На перамовах у Саудаўскай Аравіі ЗША высветляць, ці гатова Украіна да міру
ЗША падчас перамоваў з украінскай дэлегацыяй у Саудаўскай Аравіі ў аўторак плануюць высветліць, ці гатовы Кіеў пайсці на саступкі Расіі дзеля спынення вайны, паведамляе Reuters са спасылкай на двух амерыканскіх чыноўнікаў, якія размаўлялі на ўмовах ананімнасці.
Амерыканская дэлегацыя таксама будзе «сачыць за прыкметамі таго, што ўкраінцы сур'ёзна настроены на паляпшэнне адносін» з адміністрацыяй прэзідэнта ЗША Дональда Трампа пасля спрэчкі ў Белым доме, сказаў адзін з суразмоўцаў агенцтва.
Дэлегацыю ЗША ўзначаліць дзяржсакратар Марка Рубіа, украінскую — кіраўнік Офіса прэзідэнта Андрэй Ярмак. Чакаецца, што да Рубіа далучацца дарадца Трампа па нацыянальнай бяспецы Майк Уолц і спецыяльны пасланнік на Блізкім Усходзе Стыў Уіткаф.
«Нельга казаць «я хачу міру» і «я адмаўляюся ісці на кампраміс»», — сказаў Reuters адзін з амерыканскіх чыноўнікаў.
«Мы хочам убачыць, ці зацікаўлены ўкраінцы не проста ў міры, а ў рэалістычным міры, — заявіла іншая крыніца. — Калі іх цікавяць толькі межы 2014 або 2022 года, гэта аб нечым сведчыць».
Прэзідэнт Украіны Уладзімір Зяленскі ў панядзелак правядзе ў Саудаўскай Аравіі перамовы з наследным прынцам Мухамедам бін Салманам, пасля чаго ўкраінская каманда застанецца для перамоваў з амерыканскім бокам.
У вячэрнім звароце ў нядзелю Зяленскі сказаў, што спадзяецца на вынікі перамоваў як па набліжэнні міру, так і па працягненні падтрымкі з боку Вашынгтона.
Прэзідэнт ЗША Дональд Трамп заявіў, што ЗША амаль аднавілі абмен разведвальнымі данымі з Украінай, паведамляе Reuters. Ён таксама сказаў, што чакае добрых вынікаў ад наступных перамоваў амерыканскіх і ўкраінскіх афіцыйных асоб у Саудаўскай Аравіі.
Адказваючы на пытанне, ці разглядае ён магчымасць аднаўлення абмену інфармацыяй, Трамп сказаў: «Мы амаль зрабілі гэта. Вось-вось».
З нагоды перамоваў у Саудаўскай Аравіі ён заявіў наступнае: «Я веру, што мы дасягнем вялікага прагрэсу на гэтым тыдні».
Цяпер чытаюць
«Людзі хочуць перамоваў з тымі, хто марыць іх знішчыць фізічна». Гутарка з Аляксандрам Кабанавым пра жыццё, «Белпол» і разыходжанне з Пятрухіным2
Каментары