імперскім арлом. Адкрываць прыехаў памочнік Пуціна ФОТЫ
Цырымонію асвячэння правёў кіраўнік Беларускай праваслаўнай царквы мітрапаліт Веніямін.
12 сакавіка 2025 года на Вайсковых могілках у Мінску быў адкрыты новы помнік салдатам Расійскай імператарскай арміі, якія загінулі падчас Першай сусветнай вайны.
У мерапрыемстве прыняў удзел памочнік прэзідэнта Расіі і старшыня Расійскага ваенна-гістарычнага таварыства Уладзімір Мядзінскі, вядомы сваёй роллю ў прапагандысцкай дзейнасці Крамля.
Помнік, усталяваны на брацкай магіле невядомых салдат, месціцца каля храма Аляксандра Неўскага і мае выгляд, які імітуе гістарычны. Гэта высокі абеліск з чорнага мармуру з крыжам на версе, рэльефным гербам Расійскай імперыі і надпісам:
«Здесь покоятся воины Русской императорйской армии, павшие при защите Отечества в 1915 году. Упокой, Господи, их души».
Помнік быў пастаўлены яшчэ летась за кошт Расійскага ваенна-гістарычнага таварыства, пра што сведчыць надпіс на заднім баку помніка, але адкрыты ён быў толькі цяпер.
Ніякай асаблівай неабходнасці змяшчаць імперскую сімволіку на помніку не было, калі не лічыць ідэалагічнай працы расійскіх агентаў уплыву ў Беларусі.
Мітрапаліт Веніямін адзначыў, што месца пахавання доўгі час заставалася вядомым толькі старэйшым парафіянам царквы, але цяпер яно атрымала належнае ўшанаванне.
«Мы знаходзімся на брацкай магіле невядомых салдат Расійскай імператарскай арміі. Першая сусветная вайна доўгія гады лічылася забытай, і памяць пра яе герояў таксама была страчаная», — заявіў падчас цырымоніі Мядзінскі.
Цікава, што ў гэты ж дзень Мядзінскі паведаміў, што Расія працуе над сінхранізацыяй школьных падручнікаў па гісторыі з Беларуссю. Паводле яго слоў, расійскі бок ужо атрымаў прапановы і карэкціроўкі ад Інстытута гісторыі Акадэміі навук Беларусі, якія будуць улічаныя ў падручніках.
«Мы прынялі ўсе гэтыя парады, нешта падправілі, нешта ўдакладнілі», — сказаў памочнік Пуціна.
На цырымоніі мітрапаліт Веніямін уручыў Мядзінскаму «ўнікальную» ікону святога князя Аляксандра Неўскага «на знак падзякі за захаванне гістарычнай памяці».
Акрамя таго, медалямі святога Кірыла Тураўскага былі ўзнагароджаныя намеснік кіраўніка Кіраўніцтва справамі прэзідэнта Расіі па дзяржаўнай палітыцы ў гуманітарнай сферы Мікалай Аўсіенка і саветнік пасольства Расіі ў Беларусі Сяргей Афонін.
Гэта не першы выпадак, калі Расія праз культурныя і гістарычныя ініцыятывы ўзмацняе свой уплыў у Беларусі. Такія падзеі, як адкрыццё помнікаў і ўзгадненне падручнікаў, сведчаць пра імкненне Крамля да інфармацыйнага і ідэалагічнага дамінавання ў беларускім адукацыйным і грамадскім полі.
«Наша Нiва» — бастыён беларушчыны
ПАДТРЫМАЦЬЦяпер чытаюць
У Маладзечне ў пустым вагоне знайшлі 27-гадовага амерыканца, які нелегальна трапіў у Беларусь з Літвы10
Каментары