«Не хачу спансараваць Маска». Чаму беларусы (не) прадаюць свае Tesla

Беларусь

Прадала праз 8 месяцаў, але не таму што Маск, а таму што «суцэльныя інфраструктурныя задачы з зорачкай»

— У 2020 годзе ў мяне была Model S 2016 года выпуску, прывезеная з ЗША. Я тады была ўражаная біяграфіяй Ілана Маска, хацелася дакрануцца да прадукту. І ўвогуле ў краіне пачыналася развіццё рынку электратранспарту. Уладальнікам электракараў, напрыклад, давалі пэўныя бонусы (уладальнікаў электракараў збіраліся вызваліць ад платы на паркоўках).

Але ў выніку праз 8 месяцаў прадала сваю Tesla. Прычын было шмат.

• Зімой батарэя трымае ў 3-4 разы менш. Таму ў Беларусі Tesla трэба трымаць у гаражы, бо на вуліцы батарэя разраджаецца супер хутка.
• Пасля BMW 7-й мадэлі — неверагодна бедны і няякасны салон.
• Зімой на месцах для зарадкі часта сабраны снег з усёй паркоўкі.
• Адсутнасць культуры ў многіх кіроўцаў. Займалі месцы для зарадкі і не пакідалі нумар тэлефона. Альбо пакідалі, але потым доўга спускаліся са свайго офіса, калі ты ўжо ўсюды спазніўся.
• Рамонт аўтамабіля «на гаражах». Каб памяняць лямпачку ў фары, трэба было разабраць палову «морды».
• Пастаянны разлік у галаве, куды хопіць зараду даехаць і колькі км засталося. Гэта вельмі напружвала.
• Пры перападзе электраэнергіі машына магла проста перастаць зараджацца. А ты на сустрэчы, напрыклад, і няма магчымасці выбегчы і перападлучыць.

Карацей, суцэльныя інфраструктурныя задачы з зорачкай. Таму Tesla рэкамендую ў межах Мінска толькі тым, у каго ў двары/на працы ёсць зарадка, альбо ўладальнікам прыватных дамоў.

Мне ў цэлым падабаецца Model Y, яна зроблена нядрэнна, але зноў жа, для мяне вельмі актуальнае пытанне запасу ходу. Калі б Tesla магла праязджаць 800-900 км без падзарадкі, як BMW з рухавіком 2.0 на дызелі, можна было б разгледзець.

Што да Маска, то выглядае так, што доступ да ўлады не заўсёды ідзе на карысць ментальнаму здароўю. Не кожны, відаць, спраўляецца з нагрузкай.

Не купіў, бо кітайскія канкурэнты цікавейшыя

— Раней разглядаў набыццё новай Tesla3, быў гатовы патраціць 30 тысяч долараў. Разглядаў Tesla як альтэрнатыву еўрапейскім брэндам, чытаў водгукі пра поўны аўтапілот. Tesla адпавядала вобразу вельмі тэхналагічнага апарата.

Але адштурхоўвалі некаторыя характарыстыкі і наяўнасць кітайскіх канкурэнтаў. Напрыклад, у Tesla кульгае якасць афарбоўкі і зборкі. Фарба наносіцца вельмі тонкім слоем на заводзе і заўважныя адрозненні ў зазорах паміж дэталямі кузавамі.

У гэтым плане, напрыклад, Zeekr 007 (электрамабіль кітайскай Zhejiang Geely Holding Group) цікавейшы: шмат опцый, больш якасныя матэрыялы аздаблення і дызайн. Сабраны ён якасна і ўнутры багацейшы. Але ў выніку я купіў Li7 (электрычны пазадарожнік кітайскага вытворцы Li Auto).

Што да майго стаўлення да брэнда Tesla пасля выказванняў уладальніка кампаніі, то ў пэўнай ступені яно змянілася ў негатыўны бок.

Не хоча прадаваць, але яшчэ раз не купіць, каб не спансаваць Маска

— Першую Tesla (Model S) купіў каля 7 гадоў таму. Хацеў паспрабаваць электрамабіль у справе, а на той момант альтэрнатыў Tesla не было.

