Сабаленка з'явілася ў адным з самых дарагіх рэкламных ролікаў у свеце
Першая ракетка свету з Беларусі з іншымі зоркамі спорту знялася ў рэкламным роліку, які паказалі падчас Супербоўла.
Кампанія Nike упершыню за 27 гадоў замовіла рэкламу на Супербоўле — фінальным матчы Нацыянальнай футбольнай лігі. Гэта галоўная спартыўная падзея ў ЗША з дарагім рэкламным часам: хвілінны ролік можа каштаваць каля 16 мільёнаў даляраў.
У Nike расказалі, што вырашылі вярнуцца на Супербоўл, каб выкарыстаць гэтую папулярную пляцоўку для расповеду пра ролю жанчын у сучасным спорце, паведамляе fastcompany.com.
«Жанчыны зараз проста б'юць усе рэкорды, запаўняюць стадыёны, забяспечваюць неверагодныя продажы білетаў, заключаюць кантракты, якіх раней ніхто не бачыў, і сутыкаюцца, магчыма, з самымі жорсткімі чаканнямі адносна таго, як ім варта сябе паводзіць. І я думаю, што яны перавызначаць, што значыць быць спартсменамі і публічнымі асобамі будучыні», — расказала дырэктар па маркетынгу Nike Ніколь Хабард Грэм.
У рэкламным роліку сапраўды прадстаўлены толькі жанчыны — зоркі сусветнага спорту, якія супрацоўнічаюць з кампаніяй. Сярод іх і беларуская тэнісістка Арына Сабаленка. Першая ракетка свету з'яўляецца ў відэа двойчы: у адным з эпізодаў яна ў адчаі кідае ракетку на корт, а ў іншым радуецца поспеху.
Апрача Сабаленкі, у роліку пад неўміручую хіт Led Zeppelin «Whole Lotta Love» з'яўляюцца баскетбалісткі Кейткін Кларк, Эйжа Уілсан, Джуджу Уоткінс і Сабрына Іанеску; футбалістка, двухразовая ўладальніца «Залатога мяча» Алексія Путэльяс, зорка бегу на кароткія дыстанцыі, алімпійская чэмпіёнка Шакары Рычардсан і яшчэ адна чэмпіёнка Гульняў, гімнастка Джордан Чайлз.
Хто той чацвёрты вайсковец ЗША, якога дагэтуль шукаюць? І які амаль супадае па ўзросце з амерыканцам, затрыманым пад Маладзечнам5
Каментары