Наведніца сабачага кафэ ў Мінску засталася крайне незадаволенай і расказала, якія ў яе прэтэнзіі
Dog friendly кавярня на вул. Свярдлова адкрылася каля чатырох месяцаў таму. У сацыяльных сетках супрацоўнікі прапануюць зайсці ў кафэ, каб пазнаёміцца з чароўнымі сабакамі, а таксама перакусіць. «Здавалася б, ідэальны варыянт, каб пасядзець з сябрамі ці сям'ёй у выходны дзень, але ў рэальнасці аказалася, што канцэпцыя кавярні з жывёламі патрабуе дэталёвай дапрацоўкі», — піша выданне «Мінск-Навіны».
«У сацсетках супрацоўнікі запэўніваюць, што выгул сабак адбываецца ўвесь час. Вырашылі праверыць: зашлі ў кафэ, узялі дэсерт з напоем і паназіралі. За чатыры гадзіны пухнатых работнікаў з памяшкання не выводзілі ні разу, а хадзіць у прыбіральню ім даводзілася побач з гасцямі і ежай. Адзін з сабак і зусім памачыўся на ўваходны дыванок. Іншы вырашыў прагуляцца сам і ўцёк у адчыненыя дзверы, у выніку чаго касір змушаны быў перапыніць працу і лавіць уцекача», — распавядае выданне.
З дэгустацыяй дэсерту таксама ўсё пайшло не па плане: адзін з чатырохногіх скінуў шкляначку з бісквітам са стала на падлогу і задаволены прыступіў да трапезы.
«Дэсерт ад яго мы адсунулі, але ён працягнуў паляванне: новай «ахвярай» стала дзяўчына за столікам насупраць. Пра тое, што адбылося, распавялі касіру: яна адрэагавала на гэта як на нешта вельмі штодзённае. Замест тлумачэнняў і прабачэнняў прывабіла сабаку ласункам у службовы пакой і закрыла на час касматага парушальніка», — працягваае выданне.
Карэспандэнтка звязалася з уладальніцай кавярні.
— Існуе выразны рэгламент: супрацоўнікі павінны выгульваць гадаванцаў кожную гадзіну-дзве. Магчыма, у той дзень кагосьці з працаўнікоў не было на змене, але гэта не адмяняе факт, што трэба быць больш уважлівымі. Што да харчавання, зараз дрэсіруем сабак, каб яны не кралі ежу са стала. У будучыні абавязкова знайду чалавека, які паклапоціцца пра іх належным чынам, - пракаментавала сітуацыю гаспадыня ўстановы.
Старшыня Асацыяцыі зоаабарончых арганізацый Аксана Давыдзенка расказала, што гаспадарам лепш абмяжоўваць зносіны гадаванцаў са староннімі людзьмі.
Паводле яе слоў, дэсерты не павінны ўваходзіць у рацыён сабак, а шакалад для іх і зусім смяротна небяспечны: такое харчаванне можа прывесці да самых розных наступстваў, ад атлусцення да праблем з сэрцам. У адказнасць уладальніка ўваходзіць і выгул сабак.
— Зоаабаронцы заўсёды выступаюць за бяспеку жывёл. Звычайна пасля такіх зваротаў мы звязваемся з уладальнікам аб'екта і просім забяспечыць належныя ўмовы для знаходжання жывёл. Калі не выпраўляюцца — прымаем меры, але звычайна да нас прыслухоўваюцца і зусім спыняюць залучаць у свой бізнэс жывёл. Абавязкова абмяркуем спрэчныя моманты з кіраўніцтвам установы, - сказала Давыдзенка.
У сталічным Цэнтры гігіены і эпідэміялогіі заўважылі, што кіраўніцтвам кавярні павінна быць выдзелена адказная асоба, якая будзе сачыць за сабакамі і не ўдзельнічаць у абарачэнні харчовай прадукцыі, - дадаў намеснік галоўнага ўрача цэнтра Сяргей Казырэвіч.
Такія меры існуюць, паколькі сабакі могуць быць пераносчыкамі паразітарных хвароб, дэрматоксікозаў і шэрагу іншых інфекцый, кажуць спецыялісты.
Каментары
U Vas by atrymalasia, ja vašyja kamientary čytaju i razumnieju, i razumnieju, i baču, što ū vas atrymalasia b ! Praūdu kažu...