Да гэтага ездзіў на BMW і вырашыў, што не буду прадаваць. Думаў, што на Tesla далёка не з’еду. Але ў выніку BMW прастаяла цэлы год без справы. Аўтамабіль Tesla мне агулам спадабалася, таму 4 гады таму я купіў новую Model X, а старую прадаў.

Model X я пакуль не хачу прадаваць. Але наўрад ці зноў куплю Tesla. Не жадаю спансаваць такіх людзей, як Ілан Маск.

Цалкам салідарны з еўрапейцамі. Калі да самога аўтамабіля пытанняў няма, то з Маскам у апошні час адбываецца нешта дзіўнае. Раней ён хацеў скарыць Марс і прасоўваў зялёную энергетыку, а цяпер звальняе работнікаў IT-сферы, дзяржаўных службоўцаў і ўвогуле робіць дзіўныя заявы. Нават неяк крыўдна, на каго раўняцца-та?

Польшча

Будзе мяняць Tesla Model 3 на Model Y. Добрых альтэрнатыў за гэтыя грошы няма, кампанію і асобу CEO размяжоўвае

— Больш за тры гады я з’яўляюся ўладальнікам Tesla Model 3. Замаўляў аўтамабіль яшчэ летам 2021 года з салона ў Германіі з дастаўкай у Беларусь праз кампанію-пасярэдніка. Машыну атрымаў праз паўгода, з усімі плацяжамі Tesla абышлася ў 50 тысяч еўра.

Цяпер планую змяніць на новую Model Y. Збіраюся купляць адразу ў Польшчы, праз афіцыйны сайт, без пасярэднікаў.

Я для сябе размяжоўваю кампанію і асобу CEO. Аўтамабілі робяць выдатныя, і добрых альтэрнатыў за гэтыя грошы няма (у кантэксце набыцця новага аўтамабіля) у гэтай цанавой катэгорыі, асабліва з улікам эксплуатацыі аўто ў ЕС і сеткі Supercharger.

Перавагі:

• Надзейнасць і прастата абслугоўвання — за 130 тыс. км прабегу было толькі адно гарантыйнае пытанне па падвесцы.
• Кошт 1 км шляху: зараджаюся дома + ёсць сонечныя панэлі. Выходзіць значна танней, чым аўта з РУЗ (рухавік унутранага згарання) + нізкі расход самой Tesla ў параўнанні з іншымі электрамабілямі.
• Аўтапілот — вельмі камфортна пры паездках на далёкія адлегласці.
• Сетка Tesla Supercharger — адна з самых танных і ніколі не падводзіла. Плюс навігацыя аўтаматычна будуе маршрут па сетцы станцый, што дазваляе не думаць пра тое, дзе і колькі трэба зараджацца.
• Паскарэнне і кіравальнасць на вышыні.

Ну і плюс усіх электрамабіляў — бясплатныя паркоўкі, магчымасць ездзіць па аўтобусных палосах (вельмі дапамагае ў гадзіны пік).

Мяняць не буду, але налепку «Купіў гэтую машыну да таго, як Маск з’ехаў з глузду» павесіў

— Купіў новую Tesla у 2022 годзе непасрэдна ў салоне ў Варшаве прыкладна за 250 тысяч злотых. З тых часоў праехаў ужо больш за 100 тысяч кіламетраў па ўсёй Еўропе — ад Канарскіх астравоў да гарналыжных курортаў. І ўражанні толькі станоўчыя. За ўвесь гэты час адзіныя выдаткі — гэта замена дворнікаў. Магу доўга абвяргаць усе стэрэатыпы пра электрычныя аўто.

Асобна хочацца сказаць пра сетку зарадак Tesla — гэта адзінае, што сапраўды працуе цалкам стабільна і надзейна ў Еўропе. Шчыра кажучы, без доступу да Supercharger падарожнічаць на электрамабілі было б цяжка і нязручна.

Мне здаецца, усе беларусы ў апошнія гады сутыкаліся з нязручнасцямі з-за няправільнага колеру пашпарта, таму абвінавачваць машыну за ўчынкі яе стваральніка не будуць.

У цэлым я спакойна стаўлюся да таго, што класную рэч, добры фільм ці штосьці яшчэ можа зрабіць не самы прыемны чалавек. У аўтапраме гэта не навіна.

Мяняць сваю Tesla пакуль дакладна не збіраюся, хоць налепку «Купіў гэтую машыну да таго, як Маск з’ехаў з глузду» я ўсё ж павесіў. На Allegro і Amazon такіх шмат.

У той жа час не ўпэўнены, што наступная машына таксама будзе Tesla. Трымаю ў галаве будучыню электраіндустрыі, але і рэпутацыя кампаніі, вядома, уплывае. Зрэшты, пару гадоў у мяне яшчэ ёсць.

Літва

Збіраўся купіць у 2025, але адмовіўся праз Маска

— У Tesla у Літве добрыя ўмовы па лізінгу, якасны сэрвіс, хуткая пастаўка і развітая інфраструктура. Даступныя бясплатныя паркоўкі, дазволена язда па вылучаных палосах.

Сам аўтамабіль прымальнай якасці, з вялікай колькасцю сучасных функцый. У цэлым, на мой погляд, гэта добрыя суадносіны кошту і магчымасцяў. Лізінг каштуе каля 450 еўра ў месяц.

Я планаваў купіць Tesla ў гэтым годзе, тым больш што нядаўна абнавілі Model Y. Аднак мяне расчаравалі паводзіны Ілана Маска — яго падтрымка Дональда Трампа, крытыка дэмакратаў, выказванні пра Канаду і Джастына Трудо, а таксама заявы пра вайну ва Украіне.

У цэлым, мне яго паводзіны падаюцца нягоднымі. Крытыкаваць і мець іншую думку — гэта нармальна. Аднак недапушчальна выкарыстоўваць зневажальныя фармулёўкі, як гэта робіць Маск. Напрыклад, называць прэм’ер-міністра іншай краіны «дзяўчынкай» — гэта не крытыка, а праява непавагі. І падобных прыкладаў нямала.

У выніку я адмовіўся ад ідэі набыць Tesla. Не хачу ні падтрымліваць, ні асацыяваць сябе з брэндам, чый твар паводзіць сябе падобным чынам. Буду купляць аўтамабіль іншага брэнду, пакуль яшчэ аналізую прапановы на рынку.

Нідэрланды

Задаволены Tesla Model 3 Long Range, «аўтамабілі — асобна, асабістыя погляды і ўчынкі Маска — асобна»

— Езджу на Tesla Model 3 Long Range 2020 года. Купіў аўтамабіль яшчэ восенню 2023 года за 34 тысячы еўра. Цяпер рынкавая вартасць каля 22 тысяч еўра.

Аўтамабілем вельмі задаволены. Хуткая, магутная, устойлівая на дарозе з нізкім цэнтрам цяжару, камфортная для кіроўцы і пасажыраў, з высокім запасам ходу ў 440 км (зімой) і 600 км (летам).

Непатрабавальная ў эксплуатацыі і танная ў кошце язды, асабліва калі ёсць магчымасць выкарыстоўваць сваю зарадную станцыю дома, сонечныя панэлі. Цалкам задавальняе мінімалістычны дызайн з невялікай колькасцю фізічных кнопак і частыя абнаўленні сістэмы, якія дадаюць новы функцыянал.

З мінусаў — няшмат месца ў багажным аддзяленні з-за вузкага праёму (у адрозненні ад Model Y), моцнае падзенне кошту за апошнія гады.

Акрамя таго, зараз павялічыліся шанцы, што Tesla можа стаць мішэнню для вандалаў, якія гатовы зрываць сваю незадаволенасць чарговым твітам Ілана Маска ў сетцы Х на аўтамабілі, выпушчаным у гады, калі кіраўнік кампаніі быў станоўчай постаццю ў свеце.

Тым не менш учынкі Маска ніяк не ўплываюць на маё стаўленне да аўтамабіляў Tesla, улічваючы, што большасць з іх была спраектавана і выпушчана яшчэ да яго дэбюту на палітычнай сцэне ЗША. Аўтамабілі — асобна, асабістыя погляды і ўчынкі Маска — асобна.

Калі ж ацаніць маё асабістае стаўленне да постаці Ілана Маска па шкале 0—10, то да студзеня—лютага 2024 гэта была цвёрдая 8, а цяпер 5. Вельмі шкада, што ён дэманструе такія эпатажныя і эксцэнтрычныя паводзіны.

Яго ўплыў на адміністрацыю Трампа, агрэсіўныя выпады міністэрства DOGE на адрас дзяржаўных службаў ЗША, падтрымка ўльтраправай партыі ў Германіі прывялі да негатыўных эфектаў для бізнесу самога Маска.

Фонавыя каціроўкі акцый упалі з гістарычнага максімуму ў 400+ еўра ў снежні 2024 да 200+ еўра ў сакавіку 2025, як і продажы новых аўтамабіляў у розных частках свету.

З іншага боку, улічваючы ўдзел Ілана Маска ў дзейнасці такіх кампаній, як PayPal, Tesla, SpaceX, Boring Company, Neuralink, цяжка адмаўляць яго магчымасці па змяненні свету ў лепшы бок. Адна паспяховая кампанія магла б быць выпадковасцю, але калі іх некалькі — гэта ўжо заканамернасць. Вывесці электрамабілі на рынак, яшчэ не гатовы да іх, каштавала вялікіх намаганняў, і поспех у гэтым напрамку выклікае павагу.

ЗША

Цяпер не купіў бы, думае пра замену

— У мінулым годзе купілі Tesla Model Y Long Range. Набыць аўтамабіль прапанавала жонка. Ды і мне самому было цікава. Многія сябры і знаёмыя ездзілі на Tesla.

Аўтамабіль купілі ў крэдыт пад 1% гадавых. Нам зрабілі добрую зніжку, плюс на машыну дзейнічаў федэральны крэдыт у памеры 7500 даляраў (зніжка) ад дзяржавы. З каліфарнійскімі падаткамі і іншымі зборамі, а таксама з улікам зніжак Tesla абышлася ў 46+ тысяч даляраў.

Але цяпер думаем пра замену Tesla. Да самой машыны прэтэнзій няма. Замену разглядаем па некалькіх прычынах.

Пры такой даступнасці аўтамабіляў на рынку хацелася б карыстацца машынай не больш за 1,5—2 гады, каб не адчуваць праблемы з абслугоўваннем і зносам. Таксама мяне загналі ў офіс, і мы пераехалі ў менш камфортнае месца для электрамабіляў. Тут менш зарадных станцый, зімой халаднавата. Там, дзе мы жылі раней, станцый было шмат.

Акрамя таго, адчуваеш сябе не ў сваёй талерцы з-за кіраўніка кампаніі. Яго ўчынкі і выказванні адносна вайны ва Украіне і самой Украіны, абразлівыя прамовы ў бок Польшчы і Германіі.

Яго доступ да адчувальных дадзеных, масавыя звальненні, і тое, як ён гэта робіць. Магчыма, гэта трэба было зрабіць, але з мандатам, без з’едлівасці і не забыцца таксама паказаць на атрыманыя грошы. Маск са сваім DOGE (Дэпартамент эфектыўнасці ўрада), расследуючы выдаткі дзяржавы, сціпла замоўчвае, колькі атрымала Tesla.

Таму кожны раз, калі ставіш машыну на зарадку, не пакідае пачуццё, што проста зараз ты плаціш Маску.

Мы разважалі з жонкай і прыйшлі да адзінай думкі, што калі б рашэнне аб куплі аўтамабіля прымалі зараз, то ў Tesla не было б шанцаў.

Дарэчы, усе электрамабілі хутка губляюць у кошце, асабліва тыя, што даражэй. Tesla губляла крыху менш, але цяпер, па адчуваннях, кошт стаў падаць хутчэй. Прычыны, хутчэй за ўсё, змяшаныя, толькі Маска абвінавачваць складана.

Тры гады таму былі чэргі за Tesla і іншымі электрамабілямі на месяцы, часта больш за паўгода. А цяпер — «бяры не хачу». Асноўная праблема Tesla — больш дарагая страхоўка.

• 2
• 0
• 2
• 2
• 0
• 0
• 0
• 